Kàseegèle 25 - Cebaara Bible 2010

¹ Salomɔn kàseegèle kèle ge ní i nyɛ gele naa, gele Zyuda fànʔafɔw Ezekyasi syɛ́ɛnbèle yirige n sɛ́bɛ lè.

Kàseegèle kèle

² Bi keele làriga, koro gi nyɛ Kolocɔlɔɔ nìjangbɔɔri. Kàjáa bi kérigèle cɛɛlɛ, koro gi nyɛ fànʔafɔbèle nìjanra.

³ Nyɛ̀ʔɛgèle i nyɛ n yɛlɛ ní ge léeliganmi ní ǹjogi ni, tári i nyɛ n yɛlɛ ní di cùruganma ní, syɔɔn si a gbǎn fànʔafɔbèle fúnyo sɛʔɛ bi cán í.

⁴ Wálifiiw fíre láʔa wi na, wi a yiri yalege tɛɛ̀kpumɔnw ma.

⁵ Syɛɛnpeew láʔa fànʔafɔw na, wi fàngoli a sámaga yére sínni báriga ni.

⁶ Mɔ a kɔ́ miyɛɛ gbɔ́ʔɔ fànʔafɔw yɛ́ʔɛ ma í, mɔ a kɔ́ yére syɛɛnkpolobèle tɛɛ̀yérele ni í.

⁷ Níì cán pe ga mɔ pye: «Lúgu nɛɛ naa!» Koro n pɔ́rɔ n sɔ̀lɔ sáni pe kɔ́ mɔ cɛ́rɛ lè fànʔafɔbili yɛ́ʔɛ ma. Gee mɔ nyapiigèle nyaa lè,

⁸ mɔ a kɔ́ mɔ fúngi wáriga gi kútiiw joolo kurugo í, níì cán nyàʔá mɔ a kɔ́ ba pye kàdoʔo ma, lǎli ni mɔ syɛɛnnyɛnw ga baa mɔ curugo lè?

⁹ Da mɔ kútiiw kéele cɔɔnri ní mɔ syɛɛnnyɛnw ní, kàjáa mɔ a kɔ́ wàa nikwɔɔ kalarala joo yirige í,

¹⁰ jàngó wi ga gi lóʔo wi a kɔ́ mɔ faʔa, mɔ mɛ́ɛpɛɛngi sáā yiri í.

¹¹ Syɛ́ɛnree di joo lè n yɛlɛ ní di lǎli ní, ti i nyɛ àmɛɛ tɛɛ̀ pɔ́misanya nyɛ, yee yi nyɛ lè wálifiio yaleye ni.

¹² Líiweelee li sámagi ni lúro lè síciliw fúlolo i nyɛ li ma àmɛɛ tɛɛ̀ vèʔeo, wàlá tɛɛteleo fèrere nyɛ lè.

¹³ Amɛɛ lànɛɛzyiw káfalanyinnɛ nyɛ yaliilaa-lǎli ni lè, tundunwee wi nyɛ lè tágala syɔ́ɔn, ànbée woro nyɛ wi tunvɔbèle ma, wi i wi kàfɔw fúngo nyíngi.

¹⁴ Syɔ́ɔnwee wi wiyɛɛ sòoló lè n jo woro i kaangi n gi yaʔa wi o kaangi í, wi i nyɛ àmɛɛ nyɛ̀ʔɛwɔɔlɔ ní káfalaga nyɛ lè, zàʔá fun ni.

¹⁵ Kpàracogi báriga ni syɔɔn a gbǎn kútiijooo fúngo kàriga, nyinjànna si i kaceleye kabagi.

¹⁶ Mɔ ga sárigā taa, gee ki a mɔ tín lè, koro yagana lìi gi ni, jàngó mɔ a kɔ́ tín bi sɔ̀lɔ si gi tùgu í.

¹⁷ Mɔ tɔ́lɔgi jéele yaʔa li kpere mɔ syɛɛnnyɛnw kpaʔa ni, koro ga pye mɔ a kɔ́ wi sàri, wi kɔ́ mɔ para í.

¹⁸ Syɔ́ɔnwee wi jànvaa séera kpéʔele wi syɛɛnnyɛnnɛ kánma na lè, wi i nyɛ àmɛɛ kotinnige, ní ŋɔsée, ní ŋaafirigege nyɛ lè.

¹⁹ Bi miyɛɛ daʔa námarafɔlɔ na wɔʔɔgi canʔa na, wi i nyɛ àmɛɛ gǎngabila, ní tɔzeʔege nyɛ lè.

²⁰ Bàā ŋúnuyo ŋúu funnyɛnigɛ fɔ́lɔ ma, ki i nyɛ mɔ a jo mɔ n wi búrogi wòlo wi na weere canʔa ni, ní àmɛɛ be vinɛgiri le lè gbǎnga ni.

²¹ Kateʔe ga pye mɔ nígoo na, mi lìile kaan wi ma wi lìi. Lògbaʔa ga wi jáa, mi lɔ̀ʔɔ kaan wi ma wi gbaa.

²² Níì cán naàniganra mɔ a ra tɔ́ngi nya wi nyúngi na, Yawe si a tɔ̀nɔ kaan mɔ ma.

²³ Solomɔkulo kàbangi káfalaga i maa ní zěgi ní, nyínnee si li nyuu lè làrama ni li i nyɛ yɛɛtanʔaga gbanʔama.

²⁴ Bi kòro kpaʔa njoʔo jɛɛnnaa na, koro n pɔ́rɔ n sɔ̀lɔ kpaʔa korolo na ní kàsiikuun-cɔ́ɔ ní.

²⁵ Kùleelile syɛɛntaanra lóʔolo i nyɛ àmɛɛ lònyínge nyɛ lè syɔɔn ma, wee lògbaʔa jáa lè.

²⁶ Syɛɛnsinwee wi wiyɛɛ gaan syɛɛnpeeo ma lè, wi i nyɛ àmɛɛ pùnweele nyɛ, lee li mɔ́nɔgɔ lè, ní púloweele, lee li nɔ́nʔɔ lè.

²⁷ Bi sárigā saʔa lìi, gee bee ga nyɔɔ í, wàlá bi kòró da kpɔ́ɔmi caa í.

²⁸ Syɔ́ɔnwee wi lè wi ga gbàn ni wiyɛɛ kàragí í, wi i nyɛ àmɛɛ kàʔa nyɛ, gee be jáa lè ki si i nyɛ tò fun.