Kàseegèle 26 - Cebaara Bible 2010

Gee gi joo lè nidoliyi kéele na

¹ Lànɛɛzyiw ga yɛlɛ wɔ̀ɔ́gi làla ni í, zěgi ga yɛlɛ yaliiri làrilaala ni í, kpɔ́ʔɔri ga yɛlɛ nilabalaɔ na í.

² Amɛɛ nìkɔlipile syoo lè, ní àmɛɛ zǎlɛɛlɛ yìrigí lè, kánmi bee na sábabu fun dánga a foro í.

³ Sapili i nyɛ syɔ́ɔngi kánma na, kàraféw i nyɛ jòfaniw kánma na, sàbinni si i nyɛ nilabalabèle kàdoyo kánma na.

⁴ Mɔ a kɔ́ syɛɛnlurugoro kaan nilabalaga ma bi yɛlɛ ní gi nidolimi ní í, jàngó mɔ a kɔ́ pye gi felege í.

⁵ Syɛɛnlurugori kaan nilabalagi ma mi yɛlɛ ní gi nidolimi ní, jàngó ki a kɔ́ pye ki nyɛnɛ̀ na koro i nyɛ sícilio í.

⁶ Wee wi nilabalaɔ tungu ní nyɔɔsyɛɛnrɛ ní lè, wi i wiyɛɛ tɔ́lɔyi cɛnɛ, ní i péemi gbo.

⁷ Amɛɛ tɔyaayi fɔ̀ɔlɔ tɔ́lɔyɔ fanʔa cɛ́rɛ lè, ànbée kàseele nyɛ nilabalabèle nyɔ́ɔyɔ ni.

⁸ Wee wi nilabalaga kpɔ́ʔɔgi lè, ki i nyɛ mɔ a jo kàdɛnɛgɛ wi pwɔɔ kàvɔrɔgɔ na.

⁹ Amɛɛ wúuro samiga nyɛ lè wojogo ní singbaadiɔn kɔ́lɔ ni, ànbée kàseele nyɛ nilabalabèle nyɔ́ɔyɔ ni.

¹⁰ Wee wi nilabalaga, ní wozeli-nanbèle lée fali na lè, wi i nyɛ mɔ a jo sedeŋɔɔɔ wii, wee wi syɛ́ɛnbèle myɛ kpèé lè.

¹¹ Nilabalagee gi lúrugu ki nidolimi ma lè, ki i nyɛ àmɛɛ pɔɔ̀n nyɛ, wee wi lúrugu wi tùguri kurugo lè.

¹² A mɔ syɔɔnwaa nyaa lé wee wi wiyɛɛ wéle lè sícilio? Bi mɔ sɔ̀ngumi taʔa nilabalaɔ na koro n pɔ́rɔ n sɔ̀lɔ wee bee na.

Sàlagafɔw kánma

¹³ Sàlagafɔw i gi nyuu níì jo: «Càarajogo i yaà kólogi na, càaraɔ i yaa kàlari-kóloyi ni.»

¹⁴ Amɛɛ kɔ̀ripiige céregi ni máari túnmɔri na pe gi le lè, ànbée sàlagafɔw kàragí ni máari wi yasinɛgi na.

¹⁵ Sàlagafɔw i wi kɔ́gi nii supɛɛli ni, kàjáa bi ní gi lúrugo tórigo wi nyɔ́ɔgi ma, wi n gee bee nyaa fɔ̀rɔgɔ.

¹⁶ Sàlagafɔw i wiyɛɛ wéle sícilio n sɔ̀lɔ syɛ̀ɛnnɛ kɔrɔsiin na, bele be syɛɛnlurugori kaangi ní sícilimɛ ní lè.

Kàseegèle kèle nikwɔɔlɔ

¹⁷ Kozɔ̀lɔɔ í jée kàsii ni wee wi lè wi o nyɛ wi jéemɛ í, ki i nyɛ mɔ a jo syɔɔnwaa wii, wee wi pɔɔ̀n cò líiyi na lè.

¹⁸ Amɛɛ fundanʔagafɔlɔ nyɛ, wee wi naanyìnye, ní ŋaaya, ní kùúw nyaragi lè,

¹⁹ ànbée syɔɔn nyɛ, wee wi wi syɛɛnnyɛnnɛ fáana ni pùuní lè ní i gi nyuu níì jo: «A mii da ni kɔ̀nʔɔ́ wii.»

²⁰ Kàjeri ga kólogo, náagi n fígi. Lóʔonjooo lɛɛlɛ ga fɔ̀n gi ni, kàa n yiri kàsiiw ni.

²¹ Amɛɛ kànʔana nyɛ naàniganw na lè, ní àmɛɛ kàjeri nyɛ náagi na lè, kánmi bee na kasiikuuɔn kàfulogi kpɔ́ʔɔgi.

²² Lóʔonjooo nyɔɔsyɛɛnrɛ i nyɛ àmɛɛ kanyindàangēle nyɛ lè, ti i tíri ni tɛ̀ɛ́n fwɔɔ láagi fúngo ni.

²³ Nyɔɔwari joojanma, ní zɔ̌nwee wi pee lè, gee bee i nyɛ àmɛɛ wálifiio fíre nyɛ, dee be tɛ́ʔɛ n cóoro kodɔɔlɔ pɔ̀li lè.

²⁴ Wee fúngo ni paragi nyɛ lè, wi i wiyɛɛ làragí ní wi nyɔɔwara-na-jóomi ní, níì námaraw yaʔa wiyɛɛ fúngi ni.

²⁵ Wi ga wi nyɔɔsyɛɛnri tɛ́nɛ, mɔ a kɔ́ tága wi na í, níì cán yanɔnʔɔyɔ kɔrɔsiin i nyɛ wi fúngi ni.

²⁶ Wi a gbǎn námaraw tɛ́ʔɛ bi wi paragi làriga, wi péemi a ba yiri kàfugi na syɛɛnkpoʔolomi ni.

²⁷ Wee wi weʔe túru lè, wi a too gi ni, kàdɛnɛgi si i lúrugu ni maa gi kòlogofɔw ma.

²⁸ Bele jànvaa nyínni para lè, li i be tɔ́nʔɔnɔ, nyɔ́ɔgee gi syɔɔn lɛ́ɛlɛ lè, ki i gàlagí kpéʔele.