Làlwaw Kaanziin 18 - Cebaara Bible 2010

Levii yòdaʔayi lɛɛlɛ kéele

¹ «Levii ye pe lè sáriga-wòlobèle, gee bee n jo Levii syɛɛnfelegi wobogo, lɛɛlɛ wàlá kɔrigɔ a pye be ma ní Isirayɛli ye ní í. Yawe naà sárigaw, ní wi kɔ́rigi ní pe a ra peyɛɛ nyɔ́ɔyi caa.

² Kɔrigɔ a pye be ma be senyɛnbèle nínge ni í. Yawe wi a pye be kɔ́rigi àmɛɛ wi gi joo be ma lè.

³ Lɛɛlee sáriga-wòlobèle a taa lè syɛ́ɛnbèle ma, bele pe ba ni sárigaw wóo lè, nɔ̀ɔ wàlá byà wàlá sikaà wóo, loro li nyɛ lee naa: fókaangi, ní gbǎdanw, ní fungbogi.

⁴ Mɔ bileseliw ní mɔ duvɛɛnfɔnw wózelio, ní mɔ sinmi wózelimɛ, n fàra mɔ yaweeyiligèle síicɛnɛrɛ wózelire na, mɔ a toro kaan wi ma.

⁵ Níì cán woro Yawe mɔ Kolocɔlɔw nyɛ́nɛ n wòlo mɔ syɛɛnfeleyi myɛ ni, jàngó waa yèré bàā fáliw kpéʔele Yawe mɛ́ɛgi na, woro ní wi jáabèle ní làla o làla.

⁶ Ki ga Levii ye wówaa dɛ́nɛ bi yiri Isirayɛli kegaa ni, gee ni wi nyɛ lè wodɛ́ɛɔn ní bi kári tɛ́ɛgi ma, gee Yawe ga nyɛ́nɛ n wòlo lè,

⁷ wi ga sa ni báara Yawe wi Kolocɔlɔw mɛ́ʔɛ na àmɛɛ Levii ye wozanbèle myɛ gi kpéʔele lè, pe lè wi senyɛnbèle, poro bele be yèré yaà lè Yawe yɛ́ʔɛ ma,

⁸ wi yaliiri lɛɛlɛ a pye sèjira ní be wóli ní. N fàra koro na, wi ga wi kɔlɔ̀ yarigaa pára, wáliw bee a pye wi woò.

Kanyaajoo-fáanabèle ní kanyaajootelebèle kéele

⁹ «Táree Yawe mɔ Kolocɔlɔw a kaan mɔ ma lè, lǎli ni mɔ ga sáà jée di ni lè, mɔ a kɔ́ syɛɛnfeleyi bee yanɔnʔɔrɔ félege tama bàā kpéʔele í.

¹⁰ Bele pe be nànbiigèle wàlá be calipiigèle sórogi naà ni lè, pe wàa ga yɛlɛ wi nyaa yele níngi ni í, ní wee wi kanyaari fáli kpéʔele lè, ní cɛ́lɛfɔlɔ, ní wélefɔlɔ, wàlá wee wi dɛ̀ɛ́mi kpéʔele lè,

¹¹ ní kpàanwáaɔ, ní wee wi màdebèle yíbe lè, ní wee wi nyɛ̀ʔɛna kérigèle nyaagi ni nyuu lè, ní kúyibeo, pe wàa a kɔ́ nyaa yele níngi ni í.

¹² Níì cán wee wi kérigèle bee kpéʔele lè, wi i nyɛ yanɔnʔɔgɔ Yawe ma, yanɔnʔɔri bee kéele si na Yawe mɔ Kolocɔlɔw a syɛɛnfeleyi bee nɛnɛ yirige yaà mɔ yɛ́ʔɛ ma.

¹³ Mɔ a pye tɛɛlɛ fun Yawe mɔ Kolocɔlɔw yɛ́ʔɛ ma.

¹⁴ Níì cán syɛɛnfeleyi bee mɔ a sa nɛnɛ bi yirige yaà lè, yi i kanyaari fáli kpéʔelefɔɔlɔ, ní wélefɔbèle syɛ́ɛnrɛ lúro. Mɔ si na, Yawe mɔ Kolocɔlɔw ga fɔ̀lɔ mɔ ma gee bee na í.

¹⁵ Yawe wi lè mɔ Kolocɔlɔw wi a kɔ́ ba mii félege kanyaajooo yìrige mɔ ma yele níngi ni, mɔ senyɛnbèle ni, yaa lúro wi ma.

¹⁶ Gee bee myɛ si mɔ da nyɛ́ɛri Yawe mɔ Kolocɔlɔw ma n mɔ yaʔa Horebi ma, kpóʔoroli canʔa na, àmɛɛ mɔ da ni gi nyuu lè níì jo: ‹Ki ga yɛlɛ mii í ní kòro bàā Yawe mii Kolocɔlɔw yákpolo lúro í, mii a ní wɔ́ɔ kɔ́ naakpɔɔgi bee nyaa í, jàngó mii a kɔ́ kùu í.›

¹⁷ A Yawe mii pye: ‹Gee be joo lè ki n nyɔɔ.

¹⁸ Mii a mɔ félege kanyaajooo yìrige be ma be senyɛnbèle nínge ni, mii a mii syɛ́ɛnri le wi nyɔ́ɔgi ni, gee myɛ mii ga joo n gbàn wi ma lè, wi a ba gi joo be ma.

¹⁹ Mii syɛ́ɛnri wi a ba joo lè, mii mɛ́ɛgi na, wee wi ga pye lè wi ga baa di lóʔo í, mii wi a ba syɔ́ɔnw bee yíbe kéeli bee na.

²⁰ Kàjáa kanyaajoowee wi ga wiyɛɛ gbɔ́ʔɔ lè níì syɛɛnraa joo mii mɛ́ɛgi na, dee di lè mii ban wi wi pye wi di joo í, wàlá wi ga joo kolocɔlɔbèle pèle nikwɔɔlɔ mɛ́ʔɛ na, pe a kanyaajoow bee kpóo.›

²¹ Dɔ̀ʔɔ́ mɔ a ra miyɛɛ yíbe mɔ fúngi ni si jo: ‹Kanmìí na wolo a syɛ́ɛnri cán, dee di lè Yawe ban wi di joo í?›

²² Kanyaajoowaa ga joo Yawe mɛ́ɛgi na, kéeli bee si ga nyaa í, li ga wɔ́ɔ̀ foro í, lǎli bee ni Yawe ban wi kéeli bee joo í. A kanyaajoow wiyɛɛ gbɔ́ʔɔ níì kéeli bee joo wii. Mɔ a kɔ́ fyáa wi na í.