Kàseegèle 28 - Cebaara Bible 2010

¹ Syɛɛnpeeo i fé bi gi taa wàa o nyɛ wi kurugo í, syɛɛnsinbèle n soro àmɛɛ càarabɔ-yɛlɛɔ nyɛ lè.

² Céemi ga pye táree ni lè, ti kùndigibèle i gáà nɛʔɛ. Kàjáa nǎnwee wi cìlige lè ní i nyɛ keele cánvɔlɔ, fǎngi i mɔngi wi bárigaw ni.

³ Fɔ̀ngɔfɔwee wi wi fǎngi gbàngí foomɔfɔbèle na lè, wi i nyɛ gàlagí zěkpɔʔɔ, yaliire si a ní pye beè í.

⁴ Làlwaw céefɔɔlɔ i syɛɛnpeew sòoló, kàjáa làlwaw kèlē kpéʔelefɔɔlɔ fúnyo i taanri wi kurugo.

⁵ Syɛɛnpeebèle ga kasinnɛ cán í, kàjáa Yawe caafɔbèle n kérigèle myɛ cán.

⁶ Foomɔfɔwee wi táanri kányɛɛgi na lè, woro n pɔ́rɔ n sɔ̀lɔ lɔrɔfɔlɔ na, wee wi kogoloyo táanri lè.

⁷ Wee wi ga làlwaw syɛ́ɛnrɛ sámaga n cò lè, wi i nyɛ pìisicilio, kàjáa wee wi kòró ní làáwologi fɔ̀ɔlɔ ní lè, wi i fɛ̀ɛrɛ wáa wi toò na.

⁸ Wee wi kàa fàrá wi lɔ́ri na tɔ̀nɔcaari, ní nɔ̀ʔɔrɔgi báriga ni lè, wi i di caa ni kpóʔoro wee má wi nyinimɛ taagi foomɔfɔbèle na lè.

⁹ Wàa ga wi líiweeli canʔana làlwaw lóʔolo na, àlí wee bee fɔ́lɔ nyɛ́ɛrigɛ i nyɛ yanɔnʔɔgɔ.

¹⁰ Wee wi syɛɛnsinbèle pùuní ni légi kobeʔe ni lè, wi a too wi tiimaa weètúgugi ni. Kàjáa syɛɛncanbèle a dùbaw kɔ́rigɔ lìi.

¹¹ Lɔrɔfɔlɔ i wiyɛɛ wéle n jo woro n cìlige. Kàjáa fɔ̀ngɔfɔwee wi cìlige lè, wi a gbǎn wi sɛʔɛ.

¹² Syɛɛnsinbèle ga fànʔa taa lǎli ni lè, fundaangbɔɔrɔ n pye yaà. Syɛɛnpeebèle si ga yìri lǎli ni lè, pe myɛ n ni làrá.

¹³ Wee wi wi kolomi kèlē làragí lè, wi kérigèle o nyɔɔgi í. Kàjáa wee wi ge nyuu ni tèé lè, ní i láari ge na, nyinimɛ i taagi wi na.

¹⁴ Syɔ́ɔnwee ni fyáara nyɛ lè làla o làla, wi i nyɛ dùba pyà! Kàjáa wee wi wi fúngi gbàn lè, wi i tuun wɔʔɔgi ni.

¹⁵ Amɛɛ càaraɔ kaana lè, ní àmɛɛ ursi fùurí ni maa lè, ànbée kùndigipeeo nyɛ, wee wi tɛ́ɛn fànʔafun syɛɛnfelege nyúngo na lè.

¹⁶ Kùndigiw wi fɔ̀n cánna ni lè wi i kàa fàrá fǎngi gbànma kèlē na, wee si tɔ̀nɔpeew bɛɛn lè, wi i wiyɛɛ sìíw canya nɛʔɛgi.

¹⁷ Wee na syɛɛnkpoori kapeele nyɛ lè, wi i fé ni syée wéegi ma, wàa a kɔ́ wi yérige í.

¹⁸ Wee wi táanri sínni ni lè, wi a syɔɔ, wee si wi kogoloyo siin táanri lè, wi a too ki kàa nibin ni.

¹⁹ Wee wi wi tári fála lè, wi a tín lìíli na, wee si wi wiyɛɛ daʔa gbanzan yáriri na lè, wi a tín fɔ̌ngi na.

²⁰ Wee wi nyɛ lè tágala syɔ́ɔn, wi a dùba saʔa taa. Kàjáa wee wi fungo wáriga taali kurugo lè, wi a kòro wɔʔɔgɔ sìndaa ni í.

²¹ Bi syɔɔnwaa yirige wàa ni, gee bee ga nyɔɔ í, syɔɔn si i kapeʔe kpéʔele búru cerile nibin kéele na.

²² Syɔɔnwee wi nyɛ lè wélebeelefɔlɔ wi i fùurí ni tɔ́ngi lɔ́ri na, wi si ga gi cán fóomi a ba too woro na í.

²³ Wee wi fúlo syɔɔn na lè, wi i kpɔʔɔrɔ taagi gi kwɔ́ɔmi na n sɔ̀lɔ wee na woro wee nyínnɛ li syɛɛnlɛɛlɛri nyuu lè.

²⁴ Wee wi wi tóow wàlá wi nɔ́ɔw yúu lè níì jo: «Koro o nyɛ kapeʔe í!» Wi i nyɛ gàlagifɔlɔ pínɛnyɛnnɛ.

²⁵ Wee wi sɔ̀ngí lè woro félege o nyɛ í wi i kàsii yìrigí, kàjáa wee wi wi sɔ̀ngumi taʔa Yawe na lè, wi a taa tín.

²⁶ Wee wi wiyɛɛ daʔa wi tiimaa fúngi na lè, wi i nyɛ nilabalaɔ, wee si wi táanri ní sícilimɛ ní lè, wi a syɔɔ.

²⁷ Wee wi kaangi foomɔfɔlɔ ma lè, fɔ̌ngi a tée too wee bee na í, wee si wi wi nyapiigèle tɔ́n lè, dánga saʔa a nan wi na.

²⁸ Syɛɛnpeebèle ga ni yìrigí lǎli ni lè, syɔɔn o syɔɔn n ni làrá, pe si ga ni kúu, syɛɛnsinbèle n ni nɛʔɛgi.