Kàseegèle 8 - Cebaara Bible 2010

Sícilimi ní i syɔɔn yiri

¹ Sícilimi o sùpili wáa bee ì? Cánni o li yákpoli wáa lee ì?

² Dǎndamayi ǹjoʔo ni wii, kólogi nyɔ́ɔ na, kóloyi tɛɛfàraga ni bi yèré.

³ Kěgi kpàánweegéle nyɔ́ɔ na, beè syɛ́ɛnbèle jǐn lè, pi i yákpoli wáa yaà níì jo:

⁴ «Yele syɔɔn ye, yele kurugo mii yákpoli wáa. Syɔɔn ye má mii nyuu.

⁵ Yele nidoliyi, ki n yɛlɛ ye tama jàngó ye cìlige. Yele nilabalayi, ki n yɛlɛ yaa cánni tama.

⁶ Ye lóʔo, níì cán kakpɔɔlɔ i nyɛ mii ma bi joo, gee gi sín lè mii nyɔ́ɔgi a múgu bi tamana kaan gee bee na.

⁷ Níì cán mii nyɔ́ɔgi i kányɛɛgi nyuu, péemi i nyɛ mii nyɔ́ɔgi má yanɔnʔɔgɔ,

⁸ mii nyɔ́ɔgi syɛ́ɛnrɛ myɛ n sín. Jànvaa wàlá námara faala o nyɛ di ni í.

⁹ Ti myɛ n fílige wee má wi keele cán lè. Ti n sín bele má be cánna taa lè.

¹⁰ Ye mii tamani kéele kpɔ́ʔɔ ye sɔ̀lɔ wálifiiw na. Cánni n sɔ̀lɔ tɛɛtelew na.

¹¹ Níì cán sícilimi n sɔ̀lɔ lɔgbanri kɔ́nɔpiiye na. Yariga o yariga láa gi nyɛ syɔɔn na lè, ki kàa ga nyɔɔ n yɛlɛ ní bi ní í.

Sícilimi i piyɛɛ tèé

¹² «Mii wi lè sícilimi, mii ní kɔ̀rɔsiiw i nyɛ tɛ́ɛnnyɛ̀nnɛ. Kacɛɛlɛgèle cánna i nyɛ mii ma.

¹³ Kapeʔe parala i nyɛ Yawe yɛ́ɛgi fyáara. Kpɔ́ɔmi, ní nɛ̀ɛnyɛnɛgi, ní péemi kólogo, ní námara nyɔ́ɔgi, wéle, kérigèle bee n tɔ̀nɔ n mii bɛɛn.

¹⁴ Láliiw ní yákiricǎnw i nyɛ mii ma. Mii wi nyɛ cánni, séew i nyɛ mii wóo.

¹⁵ Mii bárigaw ni fànʔafɔbèle tɛ̀ɛ́n fǎngi na, a syɛɛnkpolobèle wɔ́ɔ i làlwasiɔn télegi.

¹⁶ Mii bárigaw ni kùndigibèle fǎngi kpéʔele, ní mɛ́ɛkpoloyi fɔ̀ɔlɔ, ní tári kútiijoobéle myɛw.

¹⁷ Bele mii kéeli dɛ́nɛ lè, bele bee kéele n wɔ́ɔ̀ mii dɛ́nɛ. Bele be mii caa lè, pe i mii nyaagi.

¹⁸ Lɔ́ri, ní nìjanri i nyɛ mii ma, ní kɔlɔ̀ yáriri di mɔngi lè, n fàra sínni na.

¹⁹ Mii yasanri n pɔ́rɔ n sɔ̀lɔ tɛ́ɛw na, àlí tɛɛtelew na. Tɔ̀nɔwee wi nyɛ mii ni lè, wi n sɔ̀lɔ wálifiiw wodeleo na.

²⁰ Mii i táanri sínni kólogo ni, kányɛɛgi kóbiigéle nínge ni.

²¹ Koro ga pye bele be tàmaga le ní mii ní lè, mii í be kpéʔele yarigaa fɔ̀ɔlɔ, si be lɔ́ri tɛɛkɔnyɔ nyìn.

²² Yawe n mii kpéʔele wi yakpéʔeleri sélimɛ na, wi kapyelɛɛgèle yɛ́ʔɛ ma.

²³ Wi maa téè mii télege yaà, nlaa yaà sélimɛ fun, n téè láa yaà làrizelili ni, sáni tári í séli lè.

²⁴ Wi n mii see booma ni lǎli ni lòcuruyi da kɔ́ɔ̀ pye beè lè í, lònɛʔɛgi púloweegéle da wɔ́ɔ̀ pye beè í.

²⁵ Wi n mii see sáni nyanbeleyi í télege lè, sáni dǎndamayi í pye beè lè.

²⁶ Wi da kɔ́ɔ̀ tári sámaga gbɛnʔɛnɛ í, wàlá sìnbiriyi, wàlá dulunyanw támiiselige í.

²⁷ Lǎli ni wi nyɛ̀ʔɛgèle sámaga lè, mii maa pye beè. Lǎli ni wi tɛʔɛ̀ kán círiri n lòcurugi màʔa lè mii maa pye beè.

²⁸ Lǎli ni wi fàfaanyi télege ǹjogi ni lè, níì lòcurugi púloweegéle kaan ke i púlo ní fànʔa ní lè, mii maa pye beè.

²⁹ Lǎli ni wi sólomi lɔ̀ʔɔ tɛɛ̀yérele kúun lè, koro ga pye ki lǒgi a kɔ́ sɔ̀lɔ ki tɛɛ̀yéreli na í, lǎli ni wi tári kàpɔɔn tɛɛ̀yérele kúun lè, mii maa pye beè.

³⁰ Mii maa pye fáliw na wi taana. Mii maa pye wi fundaanri kèlē na canʔa o canʔa, ní i kɔ̀nʔɔ́ wi yɛʔɛ̀ ma làrigèle myɛ ni,

³¹ ni kɔ̀nʔɔ́ wi tári na. Mii fundaanri di pye mii í pye syɔɔn ye níngi ni.

Wee wi lúro sícilimi ma lè wi i nyɛ dùba pyà

³² «Tɔ́ɔliw ni doò, ni pìibēle, ki n yɛlɛ ye lóʔo mii ma, mii kóloyi còvɔɔlɔ i nyɛ dùba pìibēle.

³³ Ye tamani lóʔo koro ga pye yele í cìlige, yele a kɔ́ li cée í.

³⁴ Syɔ́ɔnwee wi ga ni lúro mii ma lè, ní i kòró nyɛ̀nɛ na mii kpaaweeli na canʔa o canʔa, ní i mii kpàánweegèle kɔ̀riyɔ kpáa wéle, wi i nyɛ dùba pyà.

³⁵ Níì cán syɔ́ɔnwee wi ga mii caa n nyaa lè, wi n sìíw taa, Yawe a fɔ̀lɔ wi na.

³⁶ Wee si wi ga kapeele pye mii na lè, wi n wi sìíw kpàli. Bele myɛ kéeli mii bɛɛn lè, pe n tàmaga le ní kùúw ní.»