Làlwaw Kaanziin 20 - Cebaara Bible 2010

Làlwa kérigèle kapɛɛnkpumɔnri kéele na

¹ «Lǎli ni mɔ ga yiri lè n kári sa kapɛɛnnɛ kpúmɔn ní mɔ nigoobèle ní, ní sáà syɔɔnyɔ, ní kapɛɛnkpumɔn-wòtorobéle, ní syɛɛnnɛʔɛmɛ nyaa, bee bi nɛʔɛ n sɔ̀lɔ yele na lè, mɔ a kɔ́ fyáa be na í. Níì cán Yawe mɔ Kolocɔlɔw wi mɔ yirige Ezyipiti tári ni lè, wi i nyɛ ní mɔ ní.

² Kapɛɛnni ga nan bi yìri, sáriga-wòlow a pan ba yére bi joo ní syɛ́ɛnbèle ní.

³ Wi a gi joo si jo: ‹Isirayɛli, ki n yɛlɛ mi lóʔo. Yele i nùuní níjanʔa bi kapɛɛnni kpúmɔn ní yele nigoobèle ní. Yele bárigaw a kɔ́ kwɔ́ɔ í, yele a kɔ́ ra fɛ̀ɛgí í, yele a kɔ́ ra cɛ̀lɛ́ í, zɔ̀nviige a kɔ́ ra yele kɔɔn pe yɛʔɛ̀ ma í.

⁴ Níì cán Yawe wi lè yele Kolocɔlɔw, woro wi syée ní yele ní bi sa kapɛɛnni kpúmɔn ní yele nigoobèle ní bi kaan yele ma jàngó bi yele syɔɔ.›

⁵ Koro kàdoʔo ma sùlasiibèle kàfɔɔlɔ a gi joo syɛ́ɛnbèle ma si jo: ‹Wìí wi kpaafɔngɔ faan wi si ga kɔ́ɔ̀ gi kàlifáa Kolocɔlɔɔ ma í? Wi lúru waa syée wi kpáagi ma jàngó wi a kɔ́ sa kùu yaà kapɛɛnni séʔe ni wàa nikwɔɔ si ba gi kàlifáa Kolocɔlɔɔ ma í.

⁶ Wìí wi ɛrɛzɛn tírire cɔ́rɔ wi si ga kɔ́ɔ̀ di yasanzeliri cɔɔ í? Wi lúru waa syée wi kpaʔa ma jàngó wi a kɔ́ sa kùu kapɛɛnni séʔe ni wàa nikwɔɔ si ba yasanzeliri cɔɔ í.

⁷ Ba wìí wi pìcaa cò, wi si ga kɔ́ɔ̀ wi pɔri í? Ki n yɛlɛ wi lúru waa syée wi kpaʔa ma jàngó wi a kɔ́ sa kùu kapɛɛnni séʔe ni, waa nikwɔɔ si ba wi pɔri í.›

⁸ Sùlasiibèle kàfɔɔlɔ a ní wɔ́ɔ gi joo syɛ́ɛnbèle ma si jo: ‹Wìí syɔ́ɔn wi fɛ̀ɛgí a wi bárigaw kwɔ́ɔ? Ki n yɛlɛ wi lúru waa syée wi kpaʔa ma, koro ga pye wi senyɛnbèle báriga a wɔ́ɔ kɔ́ kwɔ́ɔ àmɛɛ woro wów nyɛ lè í.›

⁹ Sùlasiibèle kàfɔɔlɔ ga kwɔ́ɔ syɛ́ɛnri joolo na syɛ́ɛnbèle ma lǎli ni lè, pe a kapɛɛnkpumɔn-kùndigibéle télege syɛ́ɛnbèle nyúngo na.

¹⁰ Mɔ ga nùuni kègaa na bi kapɛɛnni kpúmɔn ní gi ní, mɔ a bɛ̀ɛlɛ kéele joo gi ma gbɛnʔɛnɛ.

¹¹ Ki syɛɛnlurugori ga pye bɛ̀ɛlɛ wóro, á gi kɔ̀riyi múgu mɔ ma, syɛ́ɛnbèle bele myɛ ga nyaa gi ni lè, mɔ a be kɔ́ri paa pɔ́rɔtɔɔ-fáliw kpéʔele mɔ ma.

¹² Ki si ga pye ki ga fɔ̀lɔ bɛ̀ɛ́li na ní mɔ ní í, níì yére kapɛɛnni kpúmɔnnɔ na ní mɔ ní, lǎli bee ni mɔ a tɛ́ɛn gi taana kapɛɛnni kánma na.

¹³ Lǎli ni Yawe mɔ Kolocɔlɔw ga gi le mɔ kɔ́yi ni lè, mɔ a ŋɔséew tɛ́ʔɛ bi gi nǎnbèle myɛ kpóo.

¹⁴ Kàjáa cébèle, ní pìíbèle, ní yaweeri, n fàra kěgi fúngo yárira myɛ na, yakoliri mɔ ga taa mɔ nigoobèle ni lè, bele Yawe mɔ Kolocɔlɔw le mɔ kɔ́yi ni lè, mɔ a di lìi.

¹⁵ Kánmi bee na mɔ a gi kpéʔele kěyi myɛ na yi léeli mɔ na lè gbanʔama, yi lè yi o nyɛ syɛɛnfeleyi naa kèyaa í.

¹⁶ Kàjáa syɛɛnfeleyi naa kèye Yawe mɔ Kolocɔlɔw a kaan mɔ ma lè yi pye mɔ kɔ́rigɔ, yala o yala li ŋɔ́ngi lè, mɔ a kɔ́ li làa yaʔa sìi na í.

¹⁷ Mɔ a tɔ̀nɔ́ yi kálagi kwɔ́ɔ péw, yi lè Hɛti ye, ní Amɔri ye, ní Kanaan ye, ní Perezi ye, ní Hɛvi ye, ní Yebusi ye, bi yɛlɛ ní gi ní àmɛɛ Yawe mɔ Kolocɔlɔw gi joo n gbàn mɔ ma lè.

¹⁸ Koro ga pye yanɔnʔɔri myɛ be kpéʔele be kolocɔlɔbèle ma lè pe a kɔ́ yele tama yele í da be tɛ́ɛlɛ í, si kapeele pye Yawe yele Kolocɔlɔw na í.

¹⁹ Lǎli ni mɔ ga tɛ́ɛn n mɔn kègaa taana lè jàngó bi too gi na bi gi syɔɔ taa, mɔ a kɔ́ kpanaga tɛ́ʔɛ bi tíiri kpúmɔn kálagi í. Mɔ a ra di yasanri líi, kàjáa mɔ a kɔ́ di kpúmɔn í. A seʔe tíige i nyɛ lé syɔɔn, mɔ í tɛ́ɛn gi taana kapɛɛnnɛ kánma na?

²⁰ Kàjáa tíiyee mɔ cán n fílige lè ncan pe o yi yasanri líi í, mɔ a gbǎn yi kpúmɔn cáan, bi tɛɛ̀lúguyo sámaga kěgi na, gee gi kapɛɛnni kpúmɔn ní mɔ ní lè fwɔɔ bi taa ki ba too.