Kàseegèle 31 - Cebaara Bible 2010

Lálii syɛ́ɛnrɛ fànʔafɔlɔ ma

¹ Fànʔafɔw Lemuwɛli syɛ́ɛnri, ti lè tamani, lee na wi nɔ́ɔw wi tama lè.

² Nyàʔá mii a joo mɔ ma ni pyà? Nyàʔá mii a joo mɔ ma mii láagi pìiseeo? Nyàʔá mii a joo mɔ ma mii nyɔɔfaliyi pyà?

³ Mɔ a kɔ́ mɔ bárigaw kaan cébèle ma í, wàlá bi mɔ kóloyi pínɛ ní cébèle bele ní be fànʔafɔbèle kálagi lè í.

⁴ Lemuwɛli, gee naa ga yɛlɛ fànʔafɔbèle na í, fànʔafɔbèle ga yɛlɛ paa dùvɛɛn gbo í, wàlá singbǎnmi láa í da kùndigibèle taagi í,

⁵ jàngó pe a kɔ́ ra bi gbo pe sɔ̀nguri si láʔa làlwaw na í, pe kɔ́ ra fɔ̀rɔgɔfɔbèle myɛ tànʔa kàragí kolomɔ í.

⁶ Yaa singbǎnmi kaangi wee má wi a kùu lè, ní dùvɛɛnw wee má wi nyaan fúngi ni lè,

⁷ wi gbaa si fɛ̀ʔɛ wi fóomi na, si wi sɔ̀nguri láʔa wi fɔ̀rɔgi kéele na.

⁸ Mí nyɔ́ɔgi múgu mi boboow dɛ̀ɛmɛ n fàra bele myɛ na syɛ́ɛnbèle cée n yaʔa lè, maa be dɛ̀ɛmɛ́ be kútiiw na.

⁹ Mɔ nyɔ́ɔgi múgu maa kútiiw nyuu ní sínnɛ ní, maa fɔ̀rɔgɔfɔw ní foomɔfɔw tánʔa nyuu.

Cecàɔn kánmi

¹⁰ Wìí wi a cecàɔn caa taa? Wi lɔ́ri n gbàn n sɔ̀lɔ kɔ́nɔpiiyi wóro na gbanʔama.

¹¹ Wi nǎnw n wi sɔ̀ngumi taʔa wi na, tɔ̀nɔ a fɔ̀n wi nǎnw ma í.

¹² Wi i kacànga kpéʔele wi nǎnw na wi sìíw canya myɛ ni, wi o kapeʔe kpéʔele wi na í.

¹³ Wi i bàsiiri ní lɛnw caa, ní i báara ní wi kɔ́yi ní fundaanra na.

¹⁴ Wi i nyɛ mɔ a jo jàgiwáabèle bàtowaa wii, wi i wi lìíli caa ni yìrigí tɛɛ̀leelige ni ni maa.

¹⁵ Wi i yìrigí bi nyǐngi yaʔa sìndali ni bi wi kpáagi wòolo liile sámaga, ní i wi falipyecebèle fáli tèé be na.

¹⁶ Wi i nyɛ wi a sɔ̀ngi seʔe kéele na si gi syɔɔ, wi i ɛrɛzɛnw tírire cɔ́rɔ ní wi fáliw tɔ̀nɔ ní.

¹⁷ Wi i fǎngi téeri ni wiyɛɛ bwoo sárigèle ni, àmɛɛ sɛntiiri nyɛ lè, ní i fànʔa nii wi kɔ́yi ni.

¹⁸ Wi n gi nyaa gee woro taagi lè, ki n nyɔɔ. Wi fètinni o fíri yébiligi ni í.

¹⁹ Wi i gɔ̀rimigili có ní wi kɔ́gi ní, ní i jèdaanni céregi ní wi kabegèle ní.

²⁰ Wi i wi kɔ́yi múru foomɔfɔw ma, ni wi kɔ́gi sáanri fɔ̀ngɔfɔw ma.

²¹ Wi o fɛ̀ɛgí ní wi kpáagi wòolo ní lànɛɛzyiw kéele na í, níì cán wi n lɔgbanri fàninyɛɛɔn le wi kpáagi wòolo myɛ na.

²² Wi i wi làgoyi sámagi, lɛn fàni fɛ́ɛlɛfɛɛlɛɔ, ní wonyɛɛn-súruo yalere i nyɛ wi ma.

²³ Wi nǎnw i córo kpàánweegèle na lǎli ni wi ga tɛ́ɛn ní tári wólɛɛbéle ní lè.

²⁴ Wi i buroyo sámagi ní i yi pára. Wi i sɛntiiribèle kaangi jàgiwáaw ma.

²⁵ Fǎngi ní kpɔ́ʔɔri i nyɛ wi na yalere, wi i nyɛ̀ʔɛnaw tɛ́ʔɛ.

²⁶ Wi i nyɔ́ɔgi múru ní sícilimɛ ní, tamajanna si i nyɛ wi nyínni na.

²⁷ Wi i wi kpáagi kèlē cɔɔnriganma kɔ̀rɔsíi, wi o sàlaga búru líi í.

²⁸ Wi pìíbèle i yìrigí ni dùba kpéʔele wi ma. Wi nǎnw i yìrigí ni wi sòoló ní i gi nyuu níì jo:

²⁹ «Calipiigèlē saʔa n keyɛɛ dɛ̀ɛn sànbalibéle kàjáa mɔ n sɔ̀lɔ ke myɛ na.»

³⁰ Kpɔ́ʔɔri i syɔɔn fáana, céri nìjanra si i nyɛ gbanzan. Kàjáa céwee wi fɛ̀ɛgí Yawe na lè, woro pe a sòolo.

³¹ Ye wi kɔ́yi fáli tɔ̀nɔ kaan wi ma, wi kapyegèle sáā wi sòoló kpàánweegèle na.