Kàseegèle 27 - Cebaara Bible 2010

¹ Mɔ a kɔ́ ra miyɛɛ gbɔ́ʔɔgi nyɛ̀ʔɛna kéeli na í, níì cán gee canʔa nibin a gbǎn see lè, mɔ ga gi cán í.

² Wàa nikwɔɔ yaʔa waa mɔ sòoló, ki a kɔ́ pye mɔ nyɔɔgi í, ki n yɛlɛ gi pye nibɔnwaa, ki a kɔ́ pye mɔ nyɔ́ɔwari í.

³ Kàdɛnɛgi n líbe, a táminyɔɔw líbe, kàjáa nidoligi fundanʔara n líbe n sɔ̀lɔ di tɛ́ɛyi siin na.

⁴ Fundanʔagbɔɔri i nyɛ nyinimɛ fun, fundanʔari i nyɛ lòcoologo gee gi kabi ni fóo lè, wìí si wi a gbǎn yére nyabɛɛnni sige?

⁵ Bi fúlo syɔɔn na kàfugi na, koro n pɔ́rɔ n sɔ̀lɔ tàmalaragi na.

⁶ Tàannyɛnnɛ kpàliya i nyɛ funvii wóyo, nigoò syɔɔnri syɔɔnrigèle si i nyɛ námara wòʔolo.

⁷ Syɔ́ɔnwee wi tín n kwɔ́ɔ lè, wi i ségbabiga tánʔana ní tɔ́lɔyi ní, kàjáa yasorori myɛ i nyɛ kateèjaaɔ má yataanra.

⁸ Syɔ́ɔnwee wi wi tɛɛkòrogo yaʔa lè níì yiri n léeli n sa ni curugu ni máari, wi i nyɛ àmɛɛ féjɛɛnnɛ nyɛ, lee li li zyàári yaʔa lè níì yìri n léeli n sa ni curugu ni máari.

⁹ Sǐnmi ní làtikɔliw i fundaanra kaangi fúngi ma, a tàannyɛnnɛ fûnnyingi si sɔ̀lɔ láliiw na syɔɔn kaangi wiyɛɛ ma lè.

¹⁰ Mɔ a kɔ́ mɔ taannyɛnnɛ, wàlá mɔ tóo tàannyɛnnɛ yaʔa í, mɔ a kɔ́ jée mɔ senyɛnnɛ̀ kpaʔa ni mɔ wɔʔɔgɔ canʔa na í. Tɛ́ɛnnyɛnwee wi nùuni mɔ na lè, wi n pɔ́rɔ n sɔ̀lɔ senyɛnnɛ̀ na, wee wi léeli mɔ na lè.

¹¹ Ni pyà, ki n yɛlɛ mi cìlige, mí mii fúngi kaan gi pye fundaanra na, mii si gbǎn syɛɛnlurugoro kaan wee má wi mii faari lè.

¹² Syɔ́ɔnwee wi cìlige lè, wi i kapeegi nyaagi ní i làrá. Kanaa-sìnjánbèle i sɔ̀lɔ́ kɔlɔ̀ na ní i wɔʔɔgi taagi.

¹³ Wi búrogi syɔɔ wi na, níì cán wi n wiyɛɛ bye wàa fwɔ́ɔlɔ séera. Yarigaa syɔɔ wi ma fwɔ́ɔli nyɔ́ɔ ni, nibɔnw kéele na.

¹⁴ Syɔɔn ga sɔ̀li n yìri ni dùba kpéʔele wi syɛɛnnyɛnnɛ ma ní yákpogbɔɔlɔ ní, koro n córo dánga kéele.

¹⁵ Lǒgee gi kòro ni sɔlɔ lè zàʔá canʔa na, ki ní kàsiitun-cɔ́ɔ i nyɛ sèjira.

¹⁶ Wee wi wi yéregi lè, káfalaga wi yéregi, sìnlɔʔɔ wi kɔ́gi có.

¹⁷ Tunmɔraa i tàa nyɔ́ɔ tàán, kánmi bee na syɔɔn i wi syɛɛnnyɛnnɛ kánmi fɛ̀ɛ́.

¹⁸ Wee wi děsyaantiige kɔ̀rɔsíi lè, wi a ra líi gi yasanri na, wee wi wi kàfɔlɔ kpáa wéle lè, pe a wi kpɔ́ʔɔ.

¹⁹ Amɛɛ syɔɔn wiyɛɛ yɛ́ɛgi nyaagi lɔ̀ʔɔ ni lè, kánmi bee na gee mɔ nyaagi syɔɔnwaa ni lè, koro gi nyɛ mɔ ni.

²⁰ Kúbèle tɛɛkòrogo, ní kálagili weecurugo o tíngi nyáana í, ànbée gi wɔ́ɔ̄ nyɛ, syɔɔn nyapiigèle o tíngi nyáana í.

²¹ Wálifiiw i sɛʔɛ tunweele ni, tɛ́ɛw si i sɛʔɛ fúru ni. Kánmi bee na pe i syɔɔn sɛʔɛ ni yɛlɛgi ní wi mɛ́ɛtaangi ní.

²² Alí mɔ ga nidoligo súu súgo ni yaliipyá nínge ni, ní sedinnɛ ní, ki nidolimi a láʔa gi na í.

²³ Ŋàʔana mi mɔ yaweeyiligèle kánma cán, da mɔ yaweeri gboogéle kɔ̀rɔsíi.

²⁴ Níì cán lɔ́ri a kòro beè làla o làla í, fànʔafɔ-nyùndɔnnɔ a wɔ́ɔ kòro beè bàā syée yaà yìrigèle myɛ syɛ̀ɛnnɛ ma í.

²⁵ Nyàásigi i láari a nyàápungi i yirigi, á nyanbeleyi nyàā fàari n kpóʔoro.

²⁶ Bàpiigèle a pye mɔ yaleri kéele na, sikepɔbèle si pára bi seʔe syɔɔ.

²⁷ Sikeyiremi a nɛʔɛ yɛlɛ mɔ liili kéele na, ní mɔ kpáagi wòolo liile kéele na, si mɔ falipyecebèle yaʔa be kòro sìi na.