Kàseegèle 3 - Cebaara Bible 2010

Sícilimi ní lóʔoli kéele Kolocɔlɔɔ ma

¹ Ni pyà, mɔ a kɔ́ fɛ̀ʔɛ mii tamani na í. Ki n yɛlɛ mi mii kajoodɛɛngèle sámaga mi cò mɔ fúngi ni.

² Níì cán ke a mɔ siiw canya nɛʔɛ, bi mɔ siiw yɛ̀ʔɛlɛ nɛʔɛ, si wɔ́ɔ yɛɛ̀nyinge kaan mɔ ma.

³ Ki ga yɛlɛ funjǎngi ní kányɛɛgi í mɔ yaʔa í. Di pwɔɔ mɔ yátiigi ni, di sɛ́bɛ mɔ fúngi kàlagolo na.

⁴ Kánmi bee na mɔ a kpɔʔɔrɔ, ní kacànna taa Kolocɔlɔɔ ní syɛ́ɛnbèle ma.

⁵ Miyɛɛ daʔa Yawe na ní mɔ fúngi myɛ ní. Mɔ a kɔ́ miyɛɛ zígi mɔ tiimaa kacánni na í.

⁶ Da wi córo mɔ kóloyi myɛ ni, woro wi a mɔ kozɔ̀lɔyi sámaga yi pye falafala.

⁷ Mɔ a kɔ́ pye sícilio miyɛɛ tiimaa nyɛ́nɛ na í. Da fɛ̀ɛgí Yawe na mí láʔa kapeebyeri na.

⁸ Koro a pye mɔ céri cólogomɔ, ní mɔ kaceleyi nyíngemɛ.

⁹ Da Yawe kpɔ̀ʔɔrɔ́ ní mɔ kɔ́lɔ yáriri ní, ní mɔ yataari myɛ yaselire ní.

¹⁰ Lǎli bee ni mɔ gbodungèle a sámaga nyìn lìíli na, mɔ pɛ́ɛyi í nyìn dùvɛɛnfɔnw na bàā ŋuu.

Fundaanra i taagi sícilimi báriga ni

¹¹ Ni pyà, kpúmɔn-mí-kàrigali Yawe kpéʔele lè, mɔ a kɔ́ li faʔa í. Wi ga fúlo mɔ na, mɔ a kɔ́ gee bee nyaa kapeʔe í.

¹² Níì cán wee kéele li Yawe dɛ́nɛ lè, wi i fúlo wi na àmɛɛ tofɔlɔ gi kpéʔele lè wi pyà na, wee kéele li wi dɛ́nɛ lè.

Sícilimi ní dùbaw taala

¹³ Syɔ́ɔnwee wi sícilimɛ taa lè ní syɔ́ɔnwee wi nyɛ lè keele cánvɔlɔ, wi i nyɛ dùba pyà.

¹⁴ Níì cán pi taali n sɔ̀lɔ wálifiiw taala na, pi tɔ̀nɔw n sɔ̀lɔ tɛ́ɛw na.

¹⁵ Pi lɔ́ri n gbàn n sɔ̀lɔ kɔ́nɔpiiyi wóro na. Yáriree myɛ láa wi nyɛ mɔ na lè, ki kàa faala ga nyɔɔ n yɛlɛ ní bi ní í.

¹⁶ Sìinɛʔɛɔ i nyɛ bi kàliige kɔ́gi ni, lɔ́ri ní kpɔ́ɔmi si i nyɛ bi kàmɔnɔ kɔ́gi ni.

¹⁷ Pi kóloyi i nyɛ kojànya, pi kobiigèle myɛ i yɛɛ̀nyinge kaangi.

¹⁸ Pi i nyɛ sìi tíige pi còvɔbèle ma. Bele be kòro ní bi ní lè, pe i nyɛ dùba pìibēle.

¹⁹ Ní sícilimɛ ní Yawe tári kàpɔɔn le, ní cánna ní wi nyɛ̀ʔɛgèle sámaga n yérige.

²⁰ Wi kacánni báriga ni weecuruyi folo n múgu, fàfaanyi si i kásagi sɔlɔ ni ŋuu.

Yawe i sícilimi fɔ́lɔ kpáa wéle

²¹ Ni pyà, sícilimi ní kérigèle sɛʔɛlɛ sámaga mi cò, ke a kɔ́ fɔ̀n mɔ yɛ́ʔɛ ma í.

²² Ti a pye mɔ pili sìi, ní mɔ yátiigi ni kpɔʔɔrɔ.

²³ Lǎli bee ni mɔ a ra táanri mɔ kólogi ni ní tágala ní. Mɔ tɔ́lɔgi a tée kpírige í.

²⁴ Mɔ ga sínɛ, mɔ a ra fɛ̀ɛgí í. Mɔ ga sínɛ lǎli ni lè mɔ ŋúnɔmi a tɛ́nɛ.

²⁵ Mɔ a kɔ́ ra fɛ̀ɛgí fyáakpɔɔrɔ kéele na, dee ti a pàlá pan lè í, wàlá kpúmɔnri na, dee ti a yìri syɛɛnpeebèle ma lè í.

²⁶ Níì cán Yawe a pye mɔ sɔngumi tɛɛtaʔaga, woro wi a ra mɔ tɔ́lɔgi yirigi karinyanyi myɛ ni.

Bi mɔ syɛɛnnyɛnw kéele yaʔa li mɔ dɛ́nɛ

²⁷ Bele na kacànna yɛlɛ li kpéʔele lè, mɔ a kɔ́ cée li kpéʔeleli na í, kapye li kpéʔeleli fànʔa i nyɛ mɔ ni.

²⁸ Mɔ a kɔ́ gi joo mɔ syɛɛnnyɛnw ma si wi pye: «Da syée máā maa, nyɛ̀ʔɛna mii a ba mɔ kaan í,» bi gi taa yárigi i nyɛ mɔ ma gee mɔ yɛlɛ bi kaan wi ma lè.

²⁹ Mɔ syɛɛnnyɛnnɛ ga pye mɔ taana wodɛ́ɛɔn ní ŋɔ́ndaala na, mɔ a kɔ́ ra kapeʔe tímana wi kánmi na í.

³⁰ Mɔ a kɔ́ kàsii cò ní wàa ní nyùngo fun í, kapye wi ga kapeʔe pye mɔ na í.

³¹ Syɛɛnpeew nyabɛɛnnɛ a kɔ́ pye mɔ na í, mɔ a kɔ́ wi kologaa faala nyɛ́nɛ wòlo í.

³² Níì cán námarafɔlɔ i nyɛ yanɔnʔɔgɔ Yawe ma, kàjáa syɛɛnsinbèle i nyɛ wi tàannyɛndelebēle.

³³ Yawe i syɛɛnpeew kpaʔa dángi, kàjáa wi i dùbaw taari syɛɛnsinbèle tɛɛkòrogo na.

³⁴ Wi i wiyɛɛ nyɛ́nɛ nɛ̀ɛnyɛnɛgi fɔ̀ɔlɔ na, ní si i nyɔɔgi màabyebèle na.

³⁵ Sícilibèle lɛɛlɛ li nyɛ nìjanri, kàjáa faʔagbɔɔri di nyɛ nilabalabèle kɔ́rigɔ.