Kàseegèle 4 - Cebaara Bible 2010

Bi sícilimi caa, si bi sámaga cò

¹ Ni pìibēle, yaa tofɔlɔ tamana lúro, ye pye yákirii fɔ̀ɔlɔ jàngó yele í cánni taaganma cán.

² Níì cán cánjànna mii kaangi yele ma, yele a kɔ́ mii tamani cée í.

³ Ncan mii maa pye jaafɔlɔ mii tóow ma. Mii kéeli maa mii nɔ́ɔw dɛ́nɛ gbanʔama àmɛɛ mii da pye wi ma lè pìinibinge.

⁴ Mii tóow maa ni mii tama kánmi naa na, níì jo: «Ki n yɛlɛ mi mii syɛ́ɛnri cò mɔ fúngi ni. Ki n yɛlɛ mi mii kajoodɛɛngèle kɔn, mɔ a sìi taa.»

⁵ Ki n yɛlɛ mi sícilimi caa, mí wɔ́ɔ mi cánni caa. Mɔ a kɔ́ fɛ̀ʔɛ di na í, mɔ a kɔ́ wàli bi láʔa mii nyɔ́ɔgi syɛ́ɛnrɛ na í.

⁶ Mɔ a kɔ́ sícilimi yaʔa í, pi a ra mɔ kpáaw wéle. Pi kéeli yaʔa li mɔ dɛ́nɛ, pi a ra mɔ kɔ̀rɔsíi.

⁷ Sícilimi sélimɛ bi nyɛ bee naa, koro gi nyɛ da sícilimi caa, máā cánni caa bi sɔ̀lɔ mɔ yacaari myɛ na.

⁸ Da sícilimi sòoló, pi a mɔ kpɔ́ʔɔ. Mɔ ga bi wáa n mígi ní mɔ kɔ́yi ní, pi a pye mɔ nijanri.

⁹ Pi a kpɔʔɔrɔ jàra pwɔɔ mɔ nyúngi ni, si fànʔafɔ-nyùndɔnjànna kaan mɔ ma yakanʔa.

Da còʔoró syɛɛnpeebèle tánʔaganma na

¹⁰ Lóʔo ni pyà, mí fɔ̀lɔ mii syɛ́ɛnri na. Kánmi bee na mɔ siiw yɛ̀ʔɛlɛ a nɛʔɛ.

¹¹ Mii n mɔ tama sícilimi kólogo na. Mii n mɔ yɛ́ɛgi kíni sínni kóloyo ni.

¹² Mɔ ga ni táanri, yafyɛn a mɔ tɔ́lɔgi tɔ́ɔrɔ í. Mɔ ga ni fé, mɔ a tée kpírige í.

¹³ Ki n yɛlɛ mi tamani sámaga mi cò, mɔ a kɔ́ li yaʔa í, tan li na, níì cán loro li nyɛ mɔ siiw.

¹⁴ Mɔ a kɔ́ jée syɛɛnpeebèle kóbile ni í. Mɔ a kɔ́ wobeebèle kozɔ̀lɔgɔ láa í.

¹⁵ Da còʔoró gi na, mɔ a kɔ́ jée gi ni í. Wàli mi sɔ̀lɔ gi na.

¹⁶ Níì cán bele bee i nyɛ kapye pe ga kapeʔe kpéʔele í, pe a gbǎn ŋúnɔ í. Kapye pe ga syɔɔn taa n cáan í, ŋúnɔmi n pɛ́ɛ be na.

¹⁷ Níì cán pe i péemi búru líi, ní i tètéew dùvɛɛn gbo.

¹⁸ Syɛɛnsinbèle kóbile i nyɛ àmɛɛ canvolovɔ́ngɔ gbɛɛnmɛ nyɛ, bee na kàa taari lè bi taa cángi í ba tɛ́ɛn nyùngo ni.

¹⁹ Syɛɛnpeebèle kólogo i nyɛ àmɛɛ yébiliwɔɔlɔ nyɛ lè, yárigee na pe a kpírige lè, pe o gi nyaagi í.

Bàā táanri tánʔaganjànma na

²⁰ Ni pyà, yákirii yaʔa mii syɛ́ɛnri na, líiyi cáan mii syɛɛnjóori na.

²¹ Ti ga yɛlɛ di fɔ̀n mɔ yɛ́ʔɛ ma í. Ti sámaga mi kɔn mɔ fúngi ni.

²² Níì cán ti i nyɛ sìi bele má pe di taagi lè, ní i nyɛ be céri myɛ cólogomɔ.

²³ Da mɔ fúngi kɔ̀rɔsíi mi sɔ̀lɔ yáriri myɛ na, níì cán fúngi ni syɔɔn siiw kèlē myɛ yirigi.

²⁴ Jànvaa syɛ́ɛnri láʔa mɔ nyɔ́ɔgi na. Námara jóomi léeli mɔ nyɔɔwari na.

²⁵ Ki n yɛlɛ mɔ nyapiigèle í da wéle zìnmɛ na, mɔ nyapiikoriyi í sín bàā wéle mɔ yɛ́ʔɛ ma.

²⁶ Kólogi sámaga gi pye falafala gee ni mɔ sɔ̀lɔ́ lè, mɔ kozɔ̀lɔyi myɛ n yɛlɛ yi pye wodeleye.

²⁷ Mɔ a kɔ́ wàli bi kári kàliige wàlá kàmɔnɔ ma í. Mɔ tɔ́lɔgi léeli kapeegi na.