Làlwaw Kaanziin 21 - Cebaara Bible 2010

Wee be kpóo lè, wi kpóofɔw si ga cán í

¹ «Táree Yawe mɔ Kolocɔlɔw a kaan mɔ ma lè mɔ í di syɔɔ taa, syɔɔn ga nyaa wogboojáaɔn ní sìnbirige ni, wi kpóofɔw si ga cán í,

² mɔ wolɛɛbèle, ní mɔ kútiijoobèle a yiri kári bi sa kúw ní wi taana kěyi lariya tímana.

³ Pe ga baa kěgi fílige n cán, gee na kúw nùuni lè, kěgi bee wólɛɛbéle a náapyaʔa cò, gee gi lè pe ga kɔ́ɔ̀ báara ní gi ní í, zúu ga kɔ́ɔ̀ taʔa gi na í.

⁴ Kěgi bee wólɛɛbéle a tìgi ní náapyaagi ní lòcoologaa ma, gee gi lè ki o waari í, tɛ́ɛgee gi lè yafálara, wàlá yaluguro o yaà í, pe sa náapyaagi yátiiveʔeo kabi yaà beè lòcoologi lógbê na.

⁵ Lǎli bee ni sáriga-wòlobèle a pan, pe lè Levii jáabèle, níì cán poro Yawe mɔ Kolocɔlɔw nyɛ́nɛ n wòlo paa woro fáliw kpéʔele, si wɔ́ɔ ra dùbaw kpéʔele Yawe mɛ́ɛgi na. Poro pe a ra kàsiiw kèlē myɛ, ní kpàliyi kèlē myɛ nyuu da cɛnɛ.

⁶ Kěgee gi nùuni kúw na lè, kěgi bee wólɛɛbéle myɛ a be kɔ́yi jée wo náapyaagi na, gee yátiiveʔeo be kabi lòcoologi lógbê na lè.

⁷ Pe a syɛ́ɛnri naa joo si jo: ‹Wolo kɔ́yi ga sìsyaanw naa wo í, wolo nyapiigèle ga wi nyaa tɛɛwogi ni í.

⁸ Ee Yawe, mɔ syɛ́ɛnbèle kùsulugo syɔɔ, pe lè Isirayɛli ye, poro bele mɔ syɔɔ lè. Mɔ a kɔ́ tɛɛlɛ fun sìsyaanw wolo kapeele córo Isirayɛli ye na í.› Kánmi bee na sìsyaanw bee wolo kusulugo a syɔɔ be ma.

⁹ Gee gi sín Yawe nyɛ́nɛ na lè, mɔ ga koro kpéʔele, kánmi bee na mɔ a tɛɛlɛ fun sìsyaanw wolo kapeele kwɔ́ɔ bi yirige yele níngi ni.

Céwee be cò kapɛɛnnɛ na lè wi cèpɔrigi

¹⁰ «Mɔ ga yiri n kári sa kapɛɛnni kpúmɔn ní mɔ nigoobèle ní, á Yawe be le mɔ kɔ́yi ni, a mɔ be pèle cò n pye kàsolebéle,

¹¹ á mɔ cecànwaa nyaa wojobèle nínge ni, wee kéele li mɔ dɛ́nɛ lè a mɔ i caa bi wi láa mɔ cɔ́ɔ,

¹² lǎli bee ni mɔ a kári ní wi ní sa lége mɔ kpáagi ni. Wi a wi nyúngi kùnu, si wi kajinyi cɛnɛ.

¹³ Wi a wi púlori búrogo wòlo, si tɛ́ɛn mɔ kpáagi ni bi nyɛni wi tóow ní wi nɔ́ɔw kéele na yebogo fúngo ni. Koro kàdoʔo ma mɔ a náa nan wi na bi wi láa wi pye mɔ cɔ́ɔ.

¹⁴ Ki si ga baa pye wi kéeli ga níì mɔ dɛ́nɛ í, mɔ a wi yaʔa waa syée wi nyɛnɛ̀ tɛ́ʔɛ ni. Mɔ a gbǎn wi pára wáli na í, wàlá bi wi kàriga puloo í, níì cán mɔ n faʔara wáa wi na.

Jaafɔseliw kɔrilɛɛlɛ

¹⁵ «Càbala siin ga pye nànwaa ma, á wàa kéele wi dɛ́nɛ, wee kéele si ga wi dɛ́nɛ í, á be nànbiigéle see wi ma, wee wi lè wi kéeli ga wi dɛ́nɛ í, kapye woro wi nànbiiselili see,

¹⁶ wi ga ni kɔ́rigi lee wi jáabèle na, wi a kɔ́ wi cenidaanmaw pyà córo wolɛɛw í, wee wi lè wi kéeli ga wi dɛ́nɛ í, si woro wów yaʔa í, woro wee wi nyɛ lè wolɛɛw kányɛʔɛ na.

¹⁷ Kàjáa wee wi lè wi kéeli ga wi dɛ́nɛ í, woro pìíw wi a cán pìiseliw, si lɛɛgéle siin kaan wi ma wi kɔlɔ̀ yáriri myɛ ni, níì cán jaafɔw bee wi nyɛ wi fǎngi yaselige. Lɛ́ɛgi tɔ̀nɔ i nyɛ wi woò.

Pìijamaw kéele

¹⁸ «Nànbiijamaga ga pye nànwaa ma, ní i nyɛ sìnloʔoo, wee wi lè wi ga fɔ̀lɔ ni wi tóow ní wi nɔ́ɔw jóomɔ lúro í, àlí pe ga wi kpúmɔn, wi ga fɔ̀lɔ ni lúro be ma í,

¹⁹ wi tóow, ní wi nɔ́ɔw a wi cò bi yiri ní wi ní wi kěgi wólɛɛbéle ma kěgi kpàánweele ma.

²⁰ Pe a sa gi joo wi kěgi wolɛɛbèle ma si jo: ‹Wolo pìíw wi lè wee, wi i nyɛ pìijamaga, ní sìnloʔoo. Làáwologofɔlɔ, ní singbaadiɔn wii.›

²¹ Wi kěgi nànbēle myɛ a wi wábagi ní kàdɛnɛri ní bi wi kpóo. Kánmi bee na mɔ a kapeegi kwɔ́ɔ bi yirige yele níngi ni. Isirayɛli ye myɛ a gee bee lóʔo si fyáa.

Wee be cɔ̀rɔ tiige na lè, wi kútɔw kéele

²² «Pe ga syɔɔn kpóo, wee kolomɔ kapeele li da pye lè kùu wólo, á mɔ wi cɔ̀rɔ tiige na,

²³ wi kútɔw a kɔ́ syɔ́ɔn tíigi na í, kàjáa mɔ a wi tɔ́n cángi bee wonijanga. Níì cán wee be cɔ̀rɔ tiige na lè, wi i nyɛ dánga yáriga Kolocɔlɔɔ ma. Táree Yawe mɔ Kolocɔlɔw a kaan mɔ ma lè kɔrigɔ, mɔ a kɔ́ di nɔ́nʔɔ í.