Làlwaw Kaanziin 22 - Cebaara Bible 2010

Da mɔ syɛɛnnyɛnw kɔ́lɔ yárira jàtée

¹ «Mɔ senyɛnnɛ̀ nɔ̀ɔ wàlá wi byà wàlá wi sikaà ga pùuni, á mɔ wi nyaa, mɔ a kɔ́ gi pye mɔ a jo mɔ ga wi nyaa í, wi kɔ́ri mi ba kaan mɔ senyɛnw ma.

² Mɔ senyɛnw tɛɛkòrogo ga pye ki o nyɛ mɔ wógi taana í, wàlá kapye mɔ ga wi cán í, maa syée ní yaweeli ní mɔ kpaʔa ma, mi sa li yaʔa yaà. Li a kòro yaà mɔ tɛ́ɛgi ni bi taa mɔ senyɛnw í pan li kurugo. Lǎli bee ni mɔ a li kaan wi ma.

³ Koro wonijangi mɔ a kpéʔele wi jòfaniw kéele na, ní wi búrogi kéele na. Koro wonijangi mɔ a ra kpéʔele mɔ senyɛnw yapuunuro myɛ kéele na, dee ti ga pùuni wi ma lè, á mɔ di nyaa, mɔ a kɔ́ gi pye mɔ a jo mɔ ga di nyaa í.

⁴ Mɔ ga mɔ senyɛnnɛ̀ jòfani wàlá wi nɔ̀ɔ nyaa a wi too kólogi ni, mɔ a kɔ́ gi pye mɔ a jo mɔ ga wi nyaa í, wi dɛ̀ɛmɛ ye wi yìrige.

Làlwa kérigèle kèle

⁵ «Cɔlɔɔ a kɔ́ nàɔn yalere le í, nàɔn a wɔ́ɔ kɔ́ cɔlɔɔ yalere le í. Syɔ́ɔnwee faala wi ga ni gee bee kpéʔele lè, wi i nyɛ yanɔnʔɔgɔ Yawe mɔ Kolocɔlɔw ma.

⁶ Mɔ ga féjɛɛn-zyàara fàra n nyaa mɔ kólogi na tiige ni wàlá tári na, féjɛɛnbiiye wàlá féjɛɛn-jɛ̀nɛ si i nyɛ di ni, á féjɛɛnnɔɔw si i nyɛ wozinɛɔ ní féjɛɛnbiiyi wàlá féjɛɛn-járigèle na, mɔ a kɔ́ féjɛɛnnɔɔw pínɛ cò ní pìíbèle ní í.

⁷ Mɔ a féjɛɛnnɔɔw yaʔa waa syée si pìifaliyi yagana wòlo, koro ga pye mɔ í kòro fundaanra na, si mɔ siiw canya kaan yi nɛʔɛ.

⁸ Mɔ ga kpaafɔngɔ faan, mi gunbiige faan kpáagi ǹjoʔo ni mi gi màʔa, koro ga pye mɔ a kɔ́ sìsyaan wolo kapeele yaʔa li nan mɔ kpáagi na í, gee bee n jo wàa ga láʔa yaà ki ǹjogi ni n baa too.

⁹ Mɔ a kɔ́ lùguzíi feleye siin lùgu mɔ ɛrɛzɛn ségi ni í, mɔ ga koro pye, lùguzíiwee féleye mɔ lùgu lè, yoro ní mɔ ɛrɛzɛnw yasanra a yaʔa kɔlɔ̀ na Kolocɔlɔɔ ma.

¹⁰ Mɔ a kɔ́ náapɛɛlɛ, ní jòfani pínɛ pwɔɔ tyà nibin na bàā fála í.

¹¹ Pe ga bàsiire ní lɛn nyáʔami n fàni tìin, mɔ a kɔ́ wi búrogo le í.

¹² Búrogee mɔ a le lè mɔ a mɛnɛpiire pwɔɔ gi kàbanyi sicɛrɛ na.

Cekeeli kajoolo

¹³ «Nàɔn ga cɔlɔɔ pɔri níì sínɛ ní wi ní, ní baa gi nyaa wi kéeli ga níì woro dɛ́nɛ í,

¹⁴ wi ga fɛ̀ɛrɛ kérigèle kèle joo n taʔa wi na n wi mɛ́ɛgi kálagi, ní i gi nyuu níì jo: ‹Mii n céw naa pɔri, a mii ga baa nan wi na, mii ga wi nyaa nàngeele sinján pìcaa í.›

¹⁵ Lǎli bee ni cepiiw tóo ní wi nɔ́ɔw a wi nàngeele sinjánmi fɛ̀ɛbēle láa bi sa cariga kěgi wólɛɛbéle yɛ́ʔɛ ma kěgi kpàánweele na.

¹⁶ Cepiiw tóo a gi joo wolɛɛbèle ma si jo: ‹Mii n mii pìíw kaan nǎnw naa ma wi cɔɔ̀, wi kéeli si ga wi dɛ́nɛ í,

¹⁷ a wi si fɛ̀ɛrɛ kèlē joo n taʔa wi na níì jo: Mii ga nàngeele sinjánma fɛɛbéle nyaa mɔ piiw na í. Mii pìíw nàngeele sinjánma fɛɛbéle si be nyɛ bele.› Pé wi fàniw cariga kěgi wólɛɛbéle yɛ́ʔɛ ma.

¹⁸ Lǎli bee ni kěgi wólɛɛbéle a nǎnw cò bi kpúmɔn cama,

¹⁹ si wi kɔ́ri wi wálifiio támabéle dabata kaan pe wi kaan cepiiw tóo ma àmɛɛ wi Isirayɛli ye nàngeele sinján pìcaa mɛ́ʔɛ kálagi lè. Céw a kòro wi cɔɔ̀. Bi wi yaʔa sìi na, wi a gbǎn wi yaʔa í.

²⁰ Kàjáa kéeli bee ga nyaa kányɛʔɛ, kapye pe ga nàngeele sinjánmi fɛ̀ɛbēle nyaa cepiiw na í,

²¹ pe a wi cò bi yirige wi tóow kpaʔa kpaaweele ni, wi kěgi syɛ̀ɛnnɛ a sa wi wábagi ní kàdɛnɛri ní. Wi a kùu, níì cán wi n nɔ́nʔɔrɔ kéele kpéʔele Isirayɛli ni àmɛɛ wi kanɔnʔɔri bee pye wi tóow kpaʔa ni lè. Kánmi bee na mɔ a kapeegi kwɔ́ɔ bi yirige yele níngi ni.

²² Céwee wi pɔri n kwɔ́ɔ lè, pe ga nànwaa nikwɔɔ cò a wi sínɛ ní wi ní, pe a pe myɛ siinw kpóo, nǎnwee wi sínɛ ní céw ní lè n fàra céw na wɔ́ɔgēle. Kánmi bee na mɔ a kapeegi kwɔ́ɔ yirige Isirayɛli ni.

²³ Pìcaawee wi nyɛ lè nàngeele sinján ni, á nànwaa wi cò n kwɔ́ɔ, nànwaa nikwɔɔ ga wi fàra n nyaa kěgi ni níì sínɛ ní wi ní,

²⁴ yele a yiri ní pe myɛ siinw ní kěgi kpàánweele ma bi sa be wábagi ní kàdɛnɛri ní bi kpóo. Pe a pìcaaw kpóo, níì cán ki n pye kěgi ni, wi si ga yákpoli wáa í. Pe a nǎnw kpóo àmɛɛ wi wi syɛɛnnyɛnw cɔ́ɔ kálagi lè. Kánmi bee na mɔ a kapeegi kwɔ́ɔ yirige yele níngi ni.

²⁵ Kàjáa kapye sìnbirigi ni nǎnw pìcaaw nyaa wee wàa cò n kwɔ́ɔ lè, níì too wi na n sínɛ ní wi ní, nǎnw wi sínɛ ní wi ní lè woro nibin pe a kpóo.

²⁶ Mɔ a kɔ́ yafyɛn pye pìcaaw na í. Kapeele o nyɛ pìcaaw na n yɛlɛ ní kpóolo ní í. Kéeli bee a córo mɔ a jo nàɔn wi yìri wi nànnyɛnnɛ kurugo bi wi kpóo.

²⁷ Níì cán sìnbirigi ni nǎnw bee pìcaaw fàra n nyaa, wee wàa cò n kwɔ́ɔ lè, a pìcaaw yákpoli wáa, syɔɔfɔlɔ si ga taa wi na í.

²⁸ Nàngeele sinján pìcaawee wi lè wàa ga kɔ́ɔ̀ wi cò n kwɔ́ɔ í, nànwaa ga wi fàra n nyaa níì wi cò n sínɛ ní wi ní, á pe be nyaa,

²⁹ nǎnwee wi sínɛ ní wi ní lè, wi a wálifiio támabéle togoye siin ní kpɔrigɔ kaan pìcaaw tóo ma. Amɛɛ wi wi kálagi lè wi a wi láa wi cɔɔ̀. Bi nǎnw yaʔa sìi na, wi a ní gbǎn wi yaʔa í.