Kàseegèle 29 - Cebaara Bible 2010

¹ Syɔɔnwee na be fúlo lè, á wi wi nyúngi waʔa, wi a ba pàlá tɔ́nʔɔnɔ tiinmɛ o gi na í.

² Syɛɛnsinbèle ga nɛʔɛ, syɛ́ɛnbèle n pye fundaanra na. Syɛɛnpeeo si ga pye nyǔngi na, syɛ́ɛnbèle n ni cɛ́ɛn.

³ Sícilimi kéele ga syɔ́ɔnwee dɛ́nɛ lè, wi i fundaanra kaangi wi tóow ma, wee si wi syée kanɔnʔɔbyecebèle kurugo lè, wi i wi kɔlɔ̀ yáriri nyɔʔɔrɔ.

⁴ Fànʔafɔlɔ i tári sámagi ni yéregi sínni báriga ni, wee si wi fɔ̀lɔ́ námara kpɔ́ʔɔri na lè, wi i di kálagi.

⁵ Syɔɔnwee wi wi syɛɛnnyɛnnɛ fáana lè, wi i cɔ̀ɔ cáan wi tɔ́lɔyi láara ni.

⁶ Syɛɛnpeew kapeele i nyɛ wi na karinyaga, kàjáa syɛɛnsinw i ŋúu ní i fundaanra kpéʔele.

⁷ Syɛɛnsinw yákirii i nyɛ foomɔfɔbèle kútii kéele na, kàjáa syɛɛnpeew o kàa caa gee bee ni í.

⁸ Nɛ̀ɛnyɛnɛgi fɔ̀ɔlɔ i naà nii kěgi na, kàjáa sícilibèle i fundanʔari yéregi.

⁹ Sícilio ga pye kútii na ní nidoligo ní, a wi fúngi tanʔa yoo, a wi i tɛ́ʔɛ yoo, wi a ŋɔ́ndaala taa í.

¹⁰ Sìsyaanwobèle n tɛɛlɛ fun syɔ́ɔnw para, kàjáa syɛɛnsinbèle i wi sìíw kpáa wéle.

¹¹ Nilabalaɔ i wi fundanʔaw myɛ yirigi kàfugi na, kàjáa sícilio i wi wóri có ni sínɛgi.

¹² Kùndigi ga ni jànvaaw syɛ́ɛnrɛ lúro, wi cɛɛngbaabèle myɛ n pye syɛɛnpeebéle.

¹³ Foomɔfɔlɔ, ní fǎngi gbànvɔlɔ i peyɛɛ vàrá ni taagi. Yawe wi gbɛ̀ɛ́nmi kaangi pe myɛ siinw nyapiigéle ma.

¹⁴ Fànʔafɔwee wi foomɔfɔbèle kútii nyuu ní sínnɛ ní lè, wi fàngoli a báriga bi kòro beè làla o làla.

¹⁵ Sàbinni, ní fúloli i sícilimɛ kaangi, pìíwee si be yaʔa wiyɛɛ ma lè, wi i fɛ̀ɛrɛ wáa wi nɔ́ɔw na.

¹⁶ Syɛɛnpeebèle ga nɛʔɛ, kapeeyi n ni nɛʔɛgi, kàjáa syɛɛnsinbèle a be tooli sámaga nyaa.

¹⁷ Mɔ piiw kpúmɔn mi kàriga, wi a ŋɔ́ndaala kaan mɔ ma, sáā mɔ fúngi kanidaangéle kpéʔele.

¹⁸ Kérigèle tɛ̀ɛnnɛ ga fɔ̀n yaà, syɛ́ɛnbèle n pye peyɛɛ ma, wee si wi ga làlwaw cò lè, wi i nyɛ dùba pyà!

¹⁹ Syɛɛnjóoro yagana ní ban be puloo kàragí í. Alí wi ga di cán wi a di kpéʔele í.

²⁰ A mɔ nyɔɔfuurofɔlɔ nyaa lé? Sɔ̀ngumɔ tɛɛtaʔaga i nyɛ nilabalaɔ kéeli na n sɔ̀lɔ wi wóli na.

²¹ Syɔɔn ga puloo kálagi nlaa yaà wi pìími làla ni, ki kwɔ́ɔmi na wi a ba kàri nijamaga.

²² Fundanʔa-dànʔafɔlɔ i kàsii yìrigí, syɔ́ɔnwee fúngo gi yìrimɛ dɛ́nɛ lè, wi i kapeeye saʔa kpéʔele.

²³ Syɔɔn nɛ̀ɛnyɛnɛgi i wi cɛ́rɛgi, wee si wi nyɛ lè màabyeo fúngi ni, wi a kpɔʔɔrɔ taa.

²⁴ Wee wi wɔ́ɔ ní kàyuuo ní lè, wi n wiyɛɛ para, dángaw syɛ́ɛnrɛ di nyuu lè, wi i di lúro níì pyèri.

²⁵ Syɛ́ɛnbèle yɛ́ʔɛ fyáara i karinyanga nii, wee si wi wiyɛɛ daʔa Yawe na lè, yafyɛn a nan wi na í.

²⁶ Syɛɛnnɛʔɛmɛ i cànma caa kùndigi ma, kàjáa Yawe má syɔɔn o syɔɔn kútiisinw yìrigí.

²⁷ Syɛɛnnaa-sìnziɔn i nyɛ yanɔnʔɔgɔ syɛɛnsinbèle ma, wee kólogo gi sín lè, woro si i nyɛ yanɔnʔɔgɔ syɛɛnpeew ma.