Kàseegèle 7 - Cebaara Bible 2010Kanɔnʔɔbyecew i nìgɔcariɔ lɛ́ɛlɛ 1 Ni pyà, ki n yɛlɛ mi mii syɛ́ɛnri cò, mí mii kajoodɛɛngèle kɔn mi yaʔa miyɛɛ ma. 2 Mii kajoodɛɛngèle kɔn, koro ga pye mɔ í sìi taa. Mɔ yákirii yaʔa mii tamani na àmɛɛ mɔ nyapiisyɔɔnw nyɛ lè. 3 Di pwɔɔ mɔ kabegèle na. Di sɛ́bɛ mɔ fúngi kàlagolo na. 4 Ki joo sícilimi ma mí bi pye: «Mɔ i nyɛ mii senyɛnnɛ̀.» Máā cánni yiri mɔ taannyɛnnɛ. 5 Koro ga pye ti mɔ syɔɔ nànjaacew ma, ní nibɔnjew ma wi syɛɛntaanri nyuu lè. 6 Mii pye mii kpáagi fɛ̀nɛtiri na lè, a mii kòro yaà ǹjogi ni ní i wéle wi yapalari ni, 7 a mii wéle n nyaa nidoliyi nínge ni, mii n nìgɔcarilabalaga nyaa nìgɔcaribèle nínge ni. 8 Ki maa ni sɔ̀lɔ́ kàlari-kólogi ni n sáà nùuni cɔlɔɔ tɛ́ʔɛ na. A ki i syée yɛ́rirɛ wi kpáagi ma. 9 Ki maa pye wɔɔ-fàrari na, cângwɔɔgi nyɔ́ɔ na, yébiligi làla ni ní yébiliwɔɔli làla ni. 10 Wéle, a cewaa baa wi fàra, níì kanɔnʔɔbyecɔɔ̀ yalere le, gbánama si i nyɛ wi fúngi ni. 11 Wi n pye kangbanma syɔ́ɔn, ní fɛ̀ɛfɔnjaʔa, wi tɔ́lɔyi da ni kòró wi kpáagi ni í. 12 Làlaa ni wi n pye kàlari-kólogi ni làlaa ni wi n pye kadàlayi na. Ní i yèré jɛ̀ɛ́ngèle myɛ na ni sige. 13 A wi nìgɔcariw nyáma n cò, níì wi syɔɔnri syɔɔnri, níì gi joo wi ma fɛ̀ɛfɔnmɔ ni níì jo: 14 «Pínɛnyɛnnɛgɛ sáriga fwɔɔlɔ maa pye mii na, níjanʔa mii mii nyɔɔfaliyi wòlo. 15 Koro na mii yiri n baa mɔ fàra bi mɔ caa, á mii wɔ́ɔ baa mɔ nyaa. 16 Mii n làgosúuyo cáan mii yasinɛgi na, yi lè Ezyipiti jèseew fànikpoloyaa. 17 Mii n nùndaanni yárira wo mii yasinɛgi na ti lè míiri, ní alowɛsi, ní kanɛli. 18 Da maa wo ba ra woyɛɛ yɛ́ɛyi wóo ní fundaanri ní bi taa nyǐngi í tali. Wo ba pye tàmagi kínidɛnɛgɛ na. 19 Níì cán mii nǎnw o yaà kpaʔa ma í, wi n kári kùleelile ni. 20 Wi n wi wálile-yárigi láa n kári ní wálinɛʔɛgɛ ní. Wi a lúru pan kpaʔa ma í, fwɔɔ yenyǐn-zyɔ́ɔnri na.» 21 Wi n wi lɛ́ɛlɛ n cò ní wi lòmaakooli ní. Wi n wi kárima n kári ní wi nyɔɔsyɛɛntaanri ní. 22 Wi n fala n taʔa wi na ni syée àmɛɛ nɔ̀ɔ nyɛ, wee wi syée kaàkpoo-tɛ́ɛgi ma lè, àmɛɛ nilabalaga nyɛ, gee be pwɔɔ bi kpúmɔn lè, 23 fwɔɔ bi taa ŋaagaa í wi yɛ̀ɛ́li súu fùru, ní àmɛɛ féjɛɛnnɛ nyɛ lee li cò parà na lè, wi si a gi cán bi cán woro sìíw a kòro gi ni wii í. 24 Koro na tɔ́ɔliw ni, ni pìibēle, ye lóʔo mii ma, ye yákirii yaʔa mii nyɔ́ɔgi syɛ́ɛnrɛ na. 25 Mɔ fúngi a kɔ́ kàri bi taʔa céw bee félege na í. Mɔ a kɔ́ pùuni bi jée wi kobiigèle ni í. 26 Níì cán wi n syɛ̀ɛnnɛ saʔa kpàli n kwɔ́ɔ kùumɔ. Bele myɛ wi kpóo lè, pe maa tɔ̀nɔ n pye syɛɛnniribéle. 27 Wi kpáagi i nyɛ kúbèle tɛɛkòrogo kólogo, gee gi tíri ni syée kùúw tɛɛkòroyo ma lè. |
Kolocɔlɔɔ Syɛ́ɛnri © Bible Society of Côte d'Ivoire, 2008.
Bible Society of Côte d'Ivoire