Kàseegèle 22 - Cebaara Bible 2010

¹ Mɛ́ɛtaangi n pɔ́rɔ n sɔ̀lɔ lɔnɛʔɛrɛ na, bi nyɔɔ syɔɔn na, á koro sɔ̀lɔ wálifiiw ní tɛ́ɛw na.

² Lɔrɔfɔlɔ ní fɔ̀ngɔfɔlɔ i peyɛɛ vàrá ni taagi, Yawe si wi pe myɛ siinw sámaga.

³ Syɔ́ɔnwee wi cìlige lè, wi i kapeegi nyaagi ní i làrá. Kàjáa kanaa-sìnjánbèle i sɔ̀lɔ́ kɔlɔ̀ na, ní i wɔʔɔgi taagi.

⁴ Màabyeri ní Yawe yɛ́ɛgi fyáara tɔnɔ wi nyɛ lɔ́ri, ní nìjanri, ní sìíw.

⁵ Wúuro ní karinyanya i nyɛ námarafɔw kólogo ni. Wee si wi wiyɛɛ sìíw kpáa wéle lè, wee bee i léeli di na.

⁶ Kólogee pyà yɛlɛ waa táanri lè, wi le gi ni. Alí wi ga baa lɛɛ, wi a láʔa gi na í.

⁷ Lɔrɔfɔw i tɛ̀ɛ́n foomɔfɔbèle nyúngo na, fwɔɔkuunw si i nyɛ fwɔɔlew púlo.

⁸ Wee wi sìnzinmi lúru lè, wɔʔɔgi wi a ba láa, wi fundanʔari kàgbeele si kwɔ́ɔ láʔa yaà.

⁹ Wee wi funjànga kpéʔele lè wi a dùba taa, níì cán wi i wi yaliiraa kaangi foomɔfɔw ma.

¹⁰ Nɛ̀ɛnyɛnɛgi fɔ́lɔ nɛnɛ, kàsiiw a kwɔ́ɔ. Kàfulogi ní faʔari a kwɔ́ɔ.

¹¹ Wee funviiri kéele dɛ́nɛ lè, wee nyɔɔwara na kpɔʔɔrɔ nyɛ lè, fànʔafɔw i nyɛ wi tàannyɛnnɛ.

¹² Yawe nyapiigèle i cánni kpáa wéle, kàjáa wi i námarafɔw syɛ́ɛnrɛ cáan tári na.

¹³ Sàlagafɔw i gi nyuu níì jo: «Càaraɔ i yaà kàfugi na! Wi a mii kpóo kàlari-kólogi nínge ni!»

¹⁴ Nànjaacebèle nyɔ́ɔyɔ i nyɛ weecurugo. Yawe fúngi ga tanʔa syɔ́ɔnwee kurugo lè, woro a too gi ni.

¹⁵ Nidolimi n pwɔɔ pyà zɔ̌nw na. Kpúmɔn-mí-kàrigali sàbinnɛ si a bi nɛnɛ láʔa wi na.

¹⁶ Wee wi fǎngi gbàngí foomɔfɔlɔ na lè, wi i wi kpéʔele lɔrɔfɔlɔ, wee wi lɔrɔfɔlɔ kaangi lè, fɔ̀ngɔ wi wáa wi na.

Sàmina, kérigèle kèle kɔ̀rɔsiile kéele na

¹⁷ Líiyi cáan, da sícilibèle syɛ́ɛnrɛ lúro. Mɔ fúngi yaʔa mii cánni na.

¹⁸ Níì cán mɔ ga di kɔn miyɛɛ ni, níì di yaʔa a di pye mɔ nyɔɔwari na, koro gi nyɔɔ.

¹⁹ Mii i caa bi wɔ́ɔ mɔ tama níjanʔa jàngó mɔ sɔngumi i pye Yawe na.

²⁰ Mii ga lálii, ní cánna syɛ́ɛnrɛ tɛɛyɛ toko ní kpɔrigɔ sɛ́bɛ n kaan mɔ ma ì?

²¹ Koro ga pye bi gi tɛ̀ɛn mɔ na, gee gi fílige lè ní i nyɛ kányɛɛgi syɛ́ɛnrɛ, jàngó mɔ í syɛɛnlurugoro taa, dee di nyɛ lè kányɛʔɛ bi sa joo mɔ tunvɔw ma.

²² Mɔ a kɔ́ fɔ̀ngɔfɔw fuguri í, si pwɔɔ wi fɔ̌ngi na í. Mɔ a kɔ́ foomɔfɔw faʔa kěgi kútiijoo-tɛʔɛ̀ ni í.

²³ Níì cán Yawe a ba be kéeli cɔɔnri. Bele pe be bɔ̀nɔ́ lè si poro bɔ̀nɔ be sìíw ni.

²⁴ Mɔ a kɔ́ miyɛɛ gbéʔele fundanʔa-dànʔafɔlɔ kòronyɛnnɛ í, mɔ a kɔ́ ra kòró ní syɛɛntanʔaɔ ní í.

²⁵ Jàngó mɔ a kɔ́ wi kóloyi tama í, koro si kɔ́ pye karinyanga mɔ siiw na í.

²⁶ Mɔ a kɔ́ pye bele ni be kadaagèle nii lè í, bele ni be fwɔɔgéle séera yéregi lè í.

²⁷ Nyàʔá na gi yɛlɛ pe kɔ́ ba mɔ yasinɛgi yirige mɔ láari ni kapye yarigaa ga baa taa mɔ ma bi li tɔ́n í?

²⁸ Mɔ a kɔ́ láʔago-lɛ́ɛgi kàriga í, gee mɔ toolɛɛbèle da kúun lè.

²⁹ Mɔ ga nànwaa nyaa wee wi cìlige wi fáliw pyele ni lè wi a yére fànʔafɔɔlɔ yɛ́ʔɛ ma. Wi a yére yébilimɛ syɛ̀ɛnnɛ yɛ́ʔɛ ma í.