Kàseegèle 5 - Cebaara Bible 2010

Bàā miyɛɛ kɔ̀rɔsíi cêkalagigi na

¹ Ni pyà, yákirii yaʔa mii síclimi na, líiyi cáan mii cánni ma.

² Koro ga pye mɔ í kérigèle sɛʔɛlɛ kɔn, cánni si wɔ́ɔ kòro mɔ nyɔɔwari na.

³ Níì cán cêkalagiga nyɔɔwari i sárigi sɔlɔ ni ŋuu, wi nyɔɔsyɛɛnri n mínɛmínɛ n sɔ̀lɔ sǐnmi na.

⁴ Kàjáa gi kwɔ́ɔganmi n soro àmɛɛ kòbi nyɛ lè, níì tɛ́nɛ àmɛɛ nyɔɔyɔ siin ŋɔsée nyɛ lè.

⁵ Wi tɔ́lɔyi i tíri kùúw ma. Wi nyɔ̌ngèle i syée bi sa nan kúbèle tɛɛkòrogo na.

⁶ Wi o sìíw kobile córo í, wi kóloyi i nyɛ pùununɔ kóloyo, wi si ga koro cán í.

⁷ Tɔ́ɔliw ni, ni pìibēle, ye lóʔo mii ma, yele a kɔ́ láʔa mii nyɔ́ɔgi syɛ́ɛnrɛ na í.

⁸ Mɔ kólogi yaʔa gi léeli wi na. Mɔ a kɔ́ nùuni wi kpaaweeli na í.

⁹ Koro ga pye mɔ a kɔ́ mɔ kpɔ́ʔɔri kaan pèle nikwɔɔlɔ ma í, si mɔ siiw yɛ̀ʔɛlɛ kaan nyinimɛ fun nàɔn ma í.

¹⁰ Koro ga pye nibɔɔnnɔ a kɔ́ peyɛɛ dín ní mɔ lɔ́ri ní í. Mɔ fáliw wɔʔɔgɔ tɔnɔ a kɔ́ jée wàa nikwɔɔ kpaʔa ni í.

¹¹ Ki kwɔ́ɔmi a ba pye mɔ céri, ní mɔ césaligi í kálagi, mɔ sáā cɛ́ɛn lǎli bee ni,

¹² sáā gi nyuu si jo: «Mɛ̀ɛ́ ki da caà pye á tamani kéele mii bɛɛn? Ba mɛ̀ɛ́ ki da pye á mii fúloli kéele faʔa mii fúngi ni?

¹³ Mɛ̀ɛ́ gi pye n sɛ́ɛ mii si ga mii tamafɔbèle jóomɔ lóʔo í? Bele pe da ni mii cìligí lè, mɛ̀ɛ́ gi pye mii si ga mii líiyi cáan n lóʔo be ma í?

¹⁴ Cɛɛri wi da kòro wɔʔɔveleyi myɛ si dée mii nɛnɛ taa syɛɛnkpoʔolomi, ní gbooli nínge ni.»

Bi mɔ cárimi cɔ́ɔ kéele yaʔa li mɔ dɛ́nɛ

¹⁵ Da mɔ tiimaa lǒgi wéʔe lɔ́ʔɔ gbo, gee gi yirigi mɔ kɔlɔ́w ni lè.

¹⁶ A mɔ púloweegèle yɛlɛ lé ge càmi fala kàfugo ma? Mɔ loyi yɛlɛ lé bàā fóo da syée kadàlayi na?

¹⁷ Ki n yɛlɛ yi pye mɔ nibin wóyo, nibɔɔnnɔ a kɔ́ wɔ́ɔ ní mɔ ní yi na í.

¹⁸ Dùbaw n yɛlɛ wi pye mɔ púloweeli na, mí mɔ cárimi cɔ́ɔ yaʔa wi pye mɔ fundaanri.

¹⁹ Sɔ̀ɔ nidaanmaɔ, wogaà, wee wi nyìn kpɔʔɔrɔ na lè, wi yíregèle n yɛlɛ bi mɔ yɛlɛ làrigèle myɛ ni. Wi tàmagi í da fundaanra kaangi mɔ ma làrigèle myɛ ni.

²⁰ Ni pyà, nyàʔá na mɔ a nibɔnjew láa yaʔa wi wári mɔ na, mɔ í da wàa yíregéle có wee wi lè mɔ ga wi cán í?

²¹ Níì cán Yawe nyɛ́nɛ i nyɛ syɔɔn kóloyi na. Wi i wi kobiigèle myɛ sɛʔɛ.

²² Syɛɛnpeew tiimaa sìnzinmɛ kele n wi cò, wi kapeebyeri mɛ́ɛngéle n wi pwɔɔ.

²³ Wi a kùu wiyɛɛ sìngóromi kéele na. Wi a pùuni wi labalagbɔɔmi kéele na.