Làlwaw Kaanziin 19 - Cebaara Bible 2010

Kàsuro-jée-kèye kéele

¹ «Lǎli ni Yawe mɔ Kolocɔlɔw ga sáà syɛɛnfeleyi kwɔ́ɔ n yirige yaà lè, yoro yee tára Yawe mɔ Kolocɔlɔw a kaan mɔ ma lè, lǎli ni mɔ ga yi nɛnɛ n yirige yaà lè níì tɛ́ɛn yi kěyi, ní yi kpáayi ni,

² mɔ a kèye taanri wòlo bi yaʔa kɔlɔ̀ na miyɛɛ ma tári nínge ni, dee Yawe mɔ Kolocɔlɔw a kaan mɔ ma lè mɔ í di syɔɔ taa.

³ Mɔ a koloyo wòlo bi mɔ tári tásaliga jaa tɛɛyɛ taanri, dee Yawe mɔ Kolocɔlɔw a kaan mɔ ma lè kɔrigɔ, koro ga pye syɔɔn o syɔɔn wi ga wi syɛɛnnyɛnnɛ kpóo lè, wi gbǎn fàn bi kári kěgi bee kàa ma.

⁴ Kánmi naa na gi yɛlɛ bi pye syɔɔn ma, wee wi ga syɔɔn kpóo lè si fàn bi sa jée yaà bi wi sìíw syɔɔ, kapye wi fòʔo n wi kpóo wii bi gi taa wi kéeli da séli wi bɛɛn í.

⁵ Nàɔn ní wi syɛɛnnyɛnnɛ ga pínɛ n jée kɔligɔ ni bi sa tiire kpúmɔn, àmɛɛ wi kɔ́gi tɛ́ʔɛ n kpánagi cò ni tíigi kpúmɔn lè, kpanabiiw ga fòri n yiri kotinni ni n wi syɛɛnnyɛnw kpúmɔn a wi kùu, syɔ́ɔnw bee a fàn bi kári kěgi bee kàa ma bi taa syɔɔ.

⁶ Jàngó sìsyaanw wolo gɔlɔ́-wòloo fundanʔagbɔ́ɔrɔtɔw a kɔ́ taʔa wi na bi sa wi nɛnɛ cò kólogi na kólogi tɔnɔnɔ kéele na bi wi kpúmɔn kpóo í, bi gi taa syɔ́ɔnw bee da yɛlɛ pe wi kpóo í, níì cán wee wi kpóo lè, wi kéeli da wi bɛɛn í.

⁷ Koro na mii n gi joo n gbàn mɔ ma níì jo mɔ í kèye taanri wòlo bi yaʔa kɔlɔ̀ na miyɛɛ ma.

⁸ Yawe mɔ Kolocɔlɔw ga mɔ láʔagoloyi lúrugo kàdoʔo ma àmɛɛ wi da gi joo mɔ tofɔlɛɛyi ma ní kàliga ní lè, wi ga tári myɛ kaan mɔ ma, dee nyɔ́ɔ wi da fàli níì jo woro a di kaan mɔ tofɔlɛɛyi ma lè,

⁹ mɔ si tɛ́nɛ kajoodɛɛngèle naa myɛ cò sáā ge kpéʔele, gele mii nyuu mɔ ma lè níjanʔa, si tàmaga le ní mɔ Kolocɔlɔw ní, sáā wi kóloyi myɛ táanri canʔa o canʔa, mɔ a ní kèyaa taanri taʔa miyɛɛ ma yee taanri na.

¹⁰ Kánmi bee na tɛɛlɛ fun sìsyaan a wo mɔ tári ni í, dee Yawe mɔ Kolocɔlɔw a kaan mɔ ma lè di pye mɔ kɔ́rigɔ. Sìsyaan wolo yakɛɛ si a kɔ́ pye mɔ na í.

¹¹ Kàjáa nàɔn syɛɛnnyɛnnɛ kéele ga wi bɛɛn, á wi sáà làra n wi sige, níì yìri wi kánmi na n wi kpúmɔn kùumɔ, a wi zǐn kùu, syɔ́ɔnw bee ga fàn n kári kěgi bee kàa ma,

¹² wi kěgi wólɛɛbéle a tun be sa wi cò bi pan ba le sìsyaanw wolo gɔlɔ́-wòloo kɔ́yɔ ni, koro ga pye wi kùu.

¹³ Mɔ a kɔ́ wi nyaa nyinimɛ wóo ní í. Mɔ a tɛɛlɛ fun syɔ́ɔnw sìsyaan wolo kapeele kwɔ́ɔ yirige Isirayɛli ni, mɔ si pye fundaanra na.

Tálɛɛgèle láʔagéle kéele

¹⁴ «Táree Yawe mɔ Kolocɔlɔw a kaan mɔ ma lè mɔ í di syɔɔ taa, bi mɔ yaʔa kɔ́rigi bee ni, mɔ a kɔ́ mɔ syɛɛnnyɛnw láʔagologo kàriga í, gee mɔ wolɛɛbèle kúun lè.

Séerafɔbèle kéele

¹⁵ «Séerafɔlɔ nibin a gbǎn yìri bi sɔ́ɔn syɔɔnwaa na wi kolomɔ wàlá kapeʔe wàlá kapeelaa faala kéele na wi kpéʔele lè í. Séerafɔɔlɔ siin wàlá taanri syɛɛnjóoro báriga ni keele o keele a náa tɛɛ̀yérege wòlo.

¹⁶ Jànvaa séerafɔlɔ ga yìri syɔɔnwaa kánma na n sɔ́ɔn wi na níì jo wi n kapeele kpéʔele,

¹⁷ syɛ́ɛnbèle bele siin nínge ni kakabalagi pye lè, pe a ba yére Yawe yɛ́ʔɛ ma, ní lǎli bee sáriga-wòlobēle, ní kútiijoobèle yɛ́ʔɛ ma be nyɛ lè fáliw na.

¹⁸ Kútiijoobèle a kéeli bee sámaga cɛɛlɛ bi gi cán kapye séerafɔw i nyɛ jànvaa séerafɔlɔ, ní kapye jànvaa wi joo n taʔa wi senyɛnw na,

¹⁹ lǎli bee ni gee wi da tímana bi pye wi senyɛnw na lè, ye gee bee pye wi na. Kánmi bee na mɔ a kapeegi kwɔ́ɔ yirige yele níngi ni.

²⁰ Syɛɛnsanbèle a gee bee lóʔo, sáā fɛ̀ɛgí, si láʔa kapeegi bee félege kpéʔelele na yele níngi ni.

²¹ Mɔ a kɔ́ wi nyaa nyinimɛ wóo ní í. Sìiwaa a pye sìiwaa sìndɛʔɛ ni, nyapilaa í pye nyapilaa sìndɛʔɛ ni, gǎnnaa í pye gǎnnaa sìndɛʔɛ ni. Kɔgaa í pye kɔgaa sìndɛʔɛ ni, tɔlɔgaa í pye tɔlɔgaa sìndɛʔɛ ni.