Làlwaw Kaanziin 13 - Cebaara Bible 2010

¹ Gee mii nyuu ni gbàngí yele ma lè, ye gi sámaga ye cò yáā gi kpéʔele. Mɔ a kɔ́ kàa taʔa gi na í, mɔ si a wɔ́ɔ kɔ́ kàa yirige gi ni í.

Gee gi joo yasunzunbèle kánma na lè

² «Kanyaajoowaa wàlá kanyaawaa ga yìri yele níngi ni n fɛ̀ɛwaa wàlá kakpɔɔgaa kéele joo mɔ ma,

³ á fɛ̀ɛ́w wàlá kakpɔɔgi foro, gee kéele wi joo lè, á wi mɔ pye: ‹Wo taʔa kolocɔlɔbèle pèle nikwɔɔlɔ na, wo sa ra be fáliw kpéʔele,› kolocɔlɔbèle be lè yele ga be cán í,

⁴ mɔ a kɔ́ kanyaajoow bee wàlá kanyaaw bee syɛ́ɛnrɛ lóʔo í. Níì cán Yawe yele Kolocɔlɔw wi yele sɛʔɛ ní wéle, bi gi cán kapye Yawe yele Kolocɔlɔw kéele n yele dɛ́nɛ yele zɔ̌nbèle myɛ, ní yele fúnyi myɛ ni.

⁵ Ye tan Yawe yele Kolocɔlɔw na, yáā fɛ̀ɛgí wi na, yé wi kajoodɛɛngèle myɛ cò, yáā lúro wi ma, woro yele a ra kpɔ̀ʔɔrɔ́, si yeyɛɛ bwɔɔ wi na.

⁶ Pe a kanyaajoow bee wàlá kanyaaw bee kpóo, níì cán wi n céemɛ syɛ́ɛnrɛ joo Yawe yele Kolocɔlɔw kánma na, woro wee wi yele yirige Ezyipiti tári ni lè, n yele yirige púlori kpaʔa ni. Kólogee Yawe mɔ Kolocɔlɔw caa mɔ í da táanri lè, wi maa ni caa bi mɔ pùuni bi yirige gee bee ni. Kánmi bee na mɔ a kapeegi bee kwɔ́ɔ yirige yele níngi ni.

⁷ Mɔ nafɔlɔ-na senyɛnwaa, wàlá mɔ pya wi lè nàɔn wàlá cɔlɔɔ wàlá mɔ cenidaanmaw wàlá mɔ taannyɛnwee kéele li mɔ dɛ́nɛ àmɛɛ mɔ miyɛɛ dɛ́nɛ lè, pe wàa ga ni mɔ lɛ́ɛlɛ làrama ni níì jo: ‹Wo kári wo sa kolocɔlɔbèle pèle nikwɔɔlɔ kpɔ̀ʔɔrɔ!› Kolocɔlɔbèle be lè mɔ ní mɔ tóobèle ga be cán í,

⁸ gee bee n jo syɛɛnfeleyi yi yele màʔa lè, yoro kolocɔlɔbèle nínge ni, tɔ́ɔnrɔ wóyi yoo, léelige wóyi yoo, bi séli tári láʔalee na bi taa sa nan lee na,

⁹ mɔ a kɔ́ fɔ̀lɔ gi na í, mɔ a kɔ́ lóʔo wi ma í. Mɔ a kɔ́ wi nyaa nyinimɛ wóo ní í, mɔ a kɔ́ wi yaʔa í, mɔ a kɔ́ wi nɔ́gi tɔ́n í.

¹⁰ Kàjáa mɔ n yɛlɛ bi wi kpóo. Mɔ kɔ́gi gi yɛlɛ bi séli nan wi na wi kpóoli kéele na, syɛɛnsanbèle myɛ kɔ́yɔ si náa nan wi na.

¹¹ Mɔ a wi wábagi ní kàdɛnɛri ní bi taa wi ba kùu, níì cán wi maa ni kanmaa caa bi mɔ léeli Yawe mɔ Kolocɔlɔw na, woro wee wi mɔ yirige lè Ezyipiti tári ni, púlori kpaʔa ni.

¹² Kánmi bee na Isirayɛli ye myɛ a gi lóʔo, sáā fɛ̀ɛgí si láʔa kapeegi bee félege kpéʔelele na yele níngi ni.

¹³ Mɔ ga gi lóʔo kègaa ni, yee Yawe mɔ Kolocɔlɔw kaan mɔ ma mɔ í tɛ́ɛn yi ni lè,

¹⁴ a gi jo nifaʔayaa n yiri mɔ ni n yi kètɛ́ɛnnyɛnbèle fáana n pùuni níì be pye: ‹Yaa maa wo sa ra kolocɔlɔbèle pèle nikwɔɔlɔ kpɔ̀ʔɔrɔ́!› Kolocɔlɔbèle bele be lè yele ga be cán í,

¹⁵ lǎli bee ni mɔ a kéeli bee sɛʔɛ, mɔ a yíbege kpéʔele, bi tɔ̀nɔ́ kéeli bee sámaga cɛɛlɛ ní yíbeye ní. Mɔ ga gi nyaa li i nyɛ kányɛʔɛ, li n tɛɛ̀tɛ́ɛnnɛ wòlo, yanɔnʔɔgi bee n kpéʔele yele níngi ni,

¹⁶ mɔ n yɛlɛ bi kěgi bee syɛ̀ɛnnɛ kpóo ní ŋɔsée ní, bi kěgi bee ní gi fúngi yárira kálagi péw n fàra yaweeri na.

¹⁷ Mɔ a gi yakoliri myɛ kpoʔolo kěgi kadàlaga nínge ni, si naà tɛ́ʔɛ bi kěgi ní gi yakoliri myɛ sórigo àmɛɛ sáriga-sórigoo nyɛ lè Yawe mɔ Kolocɔlɔw ma. Ki a kòro làla o làla kataʔa, ki a ní faan nyáana í.

¹⁸ Yáriree di yaʔa lè péw, ki kàa faala ga yɛlɛ bi nyaa mɔ kɔ́gi ni í, koro ga pye Yawe í wi fundanʔagbɔɔri yaʔa si nyinimɛ taa mɔ na, si mɔ nɛʔɛ bi yɛlɛ ní kàligi ní wi kpéʔele mɔ tofɔlɛɛyi ma lè,

¹⁹ mɔ mi tɛ́nɛ mi fɔ̀lɔ maa Yawe mɔ Kolocɔlɔw jóomɔ lúro, mí wi kajoodɛɛngèle myɛ sámaga mi cò, gele mii nyuu mɔ ma lè níjanʔa, máā gi kpéʔele, gee gi sín lè Yawe mɔ Kolocɔlɔw nyɛ́nɛ na.