Làlwaw Kaanziin 2 - Cebaara Bible 2010

¹ A wolo kolo n lúru n kári fìími tára ma, Nyɛ́nɛri solomɔ lɔ́ʔɔ kólogo ni, n yɛlɛ ní gi ní àmɛɛ Yawe da gi joo mii ma lè. A wolo Seyiiri nyanbeleyi kúlo màʔa canya saʔa ni.

Edɔmi, ní Mowabi, ní Amɔn tátɛɛyi sɔ́lɔgɔlɔ kéele

² «A Yawe mii pye:

³ ‹Yele n kɔ́ɔ̀ nyanbeleyi naa kúlo màʔa n yɛlɛ nya, ye lúru yaa syée solomɔkulo kàbangi na.

⁴ Syɛ́ɛnri naa joo mi gbàn syɛ́ɛnbèle ma mi be pye: Yele a sa foro yele senyɛnbèle tára ni pe lè Ezau pìíbèle, pe nyɛ lè wodɛ́ɛnbéle ní Seyiiri ni. Pe a fyáa yele na. Ki si n yɛlɛ yaa yeyɛɛ kɔ̀rɔsíi.

⁵ Yele a kɔ́ kapɛɛnnɛ kpúmɔn ní be ní í, níì cán mii a tée be táraa faala kaan yele ma í, àlí yédaala tɛɛtaʔala. Ncan mii n Seyiiri nyanbeleyi kúlo fáliga kaan Ezau ma.

⁶ Yele a yaliiri syɔɔ be ma wáli na, dee yele a lìi lè, àlí lǒgi yele a gbaa lè, wáli na yele a gi syɔɔ be ma.›

⁷ Níì cán Yawe mɔ Kolocɔlɔw n dùbaw taʔa mɔ na mɔ kɔ́yi fáli myɛ ni. Wi n mɔ kpáaw wéle mɔ tánʔani làla ni fìimɛ tákpɔɔri naa ni. Ki yɛ̀ʔɛlɛ togoye siin wi wee Yawe mɔ Kolocɔlɔw i nyɛ ní mɔ ní, yarigaa faala ga mɔ fɔ̀n í.

⁸ A wolo canʔana n sɔ̀lɔ wolo senyɛnbèle na, pe lè Ezau pìíbèle, pe nyɛ lè wodɛ́ɛnbéle ní Seyiiri ni, n wɔ́ɔ̀ canʔana n sɔ̀lɔ Araba kólogi, ní Elati, ní Esyɔn-Gebɛɛri na. Koro kàdoʔo ma a wolo kolo n sɔ̀lɔ Mowabi fìími tára kólogo ni.

⁹ A Yawe mii pye: ‹Mɔ a kɔ́ too Mowabi na í, mɔ a kɔ́ yìri wi kurugo bi kapɛɛnnɛ kpúmɔn ní wi ní í, níì cán mii a tée wi táraa faala kaan mɔ ma di pye mɔ wóro í, Lɔti pìíbèle má mii Ari kaan, gi pye be woʔò.›

¹⁰ Emii ye be sélì pye yaà booma ni. Syɛɛnkpoloyo yi pye, yee yi nɛʔɛ lè, níì tɔnɔ àmɛɛ Anaki ye nyɛ lè.

¹¹ Pe maa wɔ́ɔ ni córo Erefa wóbèle pèle àmɛɛ Anaki ye nyɛ lè, á Mowabi ye si i be yiri Emii ye.

¹² Horii ye si be pye wodɛ́ɛnbéle ní booma ni Seyiiri ni, á Ezau pìíbèle pan n baa be yirige yaà níì be kálagi peyɛɛ yɛ́ʔɛ ma, níì tɛ́ɛn be sìndɛɛgi ni àmɛɛ Isirayɛli ye wɔ́ɔ̀ gi kpéʔele lè be tári kéele na, dee Yawe kaan be ma lè.

¹³ Tɔ́ɔliw ni, ye yìri ye sa Zeredi lòcoologi jeli. A wolo sáà Zeredi lòcoologi jeli.

¹⁴ Lǎlee wolo kwɔ́ɔ tánʔani na lè n yìri Kadɛsyi-Barineya ma n taa n sáà Zeredi lòcoologi jeli lè, li n pye yɛ̀ʔɛlɛ toko ní kpɔrigɔ ní kɔrɔtaanri, fwɔɔ n taa yìrili bee syɛ̀ɛnnɛ be pye lè kapɛɛnkpumɔnbèle, a poro kwɔ́ɔ n yiri tɛɛkòrogi ni àmɛɛ Yawe da kàli be ma lè.

¹⁵ Yawe maa wɔ́ɔ̀ kɔlɔ̀ taʔa be na bi be láʔa yaà tɛɛkòrogi ni fwɔɔ bi taa pe ba kwɔ́ɔ péw.

¹⁶ Lǎli ni kùúw kapɛɛnkpumɔn-nǎnbèle myɛ kwɔ́ɔ n yirige syɛ́ɛnbèle nínge ni lè,

¹⁷ a Yawe gi joo mii ma níì jo:

¹⁸ ‹Mɔ a sɔ̀lɔ Mowabi tári láʔagologo na níjanʔa, Ari ma.

¹⁹ Mɔ a nùuni Amɔn ye na, mɔ si a kɔ́ too be na í, mɔ a kɔ́ kapɛɛnnɛ kpúmɔn ní be ní í. Níì cán mii a tɛʔɛ̀ faala kaan mɔ ma gi pye mɔ wóʔo Amɔn ye tári ni í, Lɔti pìíbèle má mii di kaan di pye be worò.›

²⁰ Tɛ́nɛmi bee maa wɔ́ɔ ni córo Erefa ye tára. Erefa ye be pye yaà wodɛ́ɛnbéle ní booma ni. Amɔn yé si i be yiri Zamizumi ye.

²¹ Pe maa pye syɛɛnkpoloyo, níì nɛʔɛ, níì tɔnɔ àmɛɛ Anaki ye nyɛ lè. A Yawe be kálagi Amɔn ye yɛ́ʔɛ ma. Pe n be yirige yaà níì tɛ́ɛn pe sìndɛɛgi ni.

²² Kánmi bee na Yawe gi kpéʔele Ezau pìíbèle ma be nyɛ lè wodɛ́ɛnbéle ní Seyiiri ni, lǎli ni wi Horii ye kálagi lè pe yɛʔɛ̀ ma. Pe n be yirige yaà níì tɛ́ɛn pe sìndɛɛgi ni fwɔɔ n baa nan níjanʔa na.

²³ Avii ye be pye lè wodɛ́ɛnbéle ní kèpiigèle ni fwɔɔ n sáà nan Gaza na, Kafitɔri ye be yiri Kafitɔri ni lè, a poro pan n baa be kálagi n yirige yaà níì tɛ́ɛn pe sìndɛɛgi ni.

²⁴ Ye yìri yaa syée ye sa Arinɔn lòcoologi jeli. Wéle, mii n Hɛsyibɔn fànʔafɔw Sihɔn ní wi tári le mɔ kɔ́yi ni, wi lè Amɔri ye wów. Séli tɔ́ɔliw ni mi di syɔɔ mi taa, yìri wi kurugo mi kapɛɛnni kpúmɔn ní wi ní.

²⁵ Mii a séli níjanʔa na bi mɔ fyáari cáan syɛɛnfeleyi na yi nyɛ lè nyɛ̀ʔɛni myɛ láara ni, yi a ra fɛ̀ɛgí mɔ na. Mɔ mɛ́ɛgi lóʔolo a yi kaan yaa cɛ̀lɛ́, yi fúnyi si curugo mɔ yɛ́ʔɛ ma.

Sihɔn fǎngi syɔɔlɔ kéele

²⁶ «A mii si tundunbéle yìrige Kedemɔti fìími tára ni n tun Hɛsyibɔn fànʔafɔw Sihɔn ma ní bɛ̀ɛlɛ syɛ́ɛnrɛ ní níì jo:

²⁷ ‹Mii i caa bi foro mɔ tári ni, kogbɔɔgi ni mii a sɔ̀lɔ yagana. Mii a wàli bi kári kàliige, wàlá kàmɔnɔ ma í.

²⁸ Mɔ a yaliiri pára mii ma wáli na, dee mii a lìi lè, si wɔ́ɔ lǒgi pára mii ma wáli na, gee mii a gbaa lè. Mii a tánʔa sɔ̀lɔ wii tɔlɔyɔ na yagana,

²⁹ fwɔɔ bi taa mii í Zyuridɛnw jeli bi jée tári ni, dee Yawe wolo Kolocɔlɔw kaan wolo ma lè. Ezau pìíbèle be lè wodɛ́ɛnbéle ní Seyiiri ni, ní Mowabi ye be nyɛ lè wodɛ́ɛnbéle ní Ari ni, kánmi bee na poro gi kpéʔele mii ma.›

³⁰ Kàjáa Sihɔn wi lè Hɛsyibɔn fànʔafɔw, wi ga fɔ̀lɔ wolo í sɔ̀lɔ woro ma í. Níì cán Yawe mɔ Kolocɔlɔw maa wi fúngi gbàn, ní wɔ́ɔ̀ wi líiweeli pɛɛn, koro ga pye woro í wi le mɔ kɔ́yi ni, àmɛɛ mɔ gi nyaa lè níjanʔa.

³¹ A Yawe mii pye: ‹Wéle, mii n Sihɔn, ní wi tári le mɔ kɔ́yi ni n séli tɔ́ɔliw naa ni. Ye séli yaa wi tári syoo di pye yele wóro.›

³² A Sihɔn yiri ni wolo fàrá ní wi syɛ́ɛnbèle myɛ ní bi ba kapɛɛnni kpúmɔn ní wolo ní Yahasi ni.

³³ A Yawe wolo Kolocɔlɔw wi le wolo kɔ́yi ni. A wolo wi jáa, woro ní wi jáabèle, ní wi syɛ́ɛnbèle myɛ ní.

³⁴ A wolo si wi kěyi myɛ nɛnɛ n syɔɔ lǎli bee ni, níì yi fúnyi syɛ̀ɛnnɛ myɛ kálagi péw, nǎnbèle, ní cébèle, ní pìíbèle, wolo ga pe wàa nibin yaʔa a wi syɔɔ í.

³⁵ Kěyi wolo syɔɔ n taa lè, a wolo yi yaweeri, ní yi lɔ́ri yagana koli n pye woyɛɛ wóro.

³⁶ N séli Aroyɛɛri na, Arinɔn lòcoologi nyɔ́ɔ na, ní jǐnlɔgi tɛ́ʔɛ kàʔa na, fwɔɔ n sáà láʔa Galaadi na, kègaa faala ga pye yaà, gee gi nìri n sɔ̀lɔ wolo na lè í. Yawe wolo Kolocɔlɔw n yi myɛ le wolo kɔ́yi ni.

³⁷ Kàjáa mɔ ga nùuni Amɔn jáabèle tára na í, wàlá Yabɔki lòcoologi nyɔ́ɔ tɛ́ɛyɛ myɛ, ní nyanbeleyi kúlo kèye na í, n fàra tɛ́ɛyi na, yee kéele Yawe wolo Kolocɔlɔw da joo n gbàn lè níì jo mɔ í yi yaʔa.