Kàseegèle 30 - Cebaara Bible 2010

Aguri syɛ́ɛnri

¹ Aguri syɛ́ɛnri, wi lè Yake jáaw. Nǎnw bee joogbanna Ityɛli ma, wi n li joo Ityɛli, ní Ukali ma, níì jo:

² «Kányɛʔɛ na, mii n labala n sɔ̀lɔ pe myɛ na, syɔɔn ye cánni félege o nyɛ mii ni í.

³ Mii ga sícilimi tama í, wee wi lè Wojanw, mii ga wi cánni taa í.

⁴ Wìí wi lúgu n kári nyɛ̀ʔɛni na níì yìri yaà n tìgi naa? Wìí syɔ́ɔn wi káfalagi kùru n cò wi kágungèle ni? Wìí wi lǒyi pwɔɔ wi búrogi ni? Wìí wi tári tɛɛ̀laʔagéle myɛ kúun? Mɛ̀ɛ́ pe wi mɛ́ɛgi yiri, ní mɛ̀ɛ́ pe wi jáaw mɛ́ʔɛ yiri, kapye mɔ n wi cán?

⁵ Kolocɔlɔɔ syɛ́ɛnri myɛ i nyɛ wozɛʔɛgwɔɔrɔ ní. Bele be fé ni làrá wi ni lè, wi i nyɛ bele bee má tunmɔzige-yariga.

⁶ Mɔ a kɔ́ kàa taʔa wi syɛ́ɛnri na í, jàngó wi a kɔ́ fúlo mɔ na, mɔ si córo jànvaafɔlɔ í.

⁷ Mii i yariya siin nyɛ́ɛri mɔ ma, mɔ a kɔ́ cée mii ma yi na sáni mii í kùu lè í.

⁸ Námaraw ní jànvaaw léeli mii na. Mɔ a kɔ́ fóomi wàlá taali yaʔa li nan mii na í, lìíli li a mii yɛlɛ lè, da loro kaangi mii ma,

⁹ koro ga pye mii a kɔ́ tín si mɔ cée í, sáā gi nyuu si jo: ‹Wìí wi nyɛ Yawe?› Wàlá mii í fɔ̀n si kɔ́ yùu koro si mii Kolocɔlɔw mɛ́ʔɛ nɔ́nʔɔ í.

¹⁰ Mɔ a kɔ́ puloo mɛ́ʔɛ kálagi wi kàfɔw taana í, koro ga pye wi a kɔ́ mɔ dánga, mɔ si kolomɔ taa í.

¹¹ Syɛ́ɛnbèle pèle félege i yaà, bele be syɛɛnpeeri nyuu ni wáa be tóobèle na lè, pe o kacànga faala nyuu ni kaangi pe nɔ́ɔbèle ma í.

¹² Syɛ́ɛnbèle pèle félege i yaà, bele be nyɔɔ peyɛɛ nyɛ́nɛ na lè, pe nɔ́nʔɔri si ga jée n láʔa be na í.

¹³ Syɛ́ɛnbèle pèle félege i yaà, pe nyapiigèle i nyɛ nɛ̀ɛgbɔʔɔgɔ woʔolo, pe nyapiikoriyi i nyɛ ǹjoʔo ma.

¹⁴ Syɛ́ɛnbèle pèle félege i yaà, pe gǎngèle i nyɛ ŋɔséebéle, kpàcɔʔɔlɔyi si i nyɛ ŋɔgéle bi fɔ̀rɔgɔfɔbèle káa yirige tári ni, si wɔ́ɔ foomɔfɔbèle kwɔ́ɔ yirige syɔɔn ye níngi ni.

Córomi kàseegéle

¹⁵ «Calipiigèlē siin i nyɛ sìseregi ma ni gi nyuu níì jo: ‹Ki kaan! Ki kaan!› Yariya taanri i yaà, yee yi lè yi o tíngi ni nyaagi í, àlí yi caa i nyɛ sicɛrɛ, yi a tée jo: ‹Ki n yɛlɛ nya› í.

¹⁶ Kúbèle tɛɛkòrogo, ní cenaa-sìnzeeo láagi, ní táree di lè ti o tíngi lǒgi na í, ní náagi gi lè ki a tée jo: ‹Ki n yɛlɛ nya!› í.

¹⁷ Nyapilee li liyɛɛ nyɛ́nɛ tofɔlɔ na lè, níì cée li o lúro nafɔlɔ ma í, lòcoologi kàanriya a li fùru, nyɔɔ̀ pìifaliya si li jɔ́ɔ.

¹⁸ Yariya taanri i yaa, yee yi sɔ̀lɔ mii cánni na lè, àlí yi caa i nyɛ sicɛrɛ, mii ga yi kánmi cán í.

¹⁹ Nyɔ́ɔw túlugo nyɛ̀ʔɛni na, ní wàbigi túlugo fálaga na, ní bàtow túlugo sólomi lɔ̀ʔɔ nínge ni, ní nàɔn túlugi pìcaa ma.

²⁰ Kanɔnʔɔbyecew kólogo wéle gee: Wi a lìi si nyɔ́ɔgi tùuni, si jo: ‹Mii ga kapeʔe pye í.›

²¹ Yariya taanri i tári cúngu, àlí yi caa i nyɛ sicɛrɛ, di fanʔa a taa yi na í.

²² Pulonàɔn í ba pye fànʔafɔlɔ, ní nilabalaɔ í tín lìíli na,

²³ ní céwee wi syɔɔn bɛɛn lè, wi cèpɔrigɔ pyele, ní pulocɔɔ̀ í wi kàfɔjew kɔ́rigɔ lìi.

²⁴ Yaweepiigèlē sicɛrɛ i nyɛ tári na, gele ge cɛ́rɛ lè kányɛʔɛ ni, á ge si cìlige n sɔ̀lɔ.

²⁵ Sùmuuw wi nyɛ lè fànʔafun syɛɛnfelege, wi i wi lìíli kpóʔoro wɔ̀ɔ́gi làla ni.

²⁶ Ŋúnubèle i nyɛ fànʔafun syɛɛnfelege, ní i be tɛɛkòroyi kpéʔele fálayi nínge ni.

²⁷ Fànʔafɔlɔ o nyɛ kúdow nyúngo na í, wi si i pìnɛ́ ni yirigi ni syée kabiya.

²⁸ Kàkelew mɔ a gbǎn cò ní mɔ kɔ́yi ní lè, wi si i kòró fànʔafɔbèle kpaaya ni.

²⁹ Yariya taanri i beè, yee tánʔaganma bi nyɔɔ lè, àlí yi caa i nyɛ sicɛrɛ, yee kánma bi nyɔɔ lè.

³⁰ Càaraw, woro wee wi soro yaweeri myɛ na lè, wi o lúrugu kàdoʔo ma yafyɛn yɛ́ʔɛ ma í,

³¹ ní gòpɔ́w wi woʔogo lè gǒbèle nínge ni, wàlá sikepɔw, ní fànʔafɔwee wi nyɛ lè ní wi kapɛɛnkpumɔnbèle ní.

³² Labalami ga mɔ wáa nɛ̀ɛnyɛnɛgɛ na, á mɔ baa sɔ̀ngubeere sɔ̀ngi, kɔ́gi tɔ́n nyɔ́ɔgi na.

³³ Níì cán nɔ́nɔw kpúmɔnnɔ i nàaráw yirigi, fínaani kurugolo si i sìsyaan yirigi, fundanʔari yìrigele si i kàsii kúunri.»