Làlwaw Kaanziin 25 - Cebaara Bible 2010

Kútiisinw ceriganma

¹ «Lǎli ni kútii kéele ga pye nǎnbèle pèle ma lè, a be pan n baa yére jàngó poro kútiiw í joo, tàángi a kaan tàángi fɔ́lɔ ma, kolomi si kaan kolomi fɔ́lɔ ma.

² Kolomɔfɔw ga yɛlɛ ní kpumɔnrɔ ní, kútiijoow a gi yaʔa pe wi sínɛgɛ tári na si wi kpúmɔn woro yɛ́ʔɛ ma. Sapiinyɛnyi kánma pe a kpúmɔn wi na lè, yi a pye bi yɛlɛ ní wi kolomi ní.

³ Pe a kɔ́ wi kpúmɔn bi sɔ̀lɔ sapiinyɛnyɛ togoye siin na í. Pe ga wi kpúmɔn n sɔ̀lɔ tɛɛ̀yéregi na mɔ senyɛnw a ba kàri yafaʔaga mɔ nyɛ́nɛ na.

Nìfalagi gi yaliiri sàngí lè

⁴ «Nɔ̀ɔ ga ni yaliire sàngí, mɔ a kɔ́ cɔ̀ɔ pwɔɔ wi nyɔ́ɔgi na í.

Pyà-fun lɔgucaa kéele

⁵ «Senyɛ̀nnɛ ga pínɛ n pye tɛɛnijanga ni, wàa nibin ga kùu nànbile sìnzee ni, kúw cɔ́ɔ ga yɛlɛ wi pɔri kàfugo ma nàɔn ma í, wi nǎnw senyɛnnɛ̀ a wi láa wi cɔɔ̀, wi senyɛnw sìndɛʔɛ ni.

⁶ Nànbiiselili wi a see lè, wi senyɛnw wi kùu lè, wi a woro mɛ́ɛgi le pìíw na, koro ga pye mɛ́ɛgi bee a kɔ́ pùuni Isirayɛli ye níngi ni í.

⁷ Nǎnw bee ga pye wi ga fɔ̀lɔ bi wi senyɛnw cɔ́ɔ láa í, wi senyɛnw cɔ́ɔ a kári kěgi kpàánweele ma, wolɛɛbèle ma bi sa gi joo si jo: ‹Mii nǎnw senyɛnnɛ̀ ga fɔ̀lɔ bi wi senyɛnw mɛ́ʔɛ yìrige gi kòro Isirayɛli ye níngi ni í, wi ga fɔ̀lɔ bi mii pɔri àmɛɛ senyɛnnɛ̀ yɛlɛ bi pye lè í.›

⁸ Kěgi wólɛɛbéle a nǎnw yeri bi joo ní wi ní, wi ga sèʔê cée níì jo: ‹Mii o caa bi wi láa í.›

⁹ Lǎli bee ni wi senyɛnw cɔ́ɔ a nùuni wi na kěgi wólɛɛbéle nyɛ́nɛ na si wi taʔalagi wòlo wi tɔ́lɔgi na si tɛ́ɛrɛ sùlugu wi yɛ́ɛgi ni si syɛ́ɛnri naa joo si jo: ‹Nǎnwee wi lè wi ga fɔ̀lɔ n wi senyɛnw kpaʔa yìrige í, kánmi naa na ki yɛlɛ bi pye wi na.›

¹⁰ Mɛ́ɛgee pe a le wi na lè Isirayɛli ni, koro gi nyɛ: Nǎnwee taʔalaga pe wòlo lè, woro kpáagi.

Gee gi pari lè kàsii làla ni

¹¹ «Nànbēle siin ga wáa peyɛɛ na ni túngu, á pe wàa nibin cɔ́ɔ pan bi ba wi nǎnw yirige wi kpúmɔnfɔw kɔ́lɔ ni, ní baa wi kɔ́gi sánʔa n nǎnwee cò fɛ̀ɛri tɛ́ʔɛ na,

¹² mɔ a céw bee kɔ́lɔ ceri, mɔ a kɔ́ wi nyaa nyinimɛ wóo ní í.

Funviiw kéele jàgiw ni

¹³ «Cúlo túnmɔnyingéle féleye siin ga yɛlɛ bi pye mɔ ma mɔ gɔnvaʔagi ni í, làa í pye wogbɔɔlɔ, làa si pye wobile í.

¹⁴ Yakiriye féleye siin ga yɛlɛ bi pye mɔ kpáagi ni í, kàa í pye wogbɔʔɔ kàa si pye wobile í.

¹⁵ Cúlow tunmɔnyinnɛ li yɛlɛ lè, ní wɔ́ɔ̀ sín, loro li yɛlɛ bi pye mɔ ma. Yatimanagee gi yɛlɛ lè ní wɔ́ɔ̀ sín, koro gi yɛlɛ bi pye mɔ ma, koro ga pye táree Yawe mɔ Kolocɔlɔw a kaan mɔ ma lè, mɔ cányi í nɛʔɛ di ni.

¹⁶ Níì cán syɔ́ɔnwee wi kérigèle bee félege kpéʔele lè, wee wi námaraw kpéʔele lè, wi i nyɛ yanɔnʔɔgɔ Yawe mɔ Kolocɔlɔw ma.

Amalɛki ye kálagili syɛ́ɛnrɛ

¹⁷ «Lǎli ni yele yiri Ezyipiti ni ni maa lè, gee Amalɛki ye kpéʔele mɔ na kólogi na lè, sɔ̀ngi mi taa gi na.

¹⁸ Pe n pan n baa mɔ fàra kólogi na, níì mɔ kadoʔo ma wóbèle kálagi, poro bele myɛ pe da kòro kàdoʔo ma lè wozanbèle, bi gi taa mɔ maa tɔ̀nɔ n fɔ̀rɔ, a mɔ bárigaw kwɔ́ɔ. Pe ga téè fyáa Kolocɔlɔɔ na í.

¹⁹ Lǎli ni Yawe mɔ Kolocɔlɔw ga mɔ syɔɔ mɔ nígoobèle myɛ ma, bele be mɔ màʔa lè, níì ŋɔ́ndaala kaan mɔ ma tári ni, dee Yawe mɔ Kolocɔlɔw a kaan mɔ ma lè kɔrigɔ, mɔ í di syɔɔ taa, mɔ a Amalɛki ye kwɔ́ɔ bi be kéeli sɔ̀ngudaara yirige nyɛ̀ʔɛni láara ni, mɔ a kɔ́ fɛ̀ʔɛ gee bee na í.