Làlwaw Kaanziin 28 - Cebaara Bible 2010

Dùbaw kèlē

¹ «Mɔ ga ni Yawe mɔ Kolocɔlɔw jóomɔ sámagi ni lúro, níì wi kajoodɛɛngèle myɛ cò ní i ge kpéʔele, koro gele mii tèé mɔ na lè níjanʔa, Yawe mɔ Kolocɔlɔw a mɔ kpɔ́ʔɔ bi sɔ̀lɔ tári syɛɛnfeleye myɛ na.

² Lǎli ni mɔ ga ni Yawe mɔ Kolocɔlɔw jóomɔ lúro lè, dùba kérigèle myɛ ke a nan mɔ na lè bi pye mɔ woʔolo, koro ge nyɛ gele naa:

³ Dùbaw a pye mɔ na kěgi ni bi pye mɔ na sìnbirigi ni.

⁴ Dùbaw a pye mɔ láagi pìibēle, ní mɔ tásaligi yasanra na, bi wɔ́ɔ pye mɔ yaweeri pìibēle na, gee bee n jo mɔ yaweekpologèle sériye, ní mɔ yaweeyiligèle búgulo.

⁵ Dùbaw a pye mɔ sɛʔɛli, ní mɔ búrukpumɔn-yalegi na.

⁶ Mɔ ga ni jǐn dùbaw a pye mɔ na, mɔ ga ni yirigi dùbaw a pye mɔ na.

⁷ Mɔ nigoobèle bele ga yìri ni túngu ní mɔ ní lè, Yawe a fànʔa kaan mɔ ma mɔ í be jáa. Pe a yiri mɔ kánmi na kologo nibin ni, pe si a ba fàn mɔ yɛ́ɛgi na koloyo kɔrɔsiin ni.

⁸ Yawe a gi yaʔa dùbaw í pye ní mɔ ní mɔ gbodungèle ni, ní mɔ fáliw myɛ ni. Táree Yawe mɔ Kolocɔlɔw a kaan mɔ ma lè wi a dùbaw taʔa mɔ na di ni.

⁹ Yawe a yele télege yele í pye woro syɛɛncanbéle àmɛɛ wi gi joo mɔ ma ní kàliga ní lè, ní mɔ ga tɛ́nɛ̀ Yawe mɔ Kolocɔlɔw kajoodɛɛngēle kɔn, ní i wi kóloyi táanri.

¹⁰ Tári syɛɛnfeleye myɛ a gi nyaa bi cán Yawe mɛ́ɛgi i yiri mɔ na, yi a fyáa mɔ na.

¹¹ Yawe a mɔ tín yacanri na. Wi a mɔ láagi pìibēle nɛʔɛ, bi wɔ́ɔ mɔ yaweeri pìibēle, ní mɔ tásaligi yaliifálara nɛʔɛ tári ni, dee kéele na Yawe kàli mɔ tóolɛɛbèle ma níì jo woro a di kaan mɔ ma lè.

¹² Yawe a wi lɔ́ri yakɔnjanga múgu mɔ ma, ki lè nyɛ̀ʔɛni, bàā zěgi kaangi mɔ tári ma ki lǎli ni, si dùbaw taʔa mɔ kɔ́yi fáli myɛ na. Mɔ wi a ra fwɔ́ɔgèle nii syɛɛnfeleye saʔa na, mɔ si a ra fwɔɔlɔ kúunri í.

¹³ Yawe a mɔ kpéʔele nyǔngi, mɔ a pye nangi í. Mɔ a pye canʔa o canʔa ǹjoʔo ma, mɔ a tée pye táàma í, koro a pye lǎli ni mɔ ga tɛ́nɛ ni Yawe mɔ Kolocɔlɔw kajoodɛɛngēle lúro lè, koro gele mii nyuu mɔ ma lè níjanʔa, lǎli ni mɔ ga ge cò ní i ge kpéʔele lè,

¹⁴ mɔ si ga wàli n láʔa mii syɛɛnjóoraa faala na n kári kàliige wàlá kàmɔnɔ ma í, toro dee mii nyuu yele ma lè níjanʔa, ní sáà miyɛɛ daʔa kolocɔlɔbèle pèle nikwɔɔlɔ na ni kpɔ̀ʔɔrɔ́ í.

Dángaw kèlē

¹⁵ «Kàjáa kapye mɔ ga fɔ̀lɔ ni Yawe mɔ Kolocɔlɔw jóomɔ lúro í, wi kajoodɛɛngèle myɛ, ní wi làlwaw kèlē myɛ mii nyuu mɔ ma lè níjanʔa, mɔ ga pye mɔ ga ge sámaga n cò ní i ge kpéʔele í, dángaw kèlē myɛ ke a mɔ le lè, bi mɔ nɛnɛ taa, koro ge nyɛ gele naa:

¹⁶ Dángaw a pye mɔ na kěgi ni bi pye mɔ na sìnbirigi ni.

¹⁷ Dángaw a pye mɔ sɛʔɛli, ní mɔ búrukpumɔn-yalegi na.

¹⁸ Dángaw a pye mɔ láagi pìibēle, ní mɔ tásaligi yasanra, ní mɔ yaweekpologèle sériye, ní mɔ yaweeyiligèle búgulo na.

¹⁹ Mɔ ga ni jǐn dángaw a pye mɔ na, mɔ ga ni yirigi dángaw a pye mɔ na.

²⁰ Yawe a dángaw, ní fûnnyaʔamiri, ní kàfulogi cáan mɔ na kérigèle myɛ ni mɔ kpéʔele lè fwɔɔ bi taa mɔ í kálagi, fwɔɔ bi taa mɔ í kwɔ́ɔ yiri yaà kelekele mɔ péemi kapyere kéele na àmɛɛ mɔ mii cée lè.

²¹ Yawe a káfalaga yáama tan mɔ na fwɔɔ bi taa pi mɔ kálagi yirige yaà tári ni, dee ni mɔ a sa jée lè bi di syɔɔ taa.

²² Yawe a mɔ kpúmɔn ní waʔari yáama, ní nyínmi, ní cenyɛʔɛri-yáami, ní káfugbangi, ní wáami ní, n fàra tátɔɔnw ní yaliiri fɔnʔɔnɔ na, dee bee a pye mɔ kurugo fwɔɔ bi taa mɔ í kwɔ́ɔ yiri yaà.

²³ Nyɛ̀ʔɛni li nyɛ mɔ nyúngi ǹjoʔo ma lè, li a pye kanyɛɛnrɛ, tári di nyɛ mɔ láari ni lè, ti a pye tunmɔrɔ.

²⁴ Yawe a ra cíbigi ní míigi ŋuu mɔ tári na zěgi sìndɛʔɛ ni. Ki a ra yìrigí nyɛ̀ʔɛni na bàā tuun mɔ na fwɔɔ bi taa mɔ í kálagi kwɔ́ɔ.

²⁵ Yawe a gi yaʔa mɔ nigoobèle í mɔ jáa. Mɔ a yiri be kánmi na kologo nibin ni, mɔ si a ba fàn be yɛ́ɛgi na koloyo kɔrɔsiin ni, mɔ a pye fyáara yáriga tári fànya myɛ ma.

²⁶ Mɔ woguuw a pye nyɛ̀ʔɛni féjɛɛnrɛ myɛ ní tári yaweere myɛ lìile, syɔɔn faala a taa bi di fúuro í.

²⁷ Yawe a mɔ kpúmɔn ní Ezyipiti ye fìniyi félege ní, n fàra níkunyi yáama, ní sìngbanʔari, ní tòógi na, yáami bi lè mɔ a gbǎn pɔʔɔ bi na í.

²⁸ Yawe a cúromɔ, ní fúunro tɛ́ʔɛ bi mɔ kpúmɔn si wɔ́ɔ mɔ yákiriw syɔɔ mɔ na.

²⁹ Mɔ a ra tala da máari bi cángi yaʔa nyùngo ni àmɛɛ fúuɔn gáā tala ni máari yébilimɛ ni lè. Mɔ katimanagèle a ra forogi í. Mɔ a pye canʔa o canʔa paa fǎngi gbàngí mɔ na si wɔ́ɔ ra mɔ yáriri koli, syɔɔfɔlɔ a tée taa mɔ na í.

³⁰ Mɔ a pìcaa cò, nànwaa nikwɔɔ si ba wi kálagi. Mɔ a kpaʔa faan mɔ si a tɛ́ɛn gi ni í. Mɔ a ɛrɛzɛn tírire cɔ́rɔ, mɔ si a di yasanri taa í.

³¹ Pe a mɔ náapeli kɔni mɔ nyɛ́nɛ na, mɔ si a káa li na í. Pe a mɔ jofaniw cò mɔ nyɛ́nɛ na, pe si a ní wi lúrugo kaan mɔ ma í. Mɔ yaweeyiligèle a kaan mɔ nigoobèle ma, syɔɔfɔlɔ a tée taa mɔ na í.

³² Mɔ nanbiigèle, ní mɔ calipiigèle a kaan syɛɛnfelegaa nikwɔɔ ma. Mɔ nyapiigèle a gee bee nyaa pe nyaalaaw si pye ge na canʔa o canʔa, mɔ fánʔa si a taa yafyɛn na í.

³³ Syɛɛnfelegee gi lè mɔ ga gi cán í koro a ra mɔ tásaligi yafálara líi bi fàra mɔ fáliw tɔ̀nɔ myɛ na. Pe a ra fǎngi gbàngí mɔ na canʔa o canʔa sáā mɔ tɔ́nʔɔnɔ.

³⁴ Gee mɔ a nyaa ní mɔ nyapiigèle ní lè, ki a cúromɔ wáa mɔ na.

³⁵ Yawe a mɔ kpúmɔn ní fìnibeere ní yégunyi, ní tɔ́lɔyi na, mɔ a gbǎn pɔʔɔ í. Wi a mɔ kpúmɔn bi séli yédaagèle na fwɔɔ bi sa nan nyùnlibiw na.

³⁶ Yawe a gi yaʔa mɔ ní mɔ fanʔafɔw mɔ a télege miyɛɛ nyúngi na lè yele í tánʔa kári syɛɛnfelegaa tára ma, syɛɛnfelegee gi lè mɔ ga gi cán í, mɔ tóolɛɛbèle da wɔ́ɔ̀ gi cán í. Bi mɔ yaʔa yaà beè, mɔ a ra kolocɔlɔbèle pèle nikwɔɔlɔ kpɔ̀ʔɔrɔ́, pe lè tíiri, ní kàdɛnɛri wòolo.

³⁷ Syɛɛnfeleyee myɛ má Yawe a mɔ tórigo lè, mɔ a sa pye bìngaara yáriga, ní kàseele yáriga, ní yafaʔala yi ma.

³⁸ Mɔ a ra yaliire saʔa wáa ségi ni, sáā cɛɛri yagana lée, níì cán kúdow a ra di líi.

³⁹ Mɔ a ra ɛrɛzɛn tírire cɔ́rɔ, mɔ a di fála, mɔ si a dùvɛɛn taa gbaa í wàlá bi ɛrɛzɛn-jɔnjɔnyɔ cɛnɛ í, níì cán fyɛ́ɛnri a yi lìi.

⁴⁰ Olivye tíire a pye mɔ tári tɛ́ɛyɛ myɛ ni, mɔ si a sìnmɛ taa bàā tíre í, níì cán mɔ olivyew a kɔlɔ́ wo sìnlɛɛ ni.

⁴¹ Mɔ a nànbiigéle ní calipiigèlē see, ke si a pye mɔ woʔolo í, níì cán ke a cò bi kári.

⁴² Kúdow a mɔ tíiri myɛ, ní mɔ tári yafálara myɛ lìi.

⁴³ Nibɔnw wi a pye yele níngi ni lè, woro a ra yìrigí canʔa o canʔa bi pye mɔ njogi ni, mɔ sáā tíri táàma.

⁴⁴ Wi a ra fwɔ́ɔgèle nii mɔ na, mɔ a tée fwɔɔlɔ le wi na í. Woro wi a pye nyǔngi, mɔ si pye nángi.

⁴⁵ Dánga kérigèle bee myɛ a too mɔ na, si kòro mɔ kurugo, bi mɔ taa cò fwɔɔ bi taa mɔ í kálagi, níì cán mɔ ga fɔ̀lɔ n Yawe mɔ Kolocɔlɔw jóomɔ lóʔo í. Wi kajoodɛɛngèle ní wi làlwaw kèlē wi joo mɔ ma lè, mɔ ga ge kpéʔele í.

⁴⁶ Dánga kérigèle bee a pye fɛ̀ɛbēle, ní kakpoloyo mɔ ní mɔ yodaʔayi kurugo làla o làla.

⁴⁷ Amɛɛ ki a pye lè mɔ í yarira saʔa taa, mɔ si a ra báara Yawe mɔ Kolocɔlɔw ma ní fundaanra, ní funjànga ní í,

⁴⁸ Yawe a mɔ nigoobèle yìrige mɔ kurugo, mɔ a ra báara be ma bi mɔ yaʔa ní kateegi, ní lògbaalaagi ní, mɔ si pye níbori, yáriri myɛ si mɔ fɔ̀n. Wi a tunmɔrɔ zúu taʔa mɔ yátiigi na bi taa wi mɔ kálagi kwɔ́ɔ.

⁴⁹ Yawe a syɛɛnfelegaa yìrige yaà léelige mɔ kánmi na tári láʔagéle ma bi wáa mɔ na. Ki a fùuri bi tɔ́n mɔ na àmɛɛ nyɔɔ̀ nyɛ lè. Ki a pye syɛɛnfelegaa, gee gi lè mɔ a ra gi syɛ́ɛnri lúro í.

⁵⁰ Syɛɛnfelegaa gii, gee yɛ́ʔɛ gi waʔa lè, ki a ba ra wolɛɛɔ córo í, ki a ra nyinimɛ taagi pyà na í.

⁵¹ Ki a ba ra mɔ yaweeri pìibēle káa bi wɔ́ɔ ra mɔ tásaligi yasanra líi, fwɔɔ bi taa ki mɔ kálagi kwɔ́ɔ. Ki a tée yaliifálara wàlá dùvɛɛnfɔɔn, wàlá sìnmɛ wàlá mɔ yaweekpologèle pìiwaa wàlá mɔ yaweeyiligèle pìiwaa yaʔa mɔ ma í fwɔɔ bi taa ki mɔ kálagi kwɔ́ɔ.

⁵² Ki a sa tɛ́ɛn mɔ taana kapɛɛnni kánma na kěyi myɛ ni mɔ nyɛ lè fwɔɔ bi taa tòdɔnɔ-nìriyee na mɔ a mɔ sɔngunmi taʔa lè yee bee í too mɔ tári tɛ́ɛyɛ myɛ ni. Ki a tɛ́ɛn mɔ taana kapɛɛnni kánma na kěyi myɛ ni mɔ nyɛ lè tári ni, dee Yawe mɔ Kolocɔlɔw a kaan mɔ ma lè.

⁵³ Bi mɔ yaʔa cɔ̀ɔnrimi, ní wɔʔɔgi ni mɔ nigoow a taʔa mɔ na lè, àmɛɛ wi a tɛ́ɛn mɔ taana kapɛɛnni kánma na lè, mɔ a ra mɔ láagi pìiseebéle káa. Nànbiigèle ní calipiigèle Yawe mɔ Kolocɔlɔw a kaan mɔ ma lè, mɔ a ra ge káa.

⁵⁴ Nǎnwee wi nyɛ yele níngi ni lè fûnnyingefɔlɔ, ní nyinidaaɔ n sɔ̀lɔ, wi a ba ra wi senyɛnw, ní wi cenidaanmaw wéle ní funbeʔe wélele ní, n fàra wi pìíbèle bele na pe a kòro wi ma lè,

⁵⁵ jàngó woro a kɔ́ pe wàa lɛɛlɛ kúun í, lǎli ni wi ga ni wi pìíbèle pèle káara káa lè í, níì cán yafyɛn a ní kòro wi ma í, mɔ nigoow kéele na wi a tɛ́ɛn mɔ keyi myɛ nyɔ́ɔ na lè kapɛɛnni kánma na, ní mɔ cɔɔnrimi, ní mɔ wɔʔɔgi kéele na.

⁵⁶ Céwee wi nyɛ yele níngi ni lè fûnnyingefɔlɔ, ní nyinidaaɔ n sɔ̀lɔ, wi nyinidaari, ní wi fûnnyingi fúngo ni, wi caa o wi nyɔ̌nni téeri ni wéle tári na í, woro a ra wi nannidaanmaw, ní wi nànbili, ní wi calipili wéle ní funbeʔe wélele ní.

⁵⁷ Alí yìgiri ti a yiri wi ni lè, ní pìíbèle wi see lè, wi a be làrá káa, níì cán wi a fɔ̀n yáriri myɛ ni cɔ̀ɔnrimi ní wɔʔɔgi kéele na, gee mɔ nigoow a taʔa mɔ na lè àmɛɛ wi a tɛ́ɛn mɔ keyi taana bi mɔ sùlú le lè.

⁵⁸ Mɔ ga pye mɔ ga làlwaw naa syɛ́ɛnrɛ myɛ cò ní i di kpéʔele í, toro dee di sɛ́bɛ lè sɛ́bɛw naa ni, mɔ ga pye mɔ o fɛ̀ɛgí nìjangbɔɔrɔ, ní fyáakpɔɔrɔ mɛ́ɛgi naa na í, ki lè Yawe mɔ Kolocɔlɔw,

⁵⁹ Yawe a bìngaataa-kpúmɔnrɔ taʔa mɔ ní mɔ yodaʔayi na, kpumɔnbeere, dee ti a mɔn beè lè, ní yaabeemɛ, bee pi a mɔn beè lè.

⁶⁰ Ezyipiti yaaveleyee myɛ yɛ́ʔɛ na mɔ da ni cɛ̀lɛ lè, wi a yi cáan mɔ na, yi a kòro mɔ kurugo.

⁶¹ Alí yáamee féleye, ní wɔʔɔyee féleye yi lè yi ga sɛ́bɛ làlwaw naa sɛ́bɛ ni í, Yawe a yee bee taʔa mɔ na fwɔɔ bi taa mɔ í kálagi kwɔ́ɔ.

⁶² Yele bele ye a ba nɛʔɛ bi pye àmɛɛ nyɛ̀ʔɛni ŋɔripiigéle nyɛ lè, yele a ní ba kòro saʔa í, níì cán mɔ a ba Yawe mɔ Kolocɔlɔw jóomɔ lóʔo í.

⁶³ Amɛɛ ki da Yawe dɛ́nɛ bi kacànna kpéʔele yele na bi yele nɛʔɛ lè, ànbée ki a wɔ́ɔ wi dɛ́nɛ bi yele kálagi bi yele kwɔ́ɔ. Pe a yele kɔn bi yirige tásaligi ni, gee ni yele a jée lè bi gi syɔɔ taa.

⁶⁴ Yawe a yele cariga bi lége syɛɛnfeleyi myɛ nínge ni, bi séli tári láʔalee ma bi taa sa nan lee na. Nɛɛ bee mɔ a ra kolocɔlɔbèle pèle nikwɔɔlɔ kpɔ̀ʔɔrɔ́ pe lè mɔ ní mɔ tóolɛɛbèle da be cán í, poro bele be sámaga lè ní tiire, ní kàdɛnɛrɛ ní.

⁶⁵ Bi mɔ yaʔa syɛɛnfeleyi bee nínge ni, mɔ a yɛɛ̀nyinge taa í, mɔ a tée tɛɛ̀ŋɔ́ndaala taa beè mɔ a nyɔ̌nni tɛ́ʔɛ lè í. Yawe a zɔ̀nviige yaʔa kaa mɔ kɔɔn, mɔ nyapiigèle fánʔa a kwɔ́ɔ, mɔ a ra wɔʔɔ fúngi ni.

⁶⁶ Kàkabalaga a jée mɔ ni, mɔ siiw kéele na. Mɔ a ra fɛ̀ɛgí yébiligi, ní cángi ni, mɔ a ra miyɛɛ gábala bi jo dɔ̀ʔɔ́ mɔ a pye beè yoo.

⁶⁷ Fyáari kèlē báriga ni ke a pye mɔ fúngi ni lè, ní kérigèle gele mɔ a ra nyaagi ní mɔ nyapiigèle ní lè, ki ga pye nyǐngi nyɔ́ɔ na mɔ a ra gi nyuu si jo: ‹Ki ga maa caà pye cângwɔɔgi nyɔɔ!› Ki ga pye cângwɔɔgi nyɔ́ɔ na, mɔ a ra gi nyuu si jo: ‹Ki ga maa caà pye nyǐngi nyɔ́ɔ!›

⁶⁸ Yawe a ní mɔ lúrugo tórigo bàtobéle ni, Ezyipiti ma, mɔ a ní kólogi láa, gee kéele na mii da gi joo mɔ ma lè níì jo: ‹Mɔ a ní gi nyaa í.› Yele a sa yeyɛɛ pára yaà beè yele nigoobèle ma bi pye pulonànbēle, ní pulocabala, syɔɔfɔlɔ si a taa yele na í.»

MOWIZI JOOZANNI

⁶⁹ Joogaanni syɛ́ɛnrɛ di nyɛ dee naa, lee kéele Yawe da joo n gbàn Mowizi ma níì jo wi li kpéʔele ní Isirayɛli ye ní Mowabi tári ni lè, n náà fàra joogaanni na wi da kpéʔele ní be ní Horebi ma lè.