Làlwaw Kaanziin 27 - Cebaara Bible 2010

ISIRAYƐLI YE I JOOGAANNA FƐTII KPEʔELE Kàdɛnɛyi yérigele kéele Ebali nyanbelegi na

¹ A Isirayɛli wolɛɛbèle fàra Mowizi na, a wi syɛ́ɛnri naa joo n gbàn syɛ́ɛnmi ma níì jo: «Kajoodɛɛngèle mii tèé yele na lè níjanʔa, ye ge myɛ sámaga ye cò.

² Táree Yawe mɔ Kolocɔlɔw a kaan mɔ ma lè, cángee na yele ga Zyuridɛnw jeli n jée di ni lè, mɔ a kàdɛnɛgboloyo láa bi yérige, si yi pɔ̀li ní làsofiio ní,

³ mí làlwaw naa syɛ́ɛnrɛ myɛ sɛ́bɛ yi na, lǎli ni mɔ ga jeli n jée tári ni lè, dee Yawe mɔ Kolocɔlɔw a kaan mɔ ma lè, táraa dii, dee di nyìn nɔ́nɔw ní sárigi na ni fóo lè bi yɛlɛ ní gi ní àmɛɛ Yawe mɔ tóolɛɛbèle Kolocɔlɔɔ gi joo mɔ ma lè.

⁴ Lǎli ni yele ga Zyuridɛnw jeli lè, yele a kàdɛnɛyi yìrige yérige Ebali nyanbelegi na, yee kéele mii nyuu yele ma lè níjanʔa, mí yi pɔ̀li ní làsofiio ní.

⁵ Mɔ a sáriga-wòlo-yafanʔa faan yaà beè Yawe mɔ Kolocɔlɔw ma, kàdɛnɛrɛ sáriga-wòlo-yafanʔa, dee di lè mɔ a tunmɔrɔ yála nyáʔana di na í.

⁶ Mɔ a Yawe mɔ Kolocɔlɔw sáriga-wòlo-yafanʔa faan ní kàdɛnɛnaa-sìndanra ní, sáā sáriga-sórigoo wóo sáriga-wòlo-yafaangi bee na Yawe mɔ Kolocɔlɔw ma.

⁷ Da pínɛnyɛnnɛgi sáriga wóo, máā líi yaà, máā fundaanra kpéʔele Yawe mɔ Kolocɔlɔw yɛ́ʔɛ ma.

⁸ Mɔ a làlwaw naa syɛ́ɛnrɛ myɛ sɛ́bɛ kàdɛnɛyi bee na, bi di sámaga kánʔana wòlo.»

⁹ Mowizi ní Levii ye be lè sáriga-wòlobèle, a poro gi joo Isirayɛli ye myɛw ma níì jo: «Isirayɛli, ki n yɛlɛ mi pyèri mí lóʔo! Níjanʔa mɔ n baa pye Yawe mɔ Kolocɔlɔw syɛɛnfelege.

¹⁰ Da Yawe mɔ Kolocɔlɔw jóomɔ lúro, máā wi kajoodɛɛngèle, ní wi làlwaw kèlē kpéʔele, gele mii tèé mɔ na lè níjanʔa.»

¹¹ A Mowizi syɛ́ɛnri naa joo n gbàn syɛ́ɛnbèle ma cángi bee wonijanga níì jo:

¹² «Lǎli ni yele ga Zyuridɛnw jeli lè, bele pe a yére Gariziimi nyanbelegi na si dùbaw kpéʔele syɛ́ɛnbèle ma lè, poro be nyɛ Simeyɔn, ní Levii, ní Zyuda, ní Isakari, ní Zyozɛfu, ní Bɛnzyamɛ.

¹³ Bele si pe a yére Ebali nyanbelegi na lè si dángaw syɛ́ɛnrɛ joo, poro be nyɛ Wurubɛn, ní Gadi, ní Azɛɛri, ní Zabulɔn, ní Dan, ní Nɛfitalii.

Dánga tɛ́ɛyi kɛɛ ní siin

¹⁴ «Levii ye a syɛ́ɛnri láa bi gi joo Isirayɛli ye myɛw ma ní yákpogbɔɔlɔ ní si jo:

¹⁵ ‹Syɔ́ɔnwee wi ga yatanga wàlá n tunmɔrɔ gbàla n yarigaa niwirige sámaga lè, gee gi lè yanɔnʔɔgɔ Yawe nyɛ́nɛ na, ní si i nyɛ fáliw kacanwaa kɔ́yɔ kapyele, níì gi tɛ́ʔɛ tɛɛlaralaa ni, ki n yɛlɛ wi dánga!› Syɛ́ɛnbèle myɛ a gi joo si jo: Amiina!

¹⁶ ‹Wee wi ga wi toò wàlá wi nɔɔ̀ faʔa lè, ki n yɛlɛ wi dánga!› Syɛ́ɛnbèle myɛ a gi joo si jo: Amiina!

¹⁷ ‹Wee wi ga wi syɛɛnnyɛnnɛ láʔagologo kàriga lè, ki n yɛlɛ wi dánga!› Syɛ́ɛnbèle myɛ a gi joo si jo: Amiina!

¹⁸ ‹Wee wi ga fúuɔn pùuni n yirige kólogi ni lè, ki n yɛlɛ wi dánga!› Syɛ́ɛnbèle myɛ a gi joo si jo: Amiina!

¹⁹ ‹Wee wi ga nibɔɔn wàlá círio, wàlá lɔgucaa kútii kálagi lè, ki n yɛlɛ wi dánga!› Syɛ́ɛnbèle myɛ a gi joo si jo: Amiina!

²⁰ ‹Wee wi ga sínɛ ní wi toò cɔ́ɔ ní lè, ki n yɛlɛ wi dánga! Níì cán wi n nan wi tóow cɔ́ɔ na.› Syɛ́ɛnbèle myɛ a gi joo si jo: Amiina!

²¹ ‹Wee wi ga sínɛ ní yaweʔe o yaweʔe félege ní lè, ki n yɛlɛ wi dánga!› Syɛ́ɛnbèle myɛ a gi joo si jo: Amiina!

²² ‹Wee wi ga sínɛ ní wi senyɛnjaà ní lè, tofɔlɔ na senyɛnnɛ̀ wàlá nafɔlɔ na senyɛnnɛ̀, ki n yɛlɛ wi dánga!› Syɛ́ɛnbèle myɛ a gi joo si jo: Amiina!

²³ ‹Wee wi ga sínɛ ní wi cɔɔ̀ nɔ́ɔ ní lè, ki n yɛlɛ wi dánga!› Syɛ́ɛnbèle myɛ a gi joo si jo: Amiina!

²⁴ ‹Wee wi ga wi syɛɛnnyɛnnɛ kpóo làrama ni lè, ki n yɛlɛ wi dánga!› Syɛ́ɛnbèle myɛ a gi joo si jo: Amiina!

²⁵ ‹Wee wi ga námara kpɔ́ʔɔrɔ syɔɔ jàngó bi tɛɛlɛ fun sìsyaan wo lè, ki n yɛlɛ wi dánga!› Syɛ́ɛnbèle myɛ a gi joo si jo: Amiina!

²⁶ ‹Wee wi lè wi o làlwaw naa syɛ́ɛnrɛ jàtée ní i di forogi í, ki n yɛlɛ wi dánga!› Syɛ́ɛnbèle myɛ a gi joo si jo: Amiina!