Làlwaw Kaanziin 17 - Cebaara Bible 2010

¹ Tɛɛlɛ, wàlá tɛɛ̀kalagiga ga pye nɔ̀ɔ wàlá byà wàlá sikaà na, mɔ a kɔ́ wi wòlo sáriga Yawe mɔ Kolocɔlɔw ma í. Níì cán gee bee i nyɛ yanɔnʔɔgɔ Yawe mɔ Kolocɔlɔw ma.

² Wàa ga nyaa yele níngi ni kègaa ni, yee Yawe mɔ Kolocɔlɔw a kaan mɔ ma lè, nàɔn wàlá cɔlɔɔ, wee wi kapeʔe kpéʔele Yawe mɔ Kolocɔlɔw yɛ́ʔɛ ma lè n wi joogaanni kálagi,

³ níì kári n sa ni kolocɔlɔbèle pèle nikwɔɔlɔ kpɔ̀ʔɔrɔ́, ní i kpùmɔnɔ́ be yɛʔɛ̀ ma, ní wɔ́ɔ i kpùmɔnɔ́ cángi, wàlá yégi, wàlá nyɛ̀ʔɛni ŋɔripilaa faala yɛ́ʔɛ ma, gee gi lè mii ban wi gi joo nyáana í,

⁴ á kéeli bee baa joo a mɔ lóʔo, ki n yɛlɛ mi li sámaga mi sɛʔɛ bi gi cán kapye li i nyɛ kányɛʔɛ, kapye li n tɔ̀nɔ n kpéʔele, kapye yanɔnʔɔgi bee n pye Isirayɛli ni,

⁵ lǎli bee ni mɔ a be pye be pan mɔ kpaanweegèle ma ní nǎnw bee wàlá ní céw bee ní, wee wi kapeegi bee kpéʔele lè, yele a ba nǎnw bee wàlá céw bee wábagi kpóo ní kàdɛnɛri ní.

⁶ Pe a gbǎn syɔɔn kaan kùu ma í fwɔɔ séerafɔɔlɔ siin wàlá taanri syɛ́ɛnrɛ báriga ni, séerafɔlɔ nibin joolo a gbǎn syɔɔn yaʔa be wi kpóo í.

⁷ Séerafɔbèle kɔ́yɔ yi yɛlɛ bi séli nan wi na wi kpóoli kéele na, syɛ́ɛnbèle myɛ kɔ́yɔ si náa nan wi na. Kánmi bee na mɔ a kapeegi kwɔ́ɔ yirige yele níngi ni.

Kagbangèle kútiicerile tɛɛcǎngi ni

⁸ «Kútii kéelaa ga kpɔ́ʔɔ mɔ na, lee li lè syɛɛnkpooro wólo, wàlá sìnbɛɛlɛ wólo, wàlá kpúmɔn-mí-kpàlila wólo, lee li lè kàsii wólo mɔ kegi ni, mɔ a yìri ní kéeli bee ní bi kári tɛ́ɛgi ma, gee Yawe mɔ Kolocɔlɔw ga nyɛ́nɛ n wòlo lè.

⁹ Mɔ a kári Levii ye wóbèle ma, pe lè sáriga-wòlobèle, ní lǎli bee kútiijooo ma wi nyɛ lè fáliw na bi sa be yíbe, pe a kéeli bee ceriganma tɛ̀ɛn mɔ na.

¹⁰ Kútiiw ceriganma pe ga tɛ̀ɛn mɔ na lè tɛ́ɛgi ni, gee Yawe ga nyɛ́nɛ n wòlo lè, mɔ a gi kpéʔele bi yɛlɛ ní kánmi bee ní. Gee myɛ na pe ga mɔ tama lè mɔ a kɔ̀rɔsíi, si gi kpéʔele bi yɛlɛ ní kánmi bee ní.

¹¹ Làlwa kéelee na pe ga mɔ tama lè, ní kútii kéelee pe ga joo mɔ ma lè, mi gi kpéʔele mi yɛlɛ ní kánmi bee ní. Mɔ a kɔ́ wàli bi kári kàliige wàlá kamɔnɔ ma si kútiiw ceriganma yaʔa, bee be tɛ̀ɛn mɔ na lè í.

¹² Sáriga-wòlowee wi yèré yaà ni Yawe mɔ Kolocɔlɔw fáli kpéʔele lè, nɛ̀ɛgbɔʔɔgɔ syɔ́ɔnwee ga cée lè wi ga fɔ̀lɔ n wee bee syɛ́ɛnrɛ lóʔo í, wàlá wi ga kútiijoow syɛ́ɛnrɛ lóʔo í, pe a syɔ́ɔnw bee kpóo. Kánmi bee na mɔ a kapeegi kwɔ́ɔ yirige Isirayɛli níngi ni.

¹³ Syɛ́ɛnbèle myɛ a gee bee lóʔo sáā fɛ̀ɛgí, nɛ̀ɛgbɔʔɔgɔ a ní jée be ni í.

Gee gi joo fànʔafɔw kéele na lè

¹⁴ «Táree Yawe mɔ Kolocɔlɔw a kaan mɔ ma lè lǎli ni mɔ ga sáà jée di ni n di syɔɔ n taa níì tɛ́ɛn di ni, ní kɔ́ baa gi joo níì jo: ‹Mii i caa bi fànʔafɔlɔ télege niyɛɛ nyúngi na àmɛɛ syɛɛnfeleyi myɛ nyɛ, yee yi mii màʔa lè,›

¹⁵ fànʔafɔwee Yawe ga nyɛ́nɛ n wòlo lè, woro mɔ yɛlɛ bi télege miyɛɛ nyúngi na. Syɔɔnwaa mɔ a yirige mɔ senyɛnbèle nínge ni bi télege fànʔafɔw miyɛɛ nyúngi na. Táraa nikwɔɔ syɔ́ɔn wi lè wi o nyɛ mɔ senyɛnnɛ̀ í, mɔ a kɔ́ wee bee télege miyɛɛ nyúngi na í.

¹⁶ Wi si a kɔ́ wi syɔ́ɔnyi nɛʔɛ í, wi a kɔ́ syɛ́ɛnbèle lúrugo tórigo Ezyipiti ma jàngó bi wi syɔ́ɔnyi nɛʔɛ í. Níì cán Yawe n yele pye: ‹Yele a ní kɔ́ lúru kári kólogi bee ni nyáana í.›

¹⁷ Wi a kɔ́ wi cébèle nɛʔɛ í, koro si kɔ́ wi fúngi kàriga í. Wi a kɔ́ wi wálifiiw ní wi tɛ́ɛw nɛʔɛ í.

¹⁸ Lǎli ni wi ga tɛ́ɛn fǎngi na, wi fàngoli na lè, wi a làlwaw naa sɛ́bɛ sɛ́bɛ ni ki tɛɛyɛ siin wiyɛɛ kéeli na bi yɛlɛ ní Levii ye sáriga-wòlobèle sɛ́bɛ wóro ní.

¹⁹ Wi a wi yaʔa wiyɛɛ ma sáā wi wéle wi sìíw canya myɛ ni, koro ga pye wi Yawe wi Kolocɔlɔw yɛ́ʔɛ fyáara tama si wɔ́ɔ làlwaw naa syɛ́ɛnrɛ myɛ, ní làlwa kérigèle naa myɛ cò, sáā ge kpéʔele.

²⁰ Jàngó kpɔɔmɔ a kɔ́ jée wi fúngi ni, wi wiyɛɛ télege wi senyɛnbèle nyúngo na í, wi a kɔ́ kajoodɛɛngèle bee yaʔa si wàli bi kári kàliige wàlá kàmɔnɔ ma í, koro ga pye wi ní wi jáabèle í kòro fàngoli na Isirayɛli ni bi cannɛʔɛyɛ kwɔ́ɔ.