Làlwaw Kaanziin 26 - Cebaara Bible 2010

Yaliiseliri kaanna kéele

¹ «Lǎli ni mɔ ga jée lè tári ni, dee Yawe mɔ Kolocɔlɔw a kaan mɔ ma lè kɔrigɔ, lǎli ni mɔ ga di syɔɔ n taa lè níì tɛ́ɛn di ni,

² mɔ a tásaligi yaliiselire myɛ yasanraa láa, dee mɔ a taa lè tári ni, dee Yawe mɔ Kolocɔlɔw a kaan mɔ ma lè bi le sɛ̀ʔɛlɛ ni bi kári tɛ́ɛgi ma, gee Yawe mɔ Kolocɔlɔw a nyɛ́nɛ wòlo lè bi wi mɛ́ɛgi pye yaà beè.

³ Mɔ a kári sáriga-wòlow ma, wee wi nyɛ lè fáliw na cányi bee ni, bi sa wi pye: ‹Mii a gi joo níjanʔa Yawe mɔ Kolocɔlɔw ma si jo mii n jée tári ni, dee kéele na Yawe da kàli wolo tóolɛɛbèle ma níì jo woro a di kaan wolo ma lè.›

⁴ Sáriga-wòlow a sɛ̀ʔɛli yirige mɔ kɔ́gi ni bi tɛ́ʔɛ Yawe mɔ Kolocɔlɔw sáriga-wòlo-yafanʔa yɛ́ʔɛ ma.

⁵ Mɔ a syɛ́ɛnri naa joo Yawe mɔ Kolocɔlɔw yɛ́ʔɛ ma si jo: ‹Mii tóolɛɛgi maa pye Arami ye ninyaariga. Wi n tìgi n kári Ezyipiti ma n sáà tɛ́ɛn yaà, wi syɛ́ɛnbèle si i nyɛ cɛɛri, a wi syɛ́ɛnbèle baa pye yaà beè syɛɛnfelegaa, gee gi nɛʔɛ lè á gi séew ní gi fǎngi wɔ́ɔ̀ kpɔ́ʔɔ.

⁶ A Ezyipiti ye si ba ni wolo wɔʔɔ, ní i kapeeyi kpéʔele wolo na níì wolo kɔ́ri n cáan faligbanyi na.

⁷ A wolo yákpogèle wáa Yawe kurugo wi lè wolo tóolɛɛbèle Kolocɔlɔɔ. A Yawe wolo sùpiiwáari lóʔo, níì wolo fɔ̀rɔgbɔɔgi, ní wolo faligbanyi, ní wolo fóomi nyaa.

⁸ A Yawe wolo yirige Ezyipiti ni ní sée kɔ́lɔ, ní kɔ̂zánʔaga ní, n fàra fyáakpɔɔrɔ, ní fɛ̀ɛbēle, ní kakpoloyo na.

⁹ Wi n pan ní wolo ní tɛ́ɛgi naa ma n baa tári naa kaan wolo ma, táraa dii, dee di nyìn nɔ́nɔw ní sárigi na ni fóo lè.

¹⁰ Ee Yawe, tásaligi mɔ kaan mii ma lè, ki yasanzeliri ní mii pan wee mɔ ma tɔ́ɔliw ni.› Mɔ a di tɛ́ʔɛ Yawe mɔ Kolocɔlɔw yɛ́ʔɛ ma, si tìgí too tári na Yawe mɔ Kolocɔlɔw yɛ́ʔɛ ma bi wi kpɔ̀ʔɔrɔ.

¹¹ Koro kàdoʔo ma mɔ ní Levii ye wów, ní nibɔnw wi nyɛ ní mɔ ní lè, yele a náa ra fundaanra kpéʔele yacanri myɛ kéele na, dee Yawe mɔ Kolocɔlɔw kaan mɔ ní mɔ kpáagi wòolo ma lè.

Yɛ́ɛgèle taanri-daanri yáʔa wòlolo kéele

¹² «Yɛɛdaanri wóli li lè yáʔaw yɛ́ɛlɛ, lǎli ni mɔ ga kwɔ́ɔ yáʔaw córo-mí-yirigele na lè mɔ yataari myɛ ni, níì wi kaan n kwɔ́ɔ Levii ye wów, ní nibɔnw, ní círiw, ní lɔgucew ma, á be lìi n tín mɔ keyi ni lè,

¹³ mɔ a gi joo Yawe mɔ Kolocɔlɔw yɛ́ʔɛ ma si jo: ‹Gee gi yaʔa kɔlɔ̀ na Kolocɔlɔɔ ma lè, mii n gi yirige mii kpáagi ni n kaan Levii ye wów, ní nibɔnw, ní círiw, ní lɔgucew ma n yɛlɛ ní kajoodɛɛngèle myɛ ní mɔ joo mii ma lè, mii ga mɔ kajoodɛɛnnaa faala kálagi wàlá n fɛ̀ʔɛ li na í.

¹⁴ Mii ga gi kàa lìi mii syɔ́ɔn kùugo làla ni í, mii ga yafyɛn wòlo di ni mii nɔ́nʔɔrɔ lala ni í. Mii ga gi kàa kaan kùugo kéele na í. Mii n Yawe mii Kolocɔlɔw jóomɔ lóʔo. Mii n gi kpéʔele n yɛlɛ ní kajoodɛɛngèle myɛ ní mɔ joo mii ma lè.

¹⁵ Bi mɔ yaʔa yaà mɔ tɛɛkòrojǎngi ni nyɛ̀ʔɛni ni, wéle naa mí dùba kpéʔele mɔ syɛ́ɛnbèle ma be lè Isirayɛli ye, mí wɔ́ɔ dùba taʔa tári na mɔ kaan wolo ma lè n yɛlɛ ní kàligi ní mɔ da kpéʔele wolo tóolɛɛbèle ma lè. Tári bee n nyìn nɔ́nɔw ní sárigi na ni fóo.›

Isirayɛli ye be lè Yawe syɛ́ɛnbèle

¹⁶ «Yawe mɔ Kolocɔlɔw i gi nyuu ni gbàngí mɔ ma níjanʔa níì jo mɔ í ra làlwa kérigèle naa ní kajoogèle naa kpéʔele. Mɔ n yɛlɛ bi ge sámaga cò sáā ge kpéʔele ní mɔ zɔnw myɛ, ní mɔ fúngi myɛ ní.

¹⁷ Mɔ n nyɔ́ɔgi fàli Yawe ma níjanʔa níì jo wi a pye mɔ Kolocɔlɔw. Mɔ si n yɛlɛ bàā wi kóloyi táanri, sáā wi làlwaw kajoogéle, ní wi kajoodɛɛngèle, ní wi tundunri kpéʔele, sáā wi jóomi lúro.

¹⁸ A Yawe nyɔ́ɔgi fàli mɔ ma níjanʔa n gi tɛ̀ɛn mɔ a pye syɛɛnfelegaa, gee ki a pye lè woro tiimaa wóʔo àmɛɛ wi gi joo mɔ ma lè. Ki si n yɛlɛ mɔ í wi kajoodɛɛngèle myɛ sámaga cò,

¹⁹ jàngó syɛɛnfeleyi myɛ wi faan lè, wi mɔ kpɔ́ʔɔ sɔ̀lɔ yee bee na sòololi, ní mɛ́ɛkpɔɔgi, ní nìjanri kàbaan na, mɔ si pye syɛɛnfelegaa, gee ki a yaʔa lè kɔlɔ̀ na Yawe mɔ Kolocɔlɔw ma bi yɛlɛ ní gi ní àmɛɛ wi gi joo mɔ ma lè.»