Làlwaw Kaanziin 1 - Cebaara Bible 2010

Mowizi joozelimi

¹ Syɛ́ɛnri naa Mowizi joo Isirayɛli ye myɛ ma n be yaʔa Zyuridɛnw canʔafolomɔ ma, fìími tára ni, Araba ni Suf zǐnmi na, Paran, ní Tofɛli, ní Laban, ní Haserɔti, ní Di-Zahabi níngi ni.

² Bi láa Horebi ma, si sɔ̀lɔ Seyiiri nyanbeleyi kúlo kólogo ni bi taa sa nan Kadɛsyi-Barineya na, gee bee i nyɛ canya kɛɛ ní nibin tánʔana.

³ Yɛ̀ʔɛlɛ togoye siin wóli yeye kɛɛ ní nibin wógi cânzelige na, syɛ́ɛnri Yawe da joo n gbàn Mowizi ma Isirayɛli ye kéeli na lè, a Mowizi ti myɛ joo be ma.

⁴ Koro n pye wi maa fànʔa taa n kwɔ́ɔ Amɔri ye fànʔafɔw Sihɔn na, woro wee wi da pye lè wodɛ́ɛɔn ní Hɛsyibɔn ni, ní Basyan fànʔafɔw Ogi na Edireyi ma, woro wee wi pye lè wodɛ́ɛɔn ní Asyitarɔti ni.

⁵ N be yaʔa Zyuridɛnw canʔafolomɔ ma, Mowabi tári ni, a Mowizi làlwaw naa joo-mí-tɛ̀ɛnnɛ séli, dee naa wi joo.

Kolocɔlɔɔ n Isirayɛli ye gàríw kéele joo

⁶ «Yawe wolo Kolocɔlɔw n joo ní wolo ní Horebi ma, níì jo: ‹Yele n tɛ́ɛn n mɔn n kwɔ́ɔ nyanbelegi naa taana.

⁷ Ye kolo ye kàri yaa syée, ye sɔ̀lɔ Amɔri ye nyanbeleyi kúlo ma, ní be taana tátɛɛyi myɛ ni, ní tɛɛfiigi ni, ní nyanbeleyi na, ní tìgimi tára ni, ní wòrogulo kàbangi na, ní Sólomi Lɔ̀ʔɔ nyɔ́ɔ na, ní Kanaan ye tári ma, ní Liban ma, fwɔɔ bi sa nan cábikpɔɔgi na, ki lè Ufurati.

⁸ Ye wéle, mii n tári tɛ́ʔɛ yele yɛ́ʔɛ ma. Táree kéele na mii Yawe da kàli yele tóolɛɛbèle Abirahami ní Izaaki, ní Zyakɔbi ma lè, níì jo mii a di kaan be ma, si wɔ́ɔ di kaan be yòdaʔayi ma naa pe kàdoʔo ma lè, yaa syée ye sa di syɔɔ ye taa.›

Mowizi maa kútiijoobéle télege

⁹ «Mii maa gi joo yele ma lǎli bee ni kánmi naa na níì jo: ‹Mii nibin fánʔa a taa yele na bi yele láa í.

¹⁰ Yawe yele Kolocɔlɔw n kàa fàra yele na, a yele nɛʔɛ bele níjanʔa n pye àmɛɛ nyɛ̀ʔɛni ŋɔripiigéle nyɛ lè.

¹¹ Ki n yɛlɛ Yawe, yele tóolɛɛbèle Kolocɔlɔɔ í yele nɛʔɛ ki tɛɛyɛ saala kagunɔ kagunɔbèlē saʔa, si dùbaw taʔa yele na àmɛɛ wi da gi nyɔ́ɔgi fàli yele ma lè.

¹² Kanmìí na mii nibin fánʔa a taa bàā yele kagbangèle, ní yele kajoori, ní yele kàkabalayi túgoro tugu bi sɛ́ɛ?

¹³ Ye nǎnbèle pèle nyɛ́nɛ ye wòlo yeyɛɛ níngi ni bi yɛlɛ ní yele syɛɛnfeleyi ní, bele be nyɛ lè sícilibēle, ní kacanbèlē, ní mɛ́ɛtaanya fɔ̀ɔlɔ, mii a be télege yele nyúngi na.›

¹⁴ A yele mii yari: ‹Gee mɔ joo bi kpéʔele lè, ki i nyɛ yacanga.›

¹⁵ Lǎli bee ni bele be pye yele syɛɛnfeleyi nyúngo na lè, poro bele be pye lè sícilibēle, ní mɛ́ɛtaanya fɔ̀ɔlɔ, a mii be láa n télege yele nyúngi na a be pye saala kagunɔ kagunɔw kùndigibéle, ní dabata-daw kùndigibéle, ní togoye siin ní kpɔrigɔ kpɔrigɔw kùndigibéle, ní kɛɛ-gɛɛw kùndigibéle, ní kɔ̀rɔsiifɔɔlɔ, yele syɛɛnfeleyi ni.

¹⁶ A mii syɛ́ɛnri naa joo n gbàn yele kútiijoobèle ma lǎli bee ni níì be pye: ‹Yaa yele senyɛnbèle kèlē lúro, yáā kútiisiɔn kúunri syɔɔn ní wi senyɛnnɛ̀, wàlá wi ní nibɔɔn nínge ni.

¹⁷ Yele a kɔ́ ra syɔɔnwaa yirigi wàa ni yele kútiiw joolo ni í. Wobile yoo, wogbɔɔɔ yoo, yaa be syɛ́ɛnri lúro. Yele a kɔ́ fyáa wàa faala yɛ́ʔɛ na í. Níì cán kútiiw i nyɛ Kolocɔlɔɔ wóo. Kútii kéelaa si ga gbàn n sɔ̀lɔ yele na, yaa maa ní li ní mii ma, mii a ba li cɔɔnri.›

¹⁸ A mii si kérigèle joo n gbàn yele ma lǎli bee ni, gele myɛ yele yɛlɛ bàā kpéʔele lè.

Isirayɛli ye céemi kéele nyɔɔfaligi tára taana

¹⁹ «A wolo yìri Horebi taana n kári. Fìimɛ tákpɔɔri bee yele nyaa lè, ti lè fyáara wóro ní, a wo ti myɛ nyaari n foro. A wolo Amɔri ye nyanbeleyi kúlo kólogo láa n yɛlɛ ní Yawe wolo Kolocɔlɔw syɛ́ɛnrɛ ní wi da joo n gbàn wolo ma lè. A wolo sáà nan Kadɛsyi-Barineya na.

²⁰ A mii yele pye: ‹Yele n nan Amɔri ye nyanbeleyi kúlo na, lee Yawe wolo Kolocɔlɔw a kaan wolo ma lè.

²¹ Wéle, Yawe mɔ Kolocɔlɔw n tári tɛ́ʔɛ mɔ yɛ́ʔɛ ma. Lúgu mi sa di syɔɔ mi taa àmɛɛ Yawe mɔ tóolɛɛbèle Kolocɔlɔɔ gi joo mɔ ma lè. Mɔ a kɔ́ fyáa í, zɔ̀nviige a kɔ́ ra mɔ kɔɔn í.›

²² A yele myɛ pan mii ma n baa mii pye: ‹Wo nǎnbèle pèle tórigo wolo yɛ́ʔɛ ma pe sa tári saanri be wéle, si ba gi joo wolo ma kólogee ni wolo yɛlɛ bi lúgu kári lè, ní kěyee na wolo a nan lè.›

²³ A mii sɔ̀nguri bee nyaa a di nyɔɔ, a mii nànbēle kɛɛ ní siin nyɛ́nɛ n wòlo yele níngi ni, syɛɛnfelege o syɛɛnfelege ni, nàɔn nibin.

²⁴ A be kolo n fala n sáà lúgu nyanbeleyi kúlo kàbaan na n kári fwɔɔ n sáà nan Ɛsyikɔli jǐnlɔgi na, níì tári saanri n wéle.

²⁵ A be tári yasanraa cɔɔ ní be kɔ́yi ní n baa tɛ̀ɛn wolo na, níì kérigèle naa joo n tɛ̀ɛn wolo na níì jo: ‹Tácànra Yawe wolo Kolocɔlɔw a kaan wolo ma.›

²⁶ Kàjáa yele ga fɔ̀lɔ bi kári di ma í, a yele Yawe yele Kolocɔlɔw kajoolo cée.

²⁷ A yele kòro ni ŋùnuŋúnu yele fànikpaayi ni ní níì jo: ‹A Yawe wolo para wii, koro na wi wolo yirige Ezyipiti tári ni, jàngó bi ba wolo le Amɔri ye kɔ́yi ni bi wolo kálagi.

²⁸ Sán wolo a lúgu? Wolo senyɛnbèle n baa wolo bárigaw kwɔ́ɔ àmɛɛ pe baa gi joo lè níì jo: Syɛ́ɛnbèle bee n kpólo n sɔ̀lɔ wolo na, n wɔ́ɔ̀ tɔnɔ n sɔ̀lɔ wolo na, a be kěyi wɔ́ɔ̀ kpólo, á yi tǒbèle tɔnɔ fwɔɔ n sáà nan nyɛ̀ʔɛni na. Alí wolo n caà Anaki yòdaʔayi nyaa yaà.›

²⁹ A mii yele pye: ‹Yele a kɔ́ ra cɛ̀lɛ́ í, yele a kɔ́ ra fɛ̀ɛgí be na í.

³⁰ Yawe yele Kolocɔlɔw wi syée yele yɛ́ɛgi na lè, woro tiimaa wi a kapɛɛnni kpúmɔn kaan yele ma, bi yɛlɛ ní gee myɛ ní wi kpéʔele yele ma lè yele nyɛ́nɛ na, Ezyipiti ni,

³¹ ní fìími tára ni, beè yele gi nyaa lè a Yawe yele Kolocɔlɔw yele láa àmɛɛ nàɔn wi jaà lée lè, n sɔ̀lɔ yele tɛɛsɔ̀lɔyi myɛ ni fwɔɔ n taa a yele baa nan tɛ́ɛgi naa na.›

³² Gee bee fúngo ni yele ga sèʔê tága Yawe yele Kolocɔlɔw na í.

³³ Woro wee wi da ni syée yele yɛ́ɛgi na lè kólogi ni n sa ni fànikpaayi tɛɛ̀kórigo caa yele ma. Ki ga pye yébiligi ni, ki n pye naà, cángi làla ni, ki n pye fàfanʔa, jàngó bàā yele kozɔ̀lɔgi tèé yele na.

³⁴ Yawe n yele syɛ́ɛnri joomɔ lóʔo a wi fúngi si tanʔa, a wi kàli níì jo:

³⁵ ‹Yìrili naa syɛ̀ɛnnɛ be pee lè nya, tácǎnri kéele na mii kàli níì jo mii a di kaan yele tóolɛɛbèle ma lè, pe wàa faala a di nyaa í.

³⁶ Fwɔɔ Kalɛbi wi lè Yefune jáaw, woro wi a di nyaa. Táree na wi tánʔa lè, mii a di kaan woro ní wi pìíbèle ma, níì cán wi n tánʔa Yawe kólogi ni n foro.›

³⁷ A Yawe fúngi wɔ́ɔ̀ tanʔa gbanʔama mii kurugo yele kéeli na, a wi jo: ‹Mɔ a wɔ́ɔ jée di ni í.

³⁸ Nun jáaw Zyozuwe, woro wee wi báara mɔ ma lè, woro wi a jée di ni. Lòmaana le wi ni, níì cán woro wi a Isirayɛli ye kaan be tári bee kɔ́rigɔ lìi.

³⁹ Yele pìipiigèle gele kéele na yele da gi joo lè níì jo pe a sa ge koli yaà, ní yele jáabèle bele be lè pe ga kacànna cán n wàli kapeele ni níjanʔa í, poro pe a jée di ni, poro ma mii a di kaan, poro pe a di taa di pye pe worò.

⁴⁰ Yele si na, ye kolo ye lúru yaa syée fìími tára ma, Nyɛ́nɛri Solomɔ Lɔ́ʔɔ kàbaan na.›

⁴¹ Lǎli bee ni a yele gi joo mii ma níì mii yari: ‹Wolo n kapeele pye Yawe na. Wolo a lúgu kári bi sa kapɛɛnni kpúmɔn bi yɛlɛ ní gee myɛ ní Yawe wolo Kolocɔlɔw joo n gbàn wolo ma lè.› A yele myɛ nibin nibin yele kapɛɛnkpumɔn-yáriri láa n yeyɛɛ bwɔɔ, níì nyanbeleyi kúlo gàrí córo kapyedaanna.

⁴² Lǎli bee ni, a Yawe mii pye: ‹Ki joo be ma mí be pye: Yele a kɔ́ lúgu yaà í, yele a kɔ́ sa kapɛɛnni kpúmɔn í. Níì cán mii o nyɛ yele níngi ni í. Yele a kɔ́ yeyɛɛ gaan yele nigoobèle ma be jáa í.›

⁴³ A mii joo ní yele ní, kàjáa yele ga lóʔo í. A yele Yawe syɛ́ɛnri cée, dee wi joo n gbàn lè, níì yele nyúnyi waʔa níì lúgu n kári nyanbeleyi kúlo ma.

⁴⁴ Lǎli bee ni Amɔri ye be nyɛ wodɛ́ɛnbéle ní nyanbeleyi bee kúlo ni lè, a poro yiri n yele fàra níì yele kɔ́ri ni nɛnɛ, àmɛɛ sépiigéle nyɛ lè. A be yele jáa Seyiiri ni fwɔɔ n sáà nan Horima na.

⁴⁵ A yele ga lúru n pan, a yele ba ni nyaan Yawe yɛ́ʔɛ ma, kàjáa Yawe ga lóʔo yele ma í, wi ga líiye cáan n lóʔo yele ma í.

⁴⁶ A yele níì tɛ́ɛn n kòro Kadɛsyi ni n cannɛʔɛyɛ kwɔ́ɔ yaà n yɛlɛ ní gi ní àmɛɛ gi kpéʔele n kwɔ́ɔ lè.