Làlwaw Kaanziin 14 - Cebaara Bible 2010

Kùúyi kalɛɛgéle yaʔala kéele

¹ «Yele i nyɛ Yawe yele Kolocɔlɔw jàala. Yele a kɔ́ yele céri kɔnɔgi í, wàlá bi yele gbáagèle ǹjoʔo ma kùnu kùugo kéele na í.

² Níì cán mɔ i nyɛ syɛɛnfelegaa, gee gi yaʔa kɔlɔ̀ na Yawe mɔ Kolocɔlɔw ma lè, á Yawe mɔ nyɛ́nɛ n wòlo mɔ í pye syɛɛnfelegaa, gee ki a pye lè woro tiimaa wóʔo syɛɛnfeleyi myɛ nínge ni yi nyɛ lè tásaligi na.

Káari di lè káama ní dee di fúun lè

³ «Mɔ a kɔ́ yanɔnʔɔgaa faala káa í.

⁴ Yaweeree yele a ra káa lè, toro di nyɛ dee naa: Nɔ̀ɔ, ní byà, ní sikaà,

⁵ ní sɔ̀ɔ félegaa, ní wogaà, ní dagbɛɛ, ní dàngbumɔ, ní sɔ̀ɔcɔnɔ, ní senɔ́ɔ, ní seʔe síkaa.

⁶ Yaweele o yaweele feriye yi yabi lè siin n láʔa yiyɛɛ na, li si i yaliiri lúrugu ni sànʔá, yaa gele bee káa.

⁷ Dee si ti di yaliiri lúrugu ni sànʔá lè, wàlá a di fèriyi yabi siin, dee yele a ra fúun dee bee ni lè toro di nyɛ dee naa: Fàlibaʔa, ní pyèʔe, ní ŋunuɔn, ti i di yaliiri lúrugu ni sànʔá, di fèriyi si ga yabi siin í, yele a di córo yanɔnʔɔrɔ.

⁸ Gbòyoogi fèriye n yabi siin, kàjáa ki o gi yaliiri lúrugu ni sànʔá í, ki a pye yanɔnʔɔgɔ yele ma. Yele a kɔ́ ra di káari káa í, yele a kɔ́ ra tángi ti woguuri na í.

⁹ Yaweeree myɛ di nyɛ lǒyi ni lè, dee yele a ra káa dee bee ni lè, toro di nyɛ dee naa: Dee myɛ na lònyan-yáriya ní koriro nyɛ lè, yaa toro káa.

¹⁰ Kàjáa dee di lè lònyan-yáriya, ní koriro fun ni lè, yele a kɔ́ ra toro káa í. Ti a pye yanɔnʔɔrɔ yele ma.

¹¹ Yele a ra féjɛɛnjǎnri myɛ káa.

¹² Kàjáa dee yele a ra fúun lè, toro di nyɛ dee naa: Nyɔɔ̀, ní dùbazáan, ní sólomi lɔ̀ʔɔ taana nyɔɔ̀,

¹³ ní kàlaʔa, ní kàcɔʔɔnyɛnyi féleye myɛ,

¹⁴ ní kàanriyi féleye myɛ,

¹⁵ ní sòʔolow, ní sàtorigo, ní fáyorolo, ní kàgbɛɛngèle féleye myɛ,

¹⁶ ní zàngbulowee-kàlaʔa, ní zàngbuloweele, ní kùlobanna,

¹⁷ ní kpɔ̀ʔɔlɔgɔ, ní jàga, ní yápɔrisabinnɛ,

¹⁸ ní vàʔanɔɔ, ní kánabɔlɔ ní wi féleyi, ní kòrikangbarila, ní kɔɔnɔgɔ.

¹⁹ Fókaanyi yaweepiire myɛ a pye yanɔnʔɔrɔ yele ma, yele a kɔ́ ra di káa í.

²⁰ Yele a ra féjɛɛnjǎnri myɛ káa.

²¹ Yele a kɔ́ yaweekuugaa faala káa í. Mɔ a gi kaan nibɔnw ma wi baa tɛ́ɛn ní mɔ ní lè wi gi káa, wàlá mɔ a gi pára nibɔnwaa ma. Mɔ i nyɛ syɛɛnfelegaa, gee gi yaʔa kɔlɔ̀ na Yawe mɔ Kolocɔlɔw ma lè. Mɔ a kɔ́ kapiige sɔʔɔ ki nɔ́ɔw yíremɛ ni í.

Yáʔaw kajoolo

²² «Mɔ a ra mɔ yaliifálari myɛ yáʔa wóo, dee mɔ taagi mɔ ségi ni lè yɛɛlɛ o yɛɛlɛ.

²³ Mɔ a ra mɔ bilew yáʔa, ní mɔ duvɛɛnfɔnw, ní mɔ sinmi wóo líi n fàra mɔ yaweekpologèle ní mɔ yaweeyiligèle pìiselibéle na Yawe mɔ Kolocɔlɔw yɛ́ʔɛ ma, tɛ́ɛgee ni wi ga nyɛ́nɛ n wòlo lè bi woro mɛ́ɛgi yaʔa beè, koro ga pye mɔ í gi tama bàā fɛ̀ɛgí làla o làla Yawe mɔ Kolocɔlɔw na.

²⁴ Dɔ̀ʔɔ́ kólogi a tɔnɔ sɔ̀lɔ mɔ na yáriri bee láa-mí-kárila na tɛ́ɛgi ma, gee Yawe mɔ Kolocɔlɔw a nyɛ́nɛ wòlo lè bi wi mɛ́ɛgi pye yaà beè àmɛɛ mɔ a léeli gi na lè, ní àmɛɛ Yawe mɔ Kolocɔlɔw a dùbaw taʔa mɔ na lè,

²⁵ lǎli bee ni mɔ a yáriri bee pára wáli na, si wáliw bee sámaga cò mɔ kɔ́gi ni bi ba kári ní wi ní Yawe mɔ Kolocɔlɔw tɛ́ʔɛ ma, gee wi nyɛ́nɛ n wòlo lè.

²⁶ Yárigee ga sáà mɔ dɛ́nɛ lè, mɔ a wáliw le gi ni nɛɛ bee, yaweekpɔɔlɔ yoo, yaweepilaa yoo, dùvɛɛn yoo, sinmaa faala yoo, yárigee myɛ láa ga sáà pye mɔ na lè mɔ a gi lìi yaà beè Yawe mɔ Kolocɔlɔw yɛ́ʔɛ ma sáā fundaanra kpéʔele ní mɔ kpáagi wòolo myɛ ní.

²⁷ Levii ye wów wi ga pye wodɛ́ɛɔn ní ní mɔ ní lè, mɔ a kɔ́ wi cáan yaʔa í. Níì cán lɛɛlɛ wàlá kɔrigɔ o nyɛ wi ma ní mɔ ní í.

²⁸ Yɛ̀ʔɛlɛ taanri o yɛ̀ʔɛlɛ taanri ga kwɔ́ɔ, yaliiri mɔ ga láa lè, mɔ a di yáʔaw myɛ wòlo yɛɛdaanri wóli bee na bi tɛ́ʔɛ mɔ keyi ni.

²⁹ Lǎli bee ni Levii ye wów a pan, woro wee wi lè lɛɛlɛ wàlá kɔrigɔ o nyɛ wi ma ní mɔ ní í, woro ní nibɔnwee wi baa tɛ́ɛn ní mɔ ní lè, ní círiw, ní lɔgucew poro bele pe a pye ní mɔ ní lè, poro a di lìi bi tín, koro ga pye Yawe mɔ Kolocɔlɔw í dùbaw taʔa mɔ na mɔ kapyegèle myɛ ni, gele ni mɔ kɔ́yi le lè.