Làlwaw Kaanziin 15 - Cebaara Bible 2010

Fwɔ́ɔgèle yaʔala lala Isirayɛli ye ma

¹ «Yɛ̀ʔɛlɛ kɔrɔsiin o yɛ̀ʔɛlɛ kɔrɔsiin ga kwɔ́ɔ, mɔ a fwɔ́ɔgèle yaʔala kpéʔele.

² Fwɔɔyaʔari pyeganma bi nyɛ bee naa: Syɔɔn o syɔɔn wi da fwɔɔlɔ le wi syɛɛnnyɛnnɛ na lè, wi a ní kɔ́ wi syɛɛnnyɛnw, wàlá wi senyɛnw kɔ́ri wi li tɔ́n í àmɛɛ fwɔɔyaʔari kéele jáari n kwɔ́ɔ lè Yawe kéeli na.

³ Mɔ a gbǎn li jáari nibɔnw na, kàjáa mɔ yáriga o mɔ yáriga gi nyɛ mɔ senyɛnwaa ma lè, mɔ a gi yaʔa wi ma.

⁴ Koro ní ki myɛ ní fɔ̀ngɔfɔlɔ a pye mɔ ma í, níì cán táree Yawe mɔ Kolocɔlɔw a kaan mɔ ma lè kɔrigɔ, mɔ í di syɔɔ taa, wi a dùbanɛʔɛɔ taʔa mɔ na di ni,

⁵ mɔ ga tɛ́nɛ̀ fɔ̀lɔ ni Yawe mɔ Kolocɔlɔw jóomɔ lúro, níì tundunri myɛ sámaga n cò ní i di kpéʔele dee mii nyuu mɔ ma lè níjanʔa.

⁶ Yawe mɔ Kolocɔlɔw a dùbaw taʔa mɔ na àmɛɛ wi gi joo mɔ ma lè. Mɔ a ra fwɔ́ɔgèle nii syɛɛnfeleye saʔa na, mɔ si a ra fwɔɔlɔ kúunri í. Mɔ a tɛ́ɛn syɛɛnfeleye saʔa nyúngo na, yi a tɛ́ɛn mɔ nyúngi na í.

⁷ Mɔ senyɛnwaa ga pye fɔ̀ngɔfɔlɔ mɔ kegaa ni, tári ni, dee Yawe mɔ Kolocɔlɔw a kaan mɔ ma lè, mɔ a kɔ́ mɔ fúngi gbàn í, mɔ a kɔ́ mɔ kɔ́gi gbàn mɔ senyɛnw kàbaan na, wee na fɔ̌ngi nyɛ lè í.

⁸ Kàjáa mɔ a mɔ kɔ́gi sánʔa wi ma bi fwɔ́ɔli le wi na bi yɛlɛ ní wi màkonyɔɔri ní.

⁹ Da miyɛɛ kɔ̀rɔsíi, mɔ a kɔ́ sɔ̀ngubeere yaʔa di jée mɔ fúngi ni í, mɔ í da gi nyuu si jo: ‹Wéle, yɛ̀ʔɛlɛ kɔrɔsiin wóli n nùuni, li lè fwɔɔyaʔari yɛ́ɛlɛ,› koro si mɔ kaan mɔ a kɔ́ mɔ senyɛnw nyaa nyinimɛ wóo ní í, woro wee wi fɔ̀n lè, mɔ si cée mɔ a yafyɛn kaan wi ma í. Wi a ra yákpoli wáa Yawe kurugo ní mɔ mɛ́ɛgi ní. Mɔ si a kapeele taʔa miyɛɛ na.

¹⁰ Wi kaan. Kaanni bee si a kɔ́ pye mɔ ma funbɛɛnrɛ í. Níì cán gee bee kéele na Yawe mɔ Kolocɔlɔw a dùbaw taʔa mɔ na mɔ fáliw myɛ, ní mɔ kapyegèle myɛ ni.

¹¹ Fɔ̀ngɔfɔbèle a kwɔ́ɔ tári ni í, koro na mii tundunri naa kaan mɔ ma, ki n yɛlɛ mɔ í mɔ kɔ́gi sánʔa mɔ senyɛnw, ní foomɔfɔw, ní fɔ̀ngɔfɔw ma mɔ tári ni.

Púlobèle wɔ́rɔrɔ lala

¹² «Mɔ Heburu-senyɛnwaa ga fɔ̀n, a wi pye nàɔn wàlá cɔlɔɔ yoo, níì wiyɛɛ pára mɔ ma, yɛ̀ʔɛlɛ kɔrɔni wi a báara mɔ ma, kàjáa yɛ̀ʔɛlɛ kɔrɔsiin wóli na mɔ a wi kpéʔele wɔ́rɔɔ, wi yiri mɔ tɛ́ɛgi ni bàā syée.

¹³ Lǎli ni si mɔ a wi kpéʔele lè wɔ́rɔɔ wi yiri mɔ tɛ́ɛgi ni bàā syée, mɔ a kɔ́ wi tórigo ní kɔwaayi ní í.

¹⁴ Mɔ a tàa wòlo mɔ yaweeyiligèle, ní mɔ kasyɔɔgi, ní mɔ ɛrɛzɛnw tɛɛnùgugo ni bi kaan wi ma kpɔʔɔrɔ. Mɔ a wi kaan bi yɛlɛ ní gi ní kánmee na Yawe mɔ Kolocɔlɔw dùbaw taʔa mɔ na lè.

¹⁵ Sɔ̀ngi mi taa gi na mi cán mɔ maa pye puloo Ezyipiti tári ni, a Yawe mɔ Kolocɔlɔw mɔ yirige di ni, koro na mii tundunri naa nyuu mɔ ma níjanʔa.

¹⁶ Mɔ púlow si ga mɔ pye: ‹Mii o caa bi yiri mɔ tɛ́ɛgi ni í,› níì cán mɔ ní mɔ narigbaagi kéele n wi dɛ́nɛ, á wi wɔ́ɔ̀ gi nyaa woro n yɛlɛ mɔ tɛ́ɛgi ni,

¹⁷ lǎli bee ni mɔ a ŋáani láa si pulonǎnw líige taʔa kɔ̀rigi na si gi fùru. Wi a kòro mɔ púlo làla o làla. Gee bee wonijanga mɔ a kpéʔele pulocaà na.

¹⁸ Bi wi kpéʔele wɔ́rɔɔ wi yiri mɔ tɛ́ɛgi ni bàā syée, gee bee a kɔ́ gbàn mɔ ma í, níì cán wi n báara mɔ ma yɛ̀ʔɛlɛ kɔrɔni, gee bee i nyɛ sàra-na-falipyeo sàra tɛ́ɛyɛ siin. Yawe mɔ Kolocɔlɔw a dùbaw taʔa mɔ na mɔ kapyegèle myɛ ni.

Yaweeri pìiselibéle kéele

¹⁹ «Mɔ yaweekpologèle ní mɔ yaweeyiligèle pìiselibéle be lè bɔ̌bèle, mɔ a poro myɛ yaʔa kɔlɔ̀ na Yawe mɔ Kolocɔlɔw ma. Mɔ a kɔ́ báara ní mɔ nɔɔ piiselio ní í. Mɔ a kɔ́ mɔ bawaa pìiselio síire cɛnɛ í.

²⁰ Mɔ a ra be káa ní mɔ kpáagi wòolo ní yɛɛlɛ o yɛɛlɛ Yawe mɔ Kolocɔlɔw yɛ́ʔɛ ma, tɛ́ɛgi ni, gee Yawe ga nyɛ́nɛ n wòlo lè.

²¹ Tɛɛlɛ ga pye li làa na, li tɔlɔgaa ga kálagi, wàlá a li fùn, wàlá tɛɛlaa nikwɔɔ félege ga pye li na, mɔ a kɔ́ li wòlo sáriga Yawe mɔ Kolocɔlɔw ma í.

²² Mɔ a li káari káa mɔ tɛ́ɛgi ni, syɛɛnnɔnʔɔɔ ní syɛɛnmunuɔ a gbǎn káa li na àmɛɛ be wogaà, ní sɔ̀ɔ félegaa káa lè.

²³ Li sìsyaanw si na mɔ a kɔ́ woro káa í, mɔ a wi wo tári na àmɛɛ lɔ̀ʔɔ nyɛ lè.