Kàseegèle 24 - Cebaara Bible 2010

¹ Syɛɛnpeebèle nyabɛɛnnɛ ga yɛlɛ li pye mɔ na í, pe pínɛnyɛnnɛgi láa ga yɛlɛ kaa mɔ taagi í.

² Níì cán gàlagíw be tímana be fúnyi ni, kagbanyi be nyɔɔwari nyuu.

³ Sícilimi báriga ni kpaʔa faanri, cánni báriga ni gi sámagi ni yèré.

⁴ Kérigèle cánna báriga ni kpaafunyi nyìngí lɔ́ri yacanra myɛ na syɔɔn caa lè.

⁵ Syɔ́ɔnwee wi cìlige lè, wi n nyìn séew na, wee má si cánni nyɛ lè, wi i kàa fàrá wiyɛɛ fǎngi na.

⁶ Níì cán ní tímanajànma ní mɔ a gbǎn kapɛɛnni kpúmɔn, yarifɔbèle ga nɛʔɛ, syɔɔlɔ n taa.

⁷ Sícilimi i nyɛ ǹjoʔo ma n léeli nidoligi na. Ki o nyɔ́ɔgi múru kěgi kpàánweele na í.

⁸ Wee wi kapeeyi kpéʔelele sɔ̀ngí lè, pe i wi yiri gàlagí kùndigi.

⁹ Nidolimi sɔ̀ngurɔ i nyɛ kapeele yagana, nɛ̀ɛnyɛnɛgi fɔ́lɔ si i nyɛ yanɔnʔɔgɔ syɛ́ɛnbèle ma.

¹⁰ Mɔ bárigaw ga kwɔ́ɔ wɔʔɔgi canʔa na, mɔ fangi n pye foomɔ wóʔo ní.

¹¹ Bele be kíle ni cáan kùúw ni lè, n fàra bele na be kɔ́ri ni syée tɛɛ̀kpoogi ma lè, ŋàʔana mi be syɔɔ.

¹² Mɔ ga gi joo níì jo: «Kányɛʔɛ na, wolo da gi cán í!» Wee wi fúnyi cáan cúlo na lè, wi a kòro lé ki sìnján ni? Wee wi mɔ siiw kɔ̀rɔsíi lè, woro ga gi cán ì, ní wɔ́ɔ i syɔɔn o syɔɔn sàrá ni yɛlɛgi ní wi kapyegèle ní ì?

¹³ Ni pyà, da sárigi líi, níì cán ki n nyɔɔ. Ségbabiga n tɛ́nɛ mɔ nyɔ́ɔgi na.

¹⁴ Kánmi bee na gi cán ànbée sícilimi a pye mɔ siiw ma. Mɔ ga bi taa, nyɛ̀ʔɛnaw i maa, mɔ sɔngumi tɛɛtaʔaga a ba kwɔ́ɔ yiri yaà í.

¹⁵ Syɛɛnpeeo, mɔ a kɔ́ làra bi syɛɛnsinw sige wi tɛɛkòrogi nyɔ́ɔ na í, mɔ a kɔ́ wi tɛɛ̀syɔɔngi kálagi í.

¹⁶ Níì cán syɛɛnsinw a gbǎn too tɔlɔyɔ kɔrɔsiin, si ní sèʔé yìri, kàjáa syɛɛnpeebèle i ŋɔrɔgi ni wáa wɔʔɔgi ni.

¹⁷ Mɔ nígoow ga too mɔ a kɔ́ ra fundaanra kpéʔele í, ní lǎli ni wi ga kpírige lè, mɔ fúngi a kɔ́ ra muguri í.

¹⁸ Jàngó Yawe a kɔ́ gi nyaa, gee bee si wi bɛɛn koro i wi kaan wi fundanʔari láʔa wi na í.

¹⁹ Mɔ a kɔ́ mɔ fúngi tanʔa bele kéele na be kapeeyi kpéʔele lè í, syɛɛnpeebèle nyabɛɛnnɛ a kɔ́ pye mɔ na í.

²⁰ Níì cán wobeew a nyɛ̀ʔɛnaw taa í, syɛɛnpeebèle fètinnɛ i fíri.

²¹ Ni pyà, da fɛ̀ɛgí Yawe, ní fànʔafɔw na. Mɔ a kɔ́ miyɛɛ nyáʔami syɛ́ɛnbèle bele ni be fíigi ni máari lè í.

²² Níì cán be wɔʔɔgi a pàla too be na, wìí si wi gi cán kpúmɔnri ti a nan pe myɛ nibin nibin na lè?

Sícilibèle láliiwaa

²³ Dee naa wɔ́ɔ i nyɛ sícilibèle syɛ́ɛnraa. Bi syɔɔnwaa yirige wàa ni kútiiw ni, gee bee ga nyɔɔ í.

²⁴ Wee wi gi nyuu syɛɛnpeeo ma lè níì jo: «Mɔ n sín!» Syɛɛnfeleyi i wi dángi, tári syɛɛnfeleye fúnyo i taanri wi kurugo.

²⁵ Kàjáa bele be fúlo wi na lè, pe a kacànna taa, pe a dùba ní fundaanra taa.

²⁶ Wee syɛɛnlurugoro di sín lè, wi i nyɔɔwara syɔɔnri syɔɔnri.

²⁷ Mɔ kafugi fáli kéele cɔɔnri, wi sámaga mi nyɔɔ mɔ ségi ni, koro kàdoʔo ma mí náa mi mɔ kpáagi faan.

²⁸ Mɔ a kɔ́ pye séera mɔ syɛɛnnyɛnnɛ kánmi na nyùngo fun í. Mɔ i caa lé bi syɔɔn fáana pùuni ní mɔ nyɔɔwari ní?

²⁹ Mɔ a kɔ́ gi joo í si jo: «Amɛɛ wi gi pye mii na lè, ànbée mii a gi pye wi na, mii a gi sìndɛɛgi lúrugo syɔɔn o syɔɔn ma bi yɛlɛ ní wi kapyegèle ní.»

Sàlagafɔw kánma

³⁰ Mii n sɔ̀lɔ sàlagafɔlɔ séʔe taana, ní nànwaa ɛrɛzɛn séʔe taana, wee wi lè sícilimɛ-fùnvɔlɔ.

³¹ Wéle, nìnaʔawireli maa fìin yaà tɛ́ɛyi myɛ ni, nyàápeegi maa gi tɛ́ɛyi myɛ tɔ́n, wi kàdɛnɛri kàkɔlɔgɔ maa too.

³² A mii sámaga n wéle kɔ̀rɔsii na, a mii nyaa, níì tamana taa mii nyaani báriga ni.

³³ Ŋúnɔmɔ cɛɛri, ŋúnɔsìnlɛɛlɛ cɛɛri, bi kɔ́yi mígi làla cɛɛri ni, si sínɛ,

³⁴ koro ki a fɔ̌ngi kaan gi pàlá too mɔ na àmɛɛ kàyuuo nyɛ lè, fóomi a too mɔ na àmɛɛ yakolio gi kpéʔele lè.