Làlwaw Kaanziin 24 - Cebaara Bible 2010

Céwee be yaʔa lè

¹ «Nàɔn ga cɔlɔɔ láa n wi pɔri, ní baa gi nyaa wi kéeli ga níì woro dɛ́nɛ í, níì cán wi n yarigaa nyaa wi na, gee gi lè ki ga yɛlɛ woro ma í, wi a ceyaʔa-sɛ́bɛ sɛ́bɛ wi kéeli na, wi ga wi le wi kɔ́gi ni n kwɔ́ɔ, wi a wi yirige woro kpáagi ni bi tórigo.

² Lǎli ni wi ga yiri nǎnw tɛ́ʔɛ ni n kári lè, ní sáà pye nànwaa nikwɔɔ cɔ́ɔ,

³ wi kéeli ga pye li ga ní baa nànziin wów bee dɛ́nɛ í, a wi ceyaʔa-sɛ́bɛ sɛ́bɛ n le wi kɔ́gi ni, níì wi yirige woro kpáagi ni n yaʔa, wàlá nànziin wów bee wi wi láa lè, woro ga kùu,

⁴ lǎli bee ni nànzeliw wi wi yaʔa lè, woro a ní gbǎn wi láa wi cɔɔ̀ wi nɔ́nʔɔni kàdoʔo ma í. Níì cán gee bee i nyɛ yanɔnʔɔgɔ Yawe nyɛ́nɛ na, mɔ si ga yɛlɛ bi tári lége kapeele ni í, dee Yawe mɔ Kolocɔlɔw a kaan mɔ ma lè kɔrigɔ.

Nǎnwee wi cèpɔrigɔ kpéʔele lè kavɔn

⁵ «Nàɔn ga cèpɔrigɔ kpéʔele kavɔn lǎli ni lè, wi a kári sùlasiire na í. Pe a kɔ́ wi ŋàʔana keelaa faala na í. Wi a kòro wi kpaʔa ma yɛɛbolo fúngo ni, koro ga pye céwee wi láa lè, wi fundaanra kaan wi ma.

Yasyɔɔ-mí-tɛ́ʔɛri kajoolaa

⁶ «Syɔɔn a kɔ́ tírege wàlá tírebinnɛ láa fwɔɔlɔ nyɔ́ɔ ni í, níì cán ki a pye mɔ a jo sìíw tiimaa wi láa fwɔ́ɔli nyɔ́ɔ ni.

Syɛɛn-yuuri kéele

⁷ «Nànwaa ga nyaa, wee wi wi senyɛnnɛ̀ yùu lè Isirayɛli ye ni n wi pye puloo wàlá n wi pára, pe a kàyuuw bee kpóo. Kánmi bee na mɔ a kapeegi kwɔ́ɔ bi yirige yele níngi ni.

Yaanyɛɛnmi kéele

⁸ «Da kɔ̀rɔsíi yaanyɛɛnmi kéele na koro ga pye gee myɛ na sáriga-wòlobèle yele tama lè, pe lè Levii ye, yele í gi sámaga cò, sáā gi kpéʔele. Gee mii joo n gbàn be ma lè, ye gi sámaga ye cò, yáā gi kpéʔele.

⁹ Gee Yawe mɔ Kolocɔlɔw kpéʔele Miriyami na lè kólogi na, lǎli ni yele yiri Ezyipiti ni lè, sɔ̀ngi mi taa gi na.

Yasyɔɔ-mí-tɛ́ʔɛri kajoogèle kèle níìgēle

¹⁰ «Mɔ ga yariga o yariga fwɔ́ɔlɔ le mɔ syɛɛnnyɛnnɛ na, mɔ ban wi a sa jée wi kpáagi ni bi yarigaa láa fwɔ́ɔli lariga ni í.

¹¹ Mɔ a sa yére kàfugi na, syɔ́ɔnwee na mɔ fwɔ́ɔli le lè, wee bee a yiri ní yárigi ní, gee wi a yaʔa mɔ taana lè fwɔ́ɔli lariga ni, bi ba kaan mɔ ma.

¹² Syɔ́ɔnw bee ga pye fɔ̀ngɔfɔlɔ, gee wi yaʔa mɔ taana lè fwɔ́ɔli lariga ni, ki ga yɛlɛ gi syɔ́ɔn mɔ taana í.

¹³ Cángi ga jée, yárigi mɔ syɔɔ wi ma lè fwɔ́ɔli lariga ni, ki lúrugo mi kaan wi ma, koro ga pye wi sínɛ ní wi búrogbɔɔgi ní, si dùba kpéʔele mɔ ma. Gee bee a córo mɔ ma sínnɛ kapyele Yawe mɔ Kolocɔlɔw yɛ́ʔɛ ma.

Gee gi yɛlɛ kaa kpéʔele foomɔfɔbèle ma lè

¹⁴ «Foomɔfɔ-sàrana-falipyeo ga pye mɔ ma, wee wi fɔ̀n lè a wi i nyɛ mɔ senyɛnwaa yoo, a wi i nyɛ nibɔnwaa, bele be nyɛ ní mɔ ní lè mɔ tári ni yoo, mɔ a kɔ́ mɔ fangi gbàn wi na í.

¹⁵ Mɔ a wi cángi sàra kaan wi ma sáni cángi í jée lè. Níì cán fɔ̀ngɔfɔlɔ wii, wi fúngi n wári wi sàraw kurugo, kapye koro ban í, wi a kɔ́ ra yákpoli wáa Yawe kurugo ní mɔ mɛ́ɛgi ní, mɔ si a kapeele taʔa miyɛɛ na.

Wàa kapeele a kɔ́ taʔa wàa na í

¹⁶ «Pe a kɔ́ ra tofɔbèle kúu be jáabèle kéele na í, pe a wɔ́ɔ kɔ́ ra jaafɔbèle kúu be tóobèle kéele na í. Pe a syɔɔn o syɔɔn kpóo wi kapeeli kéele na.

Foomɔfɔbèle nyɔɔmɔ kéele

¹⁷ «Mɔ a kɔ́ nibɔɔn wàlá círio kútii kálagi í. Mɔ a kɔ́ lɔgucaa búrogo syɔɔ wi ma bi tɛ́ʔɛ fwɔɔlɔ lariga ni í.

¹⁸ Sɔ̀ngi mi taa gi na mi cán mɔ maa pye puloo Ezyipiti ni, á Yawe mɔ Kolocɔlɔw mɔ yirige yaà. Koro na mii tundunri naa nyuu ni gbàngí mɔ ma níì jo mɔ í da di kpéʔele.

¹⁹ Lǎli ni mɔ ga mɔ ségi yaliire láa lè, níì fɛ̀ʔɛ yaliipwɔɔlaa na ségi ni, mɔ a kɔ́ lúru sa li láa í. Lee bee a pye nibɔnw, ní círiw, ní lɔgucew wólo. Koro ga pye Yawe mɔ Kolocɔlɔw í dùbaw taʔa mɔ kɔ́yi fáli myɛ na.

²⁰ Mɔ ga ni mɔ olivye tíiri nyàʔará, wozanw wi ga kòro lè, mɔ a ní kɔ́ wee bee cɔɔ í. Woro a kòro nibɔnw, ní círiw, ní lɔgucew wóo.

²¹ Mɔ ga ni mɔ ɛrɛzɛnw cɛnɛ, mɔ a ní kɔ́ lúru bi ɛrɛzɛnkɔri caa, dee di kòro lè í. Dee bee a pye nibɔnw, ní círiw, ní lɔgucew wóro.

²² Da sɔ̀ngí maa taagi gi na mi cán mɔ maa pye puloo Ezyipiti tári ni. Koro na mii tundunri naa nyuu ni gbàngí mɔ ma níì jo mɔ í da di kpéʔele.