Kàseegèle 23 - Cebaara Bible 2010

¹ Mɔ ga tɛ́ɛn lìile na ní wogbɔɔɔ ní, ki n yɛlɛ mi yákirii yaʔa gbanʔama mɔ yɛ́ʔɛ ma wógi na.

² Mɔ ga pye laaweʔe fɔ́lɔ, mi ŋɔnɔ taʔa mɔ yákpodirigi na.

³ Wi yaliitaanri láa ga yɛlɛ bàā mɔ taagi í, níì cán námara lìile lii.

⁴ Mɔ a kɔ́ ra miyɛɛ fɔ̀rɔgí lɔ́ri caala kurugo í, mɔ sɔnguri láʔa di kéeli na.

⁵ Lɔ́ri mɔ wéle lè, cɛɛri ga pye mɔ n fɔ̀n di ni! Níì cán ti i fókaanya yirigi ni yìrigí ni syée ǹjogi ni àmɛɛ nyɔɔ̀ nyɛ lè.

⁶ Wee wi wéle ni kololo lè mɔ a kɔ́ lìi wi yaliiri na í, wi yaliitaanri láa a kɔ́ ra mɔ taagi í.

⁷ Níì cán gee wi tímana wi fúngi ni lè, koro gi nyɛ wi kánmi. Wi a mɔ pye: «Da líi, da gbo.» Kàjáa wi fúngi o nyɛ ní mɔ ní í.

⁸ Kanyinni mɔ lìi lè mɔ a li tùgu, mɔ tamagi syɛɛntaanra si nyɔʔɔrɔ.

⁹ Mɔ a kɔ́ joo nilabalaw líiye taana í, níì cán wi a mɔ sícilijǎnmi syɛ́ɛnrɛ faʔa.

¹⁰ Mɔ a kɔ́ láʔago-lɛ́ɛgi kàriga í, mɔ si a kɔ́ jée círibèle séʔe ni í.

¹¹ Níì cán pe gɔ̀lɔ́-wòlow fànʔa n kpɔ́ʔɔ. Wi a ba be kéeli cɔɔnri mɔ kánmi na.

¹² Mɔ fúngi múgu tamani ma, mí mɔ líiyi cáan cánni ma.

¹³ Mɔ a kɔ́ pìíw kpúmɔn-mí-kàrigala yaʔa í. Alí mɔ ga wi kpúmɔn ní sàbinnɛ ní, wi a kùu í.

¹⁴ Mɔ ga wi kpúmɔn ní sàbinni ní, mɔ a wi sìíw syɔɔ kúbèle tɛɛkòrogo ma.

Tofɔlɔ i wi jaà lálii

¹⁵ Ni pyà, sícilimɛ fúngo ga pye mɔ ni, mii fúngi a wɔ́ɔ ra fundaanra kpéʔele.

¹⁶ Mɔ nyɔɔwari ga ni kasingèle nyuu, mii a ra muguri fúngi ni.

¹⁷ Kapeebyebèle nyabɛɛnnɛ ga yɛlɛ bi pye mɔ na mɔ fúngi ni í, fwɔɔ mɔ í da fɛ̀ɛgí Yawe na canbogi myɛ ni.

¹⁸ Níì cán nyɛ̀ʔɛnaw i yaà, mɔ sɔngumi tɛɛtaʔaga a ba kwɔ́ɔ yiri yaà í.

¹⁹ Mɔ, ni pyà, ki n yɛlɛ mi lóʔo koro ga pye mɔ í cìlige. Mɔ fúngi fíige kôzingi ma.

²⁰ Mɔ a kɔ́ córo dùvɛɛngbaa-dínbèle nínge ni í, wàlá kaàkáabeegi fɔ̀ɔlɔ nínge ni í.

²¹ Níì cán fɔ̌ngi i tuun singbaadiɔn ní làáwologo fɔ́lɔ na, á ŋúnɔmi si i burobɛɛrɛ nii syɔɔn na.

²² Da mɔ tóow syɛ́ɛnrɛ lúro, woro wee wi mɔ see lè, mɔ si a kɔ́ mɔ nɔ́ɔw faʔa si pwɔɔ wi lɛɛ̀gwɔɔri na í.

²³ Kányɛɛgi syɔɔ, mɔ si a kɔ́ gi pára í, mí cánna, ní tamana, ní sícilimɛ taa.

²⁴ Syɛɛnsiɔn tóow tɔ̀nɔ́ i nyɛ fundaanra na, wee wi sícilio see lè, wi i muguri wi kéeli na.

²⁵ Ki n yɛlɛ mɔ tóow ní mɔ nɔ́ɔw í da fundaanra kpéʔele, céwee wi mɔ see lè, ki n yɛlɛ waa muguri.

²⁶ Ni pyà, mɔ fúngi kaan mii ma, mii kóloyi n yɛlɛ bi pye mɔ nyapiigèle kanidaanna.

²⁷ Níì cán kanɔnʔɔbyecew i nyɛ weecurugo. Nibɔnjew i nyɛ kɔ̀lɔ́bile.

²⁸ Wi i làrá ni sige àmɛɛ kàyuu-fànʔafɔlɔ nyɛ lè, ní i syɛɛnco-mí-kaanbèle nɛʔɛgi syɔɔn ye níngi ni.

Singbaadiɔn kánmi

²⁹ Wìí wóo wi nyɛ éew? Wìí wóo wi nyɛ ándóow? Wìí wóo wi nyɛ kàsiiw? Wìí wi wiyɛɛ kéeli fúlo? Wìí na kpàliyi nyɛ nyùngo fun? Wìí wòʔolo ge nyɛ nyapiinyɛɛngèle?

³⁰ Bele be tára n kòro dùvɛɛnw na ni gbo lè, bele be nyaari ni sînnyáʔamimi caa ni gbo lè, poro bɛɛ.

³¹ Mɔ a kɔ́ ra dùvɛɛnw wéle àmɛɛ wi sámaga n nyɛ́nɛgɛ lè í, ní àmɛɛ wi daragi yalegi ni lè í, ní àmɛɛ wi gbaama dɛ́nɛ lè í.

³² Wi kwɔ́ɔmi i nyɛ wi n syɔɔn nɔn àmɛɛ wàbiga nyɛ lè, wi i gáà wi nɔn àmɛɛ màátɔn nyɛ lè.

³³ Mɔ nyapiigèle a ba ra yanibɔnri wéle, mɔ fúngi a ba ra nyáʔami da nyuu.

³⁴ Mɔ a ba pye àmɛɛ syɔɔnwaa nyɛ, wee wi sínɛ sólomi lɔ̀ʔɔ nínge ni lè, àmɛɛ syɔɔnwaa nyɛ, wee wi sínɛ bàto fànicɔ̀rɔ-tiitɔnɔgɔ njoʔo ni lè.

³⁵ Mɔ a gi joo si jo: «Pe n mii kpúmɔn, ki ga mii yáa í! Pe n mii kpúmɔn n cáan, mii ga kàa cán gi ni í! Làlìí ni mii a yìri? Mii a ní da pàa caa bi gbaa!»