Kàseegèle 9 - Cebaara Bible 2010

Sícilimi kayele

¹ Sícilimi n bi kpáagi faan. Pi n bi gàángèle kɔrɔsiin tan.

² Pi n bi yaweeri kpóo, ní wɔ́ɔ̀ bi dùvɛɛnw nyáʔami n kwɔ́ɔ. Pi n bi lìíli tàbali yérige n kwɔ́ɔ.

³ Pi n bi falipyecebèle tun. Pi i yákpoli wáa kěgi dǎndamaya tɛɛfirigeye na níì jo:

⁴ «Wee wi lè kanaa-sìnjáɔn, wi wàli wi jée nɛɛ naa.» Pi i gi nyuu nilabalabèle ma níì jo:

⁵ «Yaa maa ye ba lìi mii lìíli na, yé dùvɛɛnw gbaa, wee mii nyáʔami lè.

⁶ Ye nidolimi yaʔa, yele a sìi taa. Yaa táanri cánni kólogo ni.»

Síciliw ní nɛ̀ɛnyɛnɛgi fɔ́lɔ

⁷ Wee wi nɛ̀ɛnyɛnɛgɛ fɔ́lɔ nii koloyo ni lè faʔara wi wáa wiyɛɛ na. Wee wi fúlo syɛɛnpeeo na lè, tɛʔɛlɛyɛ wi taagi.

⁸ Mɔ a kɔ́ fúlo nɛ̀ɛnyɛnɛgi fɔ́lɔ na í, jàngó wi a kɔ́ mɔ para í. Da fúlo síciliw na, mɔ kéeli a wi dɛ́nɛ.

⁹ Síciliw kaan, wi a ní cìlige bi sɔ̀lɔ. Cánna kaan syɛɛnsinw ma, kàa a fàra wi cánni na.

¹⁰ Yawe yɛ́ɛgi fyáara di nyɛ sícilimi sélimɛ. Wojanw cánna li nyɛ cánni.

¹¹ Níì cán mii bárigaw ni mɔ siiw canya a nɛʔɛ, kàa si fàra mɔ siiw yɛ̀ʔɛlɛ na.

¹² Mɔ ga pye sícilio, mɔ mi cìlige miyɛɛ na. Mɔ ga pye nɛ̀ɛnyɛnɛgɛ fɔ́lɔ, mɔ nibin wi a ba gi tɔ̀nɔw taa.

Labalami kayele

¹³ Labalami i nyɛ àmɛɛ kangbanma cɔ́ɔ ní nidoligo nyɛ lè, wee wi lè wi ga yafyɛn cán í.

¹⁴ Wi i tɛ̀ɛ́n wi kpaaweeli na, yatɛ́ɛnnɛ na, kěgi dǎndamaya na.

¹⁵ Ní i yákpoli wáa kozɔ̀lɔbèle kurugo be sɔ̀lɔ́ ni syée lè zìnmɛ na be kólogi ni, níì jo:

¹⁶ «Wee wi lè kanaa-sìnjáɔn wi wàli wi jée nɛɛ naa.» Wi i gi nyuu nilabalaw ma níì jo:

¹⁷ «Lòyuugi n tɛ́nɛ, búru-làraw i nyɛ yatanʔa.»

¹⁸ Wee bee si a gi cán bi cán nɛɛ bee woguubèle nyɛ í, wi a gi cán bele céw bee yiri lè, pe i nyɛ kùúw jǐnlɔyɔ ni í.