Kàseegèle 21 - Cebaara Bible 2010

¹ Fànʔafɔw fúngo i nyɛ Yawe kɔ́gi ni àmɛɛ lɔ̀ʔɔ nyɛ, gee gi fóo lè, wi i gi kàragí ni tórogi kàbangee ma ki wi dɛ́nɛ lè.

² Syɔɔn nyɛ́nɛ na, woro kóloyi myɛ n sín. Kàjáa Yawe wi fúnyi cáan cúlow na.

³ Bàā sínni ní kányɛɛgi kèlē kpéʔele, Yawe n koro fúngo cán n sɔ̀lɔ sárigaw na.

⁴ Kpɔ́ɔmi wéleganma, ní fungbɔɔgi, ti nyɛ lè syɛɛnpeebèle fètinnɛ, koro i nyɛ kapeele.

⁵ Syɔ́ɔnwee wi nyɛ lè gbèé syɔ́ɔn, wi katimanagèle i wi tórogi taali ma, wee fúngo si gi wári lè, wi i tuun fóomi ni.

⁶ Námara nyínni lɔdaara i nyɛ káfalaga, gee gi sɔ̀lɔ́ lè, kùúw si i di kurugo.

⁷ Syɛɛnpeebèle tanʔara i be lée ni wáa, níì cán pe n kányɛɛgi kèlē kpéʔelele cée.

⁸ Kolomɔfɔw kólogo n kolo, kàjáa tɛɛlɛ fun syɔ́ɔnw kapyele n sín.

⁹ Bi kòro kpaʔa njoʔo jɛɛnnaa na, koro n pɔ́rɔ n sɔ̀lɔ kpaʔa korolo na ní kàsiikuun-cɔ́ɔ ní.

¹⁰ Syɛɛnpeeo fúngi i nyɛ kapeʔe kpéʔelele na. Alí wi o wi tàannyɛnnɛ cɔɔnri í.

¹¹ Pe ga nɛ̀ɛnyɛnɛgi fɔ́lɔ yɛ́ʔɛ wáriga, kanaa-sìnjánw n cìlige. Pe ga síciliw tama, wi n cánna taa.

¹² Wozinw i syɛɛnpeew kpaʔa kéele córo. Wi i syɛɛnpeebèle lée ni wáa wɔʔɔgi ni.

¹³ Wee wi wi líiweegèle tɔ́ngi foomɔfɔw sùpile na lè, wi tiimaw a ba ra yákpoli wáa, wàa si a lóʔo wi ma í.

¹⁴ Làrami yakanʔa i fundanʔari yéregi, bi námara kpɔ́ʔɔrɔ kaan burogbɔɔgi láara ni, koro i fundanʔagbɔɔri yéregi.

¹⁵ Kasinnɛ kpéʔelele i nyɛ syɛɛnsinw fundaanra kéele, kàjáa tooli i nyɛ bele wólo be kakoloyi kpéʔele lè.

¹⁶ Syɔ́ɔnwee wi pùuni n sícilimi kólogo yaʔa lè, wee bee a sa tɛ́ɛn kúbèle syɛɛnkpoʔolomɔ ni.

¹⁷ Wee kínidɛnɛgi kèlē kpéʔelele dɛ́nɛ lè, wi a kòro fóomi ni. Wee dùvɛɛnw ní sǐnmi dɛ́nɛ lè, wi a tée lɔrɔ taa í.

¹⁸ Syɛɛnpeew i nyɛ syɛɛnsinw nyùnzyɔɔ-yáriga, syɛɛnco-mí-kaanw si i nyɛ kolomɔ fun syɛ́ɛnbèle wóo.

¹⁹ Bi tɛ́ɛn táraa ni ti lè fìimɛ tára, koro n pɔ́rɔ n sɔ̀lɔ pínɛ-mí-tɛ́ɛnnɛ na ní kàsiikuun-cɔ́ɔ ní wi lè fungbanga fɔ́lɔ.

²⁰ Lɔ́ri yacanra ní sǐnmi i nyɛ síciliw kpaʔa ni. Kàjáa nilabalaw i ti myɛ jóori.

²¹ Wee wi taʔa sínni, ní funjǎngi na lè, wi i sìi, ní sínnɛ, ní nìjanra taagi.

²² Síciliw i sɔ̀lɔ́ ni jǐn nànniribèle kàʔa ni, fǎngee na pe da peyɛɛ daʔa lè, wi n koro kpúmɔn n cáan.

²³ Wee wi wi nyɔ́ɔgi, ní wi nyínni kpáa wéle lè, wi i wi sìíw kpáa wéle wɔʔɔgi na.

²⁴ Wee wi wiyɛɛ téeri ǹjoʔo ma, ní i wiyɛɛ gbɔ́ʔɔgi lè, woro mɛ́ɛgi gi nyɛ nɛ̀ɛnyɛnɛgi fɔ́lɔ. Wi i nɛ̀ɛgbɔʔɔgɔ fundanʔara kpéʔele.

²⁵ Sàlagafɔw ki laànitaʔa kele a wi kpóo, níì cán wi kɔ́yi ga fɔ̀lɔ bàā báara í.

²⁶ Yáriri láa i nyɛ wi na canbogi myɛ ni. Kàjáa syɛɛnsinw i kaangi, wi o cèʔé í.

²⁷ Syɛɛnpeebèle sáriga i nyɛ yanɔnʔɔgɔ. Pe ga náà wi wòlo ní sɔ̀ngubeere ní, a koro si tóro.

²⁸ Jànvaa séerafɔw a kùu, kàjáa syɔ́ɔnwee wi lúro lè, woro a gbǎn ra nyuu làla o làla.

²⁹ Syɛɛnpeew n wi yɛ́ɛgi waʔa, kàjáa syɛɛnsinw i kàa fàrá wiyɛɛ kólogi na.

³⁰ Sícilimɛ yoo, cánna yoo, lálii yoo, gee bee kàa faala o córo Yawe yɛ́ʔɛ ma í.

³¹ Syɔnʔɔ i pwoo kapɛɛnni canʔa kéele na, kàjáa Yawe má fàndaari nyɛ.