Làlwaw Kaanziin 23 - Cebaara Bible 2010

¹ Nàɔn a kɔ́ wi toò cɔ́ɔ láa í, wi a kɔ́ sínɛ ní wi tóow cɔ́ɔ ní í.

Wee wi lè wi ga yɛlɛ bi jée Yawe syɛɛnkpoʔolomi ni í

² «Wee jɔbiiye yi jaa lè, wàlá wi nǎnmi ga ceri, wi ga yɛlɛ wi jée Yawe syɛɛnkpoʔolomi ni í.

³ Pìíwee be see kanɔnʔɔrɔ na lè, wi ga yɛlɛ wi jée Yawe syɛɛnkpoʔolomi ni í, àlí wi yìrigèle kɛɛ wówaa a jée Yawe syɛɛnkpoʔolomi ní í.

⁴ Amɔn ye wóo wàlá Mowabi ye wóo a jée Yawe syɛɛnkpoʔolomi ni í, àlí pe yìrigèle kɛɛ wówaa a tée jée Yawe syɛɛnkpoʔolomi ni í.

⁵ Níì cán lǎli ni yele yiri Ezyipiti ni ni maa kólogi na lè, pe ga baa yele fàra ní yaliire, ní lɔ̀ʔɔ ní í, ní àmɛɛ be kári lè Petɔɔri ma gi nyɛ lè Mezopotamii ni n sáà Beyɔɔri jáaw Balaami láa wáli na mɔ kánmi na lè wi ba mɔ dánga.

⁶ Kàjáa Yawe mɔ Kolocɔlɔw ga fɔ̀lɔ n lóʔo Balaami ma í, a Yawe mɔ Kolocɔlɔw dángaw kàriga n pye dùba mɔ ma. Níì cán mɔ kéeli n Yawe mɔ Kolocɔlɔw dɛ́nɛ.

⁷ Mɔ wéemi làla myɛ ni mɔ a kɔ́ ra sɔ̀ngí be yɛɛ̀nyinge wàlá be nyɔɔmɔ kéele na í.

⁸ Mɔ a kɔ́ ra Edɔmi ye wóo córo yanɔnʔɔgɔ í, níì cán mɔ senyɛnnɛ̀ wii. Mɔ a kɔ́ ra Ezyipiti ye wóo córo yanɔnʔɔgɔ í, níì cán mɔ maa pye wodɛ́ɛɔn ní be tári ni.

⁹ Pe yìrigèle taanri piiseebéle a gbǎn jée Yawe syɛɛnkpoʔolomi ni.

Tɛɛkòrogi sámaga-nyɔɔnɔ kéele

¹⁰ «Lǎli ni mɔ ga yiri n sáà tɛ́ɛn mɔ nígoobèle taana kapɛɛnnɛ kánma na lè, maa miyɛɛ kɔ̀rɔsíi yapeeri myɛ na.

¹¹ Yébilige nɔ́nʔɔrɔ ga pye nanwaa na mɔ tɛ́ɛgi ni, wi a yiri tɛɛkòrogi ni, wi a kɔ́ lúru jée yaà í.

¹² Ki ga pye cângwɔɔgi nyɔ́ɔ na wi a wéli lɔ̀ʔɔ ni, cángi ga jée wi a gbǎn lúru jée tɛɛkòrogi ni.

¹³ Tɛɛgaa a pye yaà mɔ ma tɛɛkòrogi kàdoʔo ma kɔlɔ̀ na, nɛɛ bee mɔ a ra wɛ̀ɛ́.

¹⁴ Yatugugo n yɛlɛ gi pye mɔ túgori ni, mɔ ga naà wàli mɔ í weʔe túgu ní gi ní, mɔ ga kwɔ́ɔ mɔ í mɔ fíri tɔ́n.

¹⁵ Níì cán Yawe mɔ Kolocɔlɔw i sɔ̀lɔ́ ni máari mɔ tɛɛkòrogi nínge ni bàā mɔ syoo, sáā mɔ nigoobèle nii mɔ kɔ́yi ni. Koro na mɔ tɛɛkòrogi n yɛlɛ gi pye yacanga, koro ga pye Yawe a kɔ́ yanɔnʔɔgɔ nyaa mɔ tɛ́ɛgi ni si wàli bi láʔa mɔ na í.

Púlowee wi fàn lè

¹⁶ «Púlowee wi fàn n yiri wi kàfɔw tɛ́ʔɛ ni n baa jée mɔ ma lè, mɔ a kɔ́ wi le wi kàfɔw kɔ́yɔ ni í.

¹⁷ Wi a tɛ́ɛn ní mɔ ní yele níngi ni bi fuguri, tɛ́ɛgee ni wi ga nyɛ́nɛ n wòlo lè mɔ kegaa ni, gee wi nyaa a gi yɛlɛ woro ma lè. Mɔ a kɔ́ mɔ fangi gbàn wi na í.

Yasungbaayi kanɔnʔɔbyere kéele

¹⁸ «Yasungbaʔa nanjaaɔ faala ga yɛlɛ bi nyaa Isirayɛli calipiigèle nínge ni í, yasungbaʔa cecaaɔ faala ga yɛlɛ bi nyaa Isirayɛli nànbiigèle nínge ni í.

¹⁹ Mɔ a kɔ́ pan Yawe mɔ Kolocɔlɔw kpaʔa ma ní nànjaacɔɔ̀ yakanʔa ní í, wàlá ní pɔnbɔlɔ sàra ní nyɔɔfaliga wololo kéele na í, níì cán kérigèle bee i nyɛ yanɔnʔɔgɔ Yawe mɔ Kolocɔlɔw ma.

Fwɔɔleri tɔ̀nɔcaara kéele

²⁰ «Mɔ a kɔ́ fwɔɔlɔ le mɔ senyɛnnɛ̀ na sáā tɔ̀nɔ caa li ni í, a ki i nyɛ wáli wólo yoo, yaliire wólo yoo, wàlá yárigee faala fwɔ́ɔlɔ syɔɔn nii lè tɔ̀nɔ kéele na.

²¹ Mɔ a gbǎn fwɔɔlɔ le táraa nikwɔɔ syɔ́ɔn na si tɔ̀nɔ syoo wi ma. Kàjáa mɔ a ra tɔ̀nɔ caa fwɔ́ɔli ni mɔ senyɛnnɛ̀ ma í. Koro ga pye táree ni mɔ a jée lè bi di syɔɔ taa, Yawe mɔ Kolocɔlɔw í dùbaw taʔa mɔ fáliw myɛ na.

Nyɔɔfaliyi kéele

²² «Mɔ ga nyɔɔfaliga kpéʔele Yawe mɔ Kolocɔlɔw ma, mɔ a kɔ́ mɔn ní gi foroli ní í. Níì cán Yawe mɔ Kolocɔlɔw a ba mɔ yíbe gi kéeli na. Mɔ si a kapeele taʔa miyɛɛ na.

²³ Mɔ ga pye mɔ ga nyɔɔfaliga kpéʔele í, mɔ ga kapeele pye í.

²⁴ Kàjáa gee ki ga yiri mɔ nyɔ́ɔgi ni lè, ki cò mí gi kpéʔele mi foro bi yɛlɛ ní nyɔɔfaligi ní mɔ kɔ̀rirɔ n kpéʔele Yawe mɔ Kolocɔlɔw ma lè ní mɔ nyɔ́ɔgi ni.

Yasanraa cɔɔlɔ tanʔa kéele

²⁵ «Mɔ ga jée mɔ syɛɛnnyɛnnɛ ɛrɛzɛn séʔe ni, mɔ a gbǎn ɛrɛzɛnwaa lìi bi tín àmɛɛ ki mɔ dɛ́nɛ lè, kàjáa mɔ a kɔ́ wàa le mɔ yalegi ni í.

²⁶ Mɔ ga jée mɔ syɛɛnnyɛnnɛ yaliilɛɛgwɔɔrɔ ni, mɔ a gbǎn yaliikanyaa cɛnɛ ní mɔ kɔ́gi ní kàjáa mɔ a kɔ́ kɔnigɔ le mɔ syɛɛnnyɛnw yaliilɛɛgwɔɔrɔ ni í.