Kàseegèle 6 - Cebaara Bible 2010

Bàā kɔ̀rɔsíi pèle fwɔ́ɔgéle séera láala na

¹ Ni pyà, mɔ ga pye mɔ syɛɛnnyɛnnɛ fwɔɔlɔ yɛ́ʔɛ na, mɔ ga kadaali le nibɔɔn kéele na,

² kapye mɔ nyɔ́ɔgi syɛ́ɛnrɛ n mɔ pwɔɔ, kapye mɔ n cò mɔ nyɔɔgi syɛ́ɛnrɛ na,

³ ni pyà, ki n yɛlɛ mi gee naa kpéʔele tɔ́ɔliw ni bi miyɛɛ zyɔɔ, níì cán mɔ n jée mɔ syɛɛnnyɛnnɛ kɔ́yɔ ni. Da syée mi sa tìgi mi too mi mɔ syɛɛnnyɛnw nyɛ́ɛri gbanʔama.

⁴ Mɔ a kɔ́ ŋúnɔmɔ yaʔa bi mɔ nyapiigèle cò í, wàlá mɔ í nyapilaa tɔ́n làa na í.

⁵ Miyɛɛ zyɔɔ àmɛɛ wogaà syoo tòzoo ma lè, ní àmɛɛ féjɛɛnnɛ syoo parà levɔlɔ ma lè.

Bàā kɔ̀rɔsíi mɔ a kɔ́ pye sàlagafɔlɔ í

⁶ Mɔ sàlagafɔw, da syée mi sa sùmuuw wéle, mí sɔ̀ngi wi kérigèle pyeganma na, mí sícilimɛ taa.

⁷ Kùndigi o nyɛ wi na í, fali kundigi o nyɛ wi nyúngi na í, kàfɔlɔ o nyɛ wi nyúngi na í.

⁸ Kàjáa wi i wi lìíli kpóʔoro ni yaari wɔ̀ɔ́gi làla ni. Wi i wi yaliiri kpóʔoro yaliiri làrilaala ni.

⁹ Mɔ sàlagafɔlɔ, làla jòorí mɔ a kwɔ́ɔ nya tɛɛ̀sinɛgi ni? Làlìí ni mɔ a yìri nya mɔ ŋúnɔmi na?

¹⁰ Ŋúnɔmɔ cɛɛri, ŋúnɔsìnlɛɛlɛ cɛɛri, bi kɔ́yi mígi làla cɛɛri ni, si sínɛ.

¹¹ Koro ki a fɔ̌ngi kaan gi pàlá too mɔ na àmɛɛ kàyuuo nyɛ lè, fóomi a too mɔ na àmɛɛ yakolio gi kpéʔele lè.

Zɔ̀nbeeo fɔ́lɔ tɛ̀ɛnnɛ kéele

¹² Syɔ́ɔnwee wi nyaari ní jànvaaw ní wi nyɔ́ɔgi na lè nifaʔaga ní syɛɛnnaa-sìnziɔn wii.

¹³ Wi i nyapiigèle fɛ́nʔɛnɛ, ní i nyuu ní tɔ́lɔgi ní, ní i fɛ̀ɛ́bèle kpéʔele ní kabegèle ní.

¹⁴ Námaraw i nyɛ wi fúngi ni, wi i kapeʔe sɔ̀ngí làla o làla. Wi i kàsii yìrigí.

¹⁵ Koro na wi tooli a ba foo nan wi na, wi a ba pàlá tɔ́nʔɔnɔ, tiinmɛ o kòro na í.

Gee gi Yawe bɛɛn lè

¹⁶ Yariya kɔrɔni i yaà, yee kéele li Yawe bɛɛn lè, àlí yariya kɔrɔsiin, yee yi nyɛ wi ma lè yanɔnʔɔyɔ.

¹⁷ Nɛ̀ɛnyɛnɛgɛ nyapiigèle, ní nyínni li finɛ lè, ní kɔ́yee yi tɛɛlɛ fun sìsyaan ŋuu lè,

¹⁸ ní fúngee gi kapeeye tímana lè, ní tɔ́lɔyee yi fé kelekele kapeʔe kurugo lè.

¹⁹ Ní jànvaa séerafɔwee wi jànvaaw nyuu lè, ní wee wi kàsii légi senyɛ̀nnɛ nínge ni lè.

Bàā miyɛɛ kɔ̀rɔsíi kanɔnʔɔbyeri na

²⁰ Ni pyà, ki n yɛlɛ mi mɔ tóow tundunro cò. Mɔ a kɔ́ mɔ nɔ́ɔw tamana cée í.

²¹ Ti pwɔɔ mi yaʔa mɔ zɔnw na làrigèle myɛ ni, di pwɔɔ mi cɔ̀ɔn mɔ yátiigi ni.

²² Ti a ra mɔ yɛ́ɛgi kínigi mɔ tánʔani na. Mɔ ga sínɛ, ti a ra mɔ kpáaw wéle. Mɔ ga yìri ŋúnɔmi na, ti a ra nyuu ní mɔ ní.

²³ Níì cán tundunri i nyɛ fètinɛ, tamani i nyɛ gbɛ̀ɛnmɛ, kàfulogi gi tamana kaangi lè ki i nyɛ sìíw kólogo.

²⁴ Ti a mɔ syɔɔ cepeew ma, ní nibɔnjew syɛɛntaanra ma.

²⁵ Wi nìjanri nyabɛɛnnɛ ga yɛlɛ bi pye mɔ fúngi ni í, wi nyapiiwelegèle a kɔ́ mɔ lɛ́ɛlɛ cò í.

²⁶ Níì cán kanɔnʔɔbyecew o yafyɛn yaari syɔɔn kɔ́lɔ ni kanyinɛ nibin kàdoʔo na í. Kàjáa céwee pe pɔri lè, wi i karinyanga nii sìicàɔn na.

²⁷ A syɔɔn a gbǎn naà taʔa lé wi fìcibigi na wi búroyi si kòro sìnjò ni?

²⁸ A syɔɔn a gbǎn tánʔa lé naàniganra na, wi tɔ́lɔyi si kòro sìnzógi ni?

²⁹ Syɔ́ɔnwee wi syée wi syɛɛnnyɛnnɛ cɔ́ɔ kurugo lè, kánmi bee na syɔ́ɔnw bee nyɛ. Syɔ́ɔnwee wi ga tánga wi na lè, syɔ́ɔnw bee a gbǎn córo kolomɔ fun syɔ́ɔn í.

³⁰ Kateegi ga syɔɔn wáa kàyuugo na jàngó woro í taa lìi, pe o wi faari í.

³¹ Pe si ga wi taa n cò, wi a gi tɛɛyɛ kɔrɔsiin sàra. Wi a wi kpáagi lɔ́rɔ myɛ kaan.

³² Syɔ́ɔnwee si wi kanɔnʔɔrɔ kpéʔele ní cɔlɔɔ ní lè, syɔ́ɔnw bee i nyɛ sícilimɛ-fùnvɔlɔ. Wee wi wiyɛɛ kálagili caa lè woro wi koro kpéʔele.

³³ Wi a kpàliya ní nɔ́kɔn taa. Wi faʔari a tée láʔa wi na í.

³⁴ Níì cán nyabɛɛnni a fundanʔagbɔɔrɔ wáa nǎnw na. Wi a tée nyinimɛ taa gɔ̀lɔ́-wòlori canʔa na í.

³⁵ Wi a tée nyùnzyɔɔ-wáli faala kéele córo í. Wi a tée fɔ̀lɔ í, àlí mɔ ga yakaanri nɛʔɛ.