Kàseegèle 20 - Cebaara Bible 2010

¹ Dùvɛɛnw i nyɛ nɛ̀ɛnyɛnɛgɛfɔlɔ, singbǎnmi i nyɛ kàfulonɛʔɛgɛ. Wee wi ga pùuni n jée bi ni lè wi a pye sícilio í.

² Fànʔafɔw fundanʔara i nyɛ àmɛɛ càaraɔ kaanana nyɛ lè. Wee wi ga wi fúngi tanʔa lè, wee bee n kapeele pye wiyɛɛ na.

³ Bi miyɛɛ cò kàsiiw na, koro i nyɛ syɔɔn kpɔ́ʔɔri kéele, kàjáa nidoliyi myɛ i jángi.

⁴ Sàlagafɔlɔ o fála nyìnbegèle nyɔ́ɔ na í, yaliiri làrilaala ga nan wi n ni caa, wi si a yafyɛn taa í.

⁵ Láliiw i nyɛ syɔɔn fúngi ni àmɛɛ lòcurugo nyɛ lè, syɔ́ɔnwee wi cìlige lè wi n kóoganmi cán gi ni.

⁶ Syɛ̀ɛnnɛ saʔa i peyɛɛ funjǎngi kéele jáari ni máari, kàjáa syɔ́ɔnwee wi nyɛ lè tágala syɔ́ɔn, wìí wi a wi caa nyaa?

⁷ Syɛɛnsinw i táanri wi nyɔɔ-mí-foroli ni. Wi pìíbèle a ba pye naa dùba pìibēle wi kàdoʔo ma.

⁸ N fànʔafɔw yaʔa wodɛ́ɛɔn ní kútiiceri-koli na, wi nyapiiweleli n ni kapeeyi myɛ caragi.

⁹ Wìí wi a gbǎn gi joo si jo: «Mii n mii fúngi sámaga a gi pye dìgire fun, mii n niyɛɛ jée n mùnu n yirige kapeeli ni?»

¹⁰ Cúlo tunmɔnyin-níjanni féleye siin, ní yakiri-níjangi feleye siin i nyɛ yanɔnʔɔyɔ Yawe ma.

¹¹ Alí nìgɔcaripile i li kánmi tèé li kapyegèle báriga ni, bi gi tɛ̀ɛn kapye li tánʔaganmi a pye dìgire fun, si sín.

¹² Líiweelee li lúro lè, ní nyapilee li nyaagi lè, Yawe wi ge tɛ́ɛyi siin sámaga.

¹³ Ŋúnɔmi a kɔ́ mɔ dɛ́nɛ í, koro ga pye fɔ̌ngi a kɔ́ too mɔ na í. Nyapiigèle múgu, mɔ a tín lìíli na.

¹⁴ Yasyɔɔw i gi nyuu níì jo: «Ki ga nyɔɔ í! Ki ga nyɔɔ í!» Wi ga tɛ́nɛ̀ léeli yaà wi n sa ni wiyɛɛ gbɔ́ʔɔgi.

¹⁵ Tɛ́ɛw ní kɔ́nɔpiiye saʔa i yaà, kàjáa sícilimi nyɔ́ɔwara di nyɛ lɔgbanri yáriga n sɔ̀lɔ.

¹⁶ Wi búrogi syɔɔ wi na, níì cán wi n wiyɛɛ bye wàa fwɔ́ɔlɔ séera. Yarigaa syɔɔ wi ma fwɔ́ɔli nyɔ́ɔ ni, nibɔnw kéele na.

¹⁷ Námara yaliiri n tɛ́nɛ syɔɔn nyɔ́ɔgi na, kàjáa koro kàdoʔo ma wi nyɔ́ɔgi n nyìn kàdɛnɛbiiw na.

¹⁸ Nyaa-mí-joogèle i fànʔa nii katimanagèle ni. Da kapɛɛnni kpúmɔn ní tímanaganjànma ní.

¹⁹ Wee wi lóʔonjoow kpéʔele ni máari lè, wi i kalaragèle yirigi. Wee wi lè wi nyɔ́ɔgi o tɔ́ngi í, mɔ a kɔ́ ra kòró ní wi ní í.

²⁰ Wee wi joobeemɛ nyuu wi toò ní wi nɔɔ̀ na lè, wi fètinni a fígi yébiliwɔɔlɔ ni.

²¹ Kɔ́rigee gi pàla n taa lè, dùba a pye gi kwɔ́ɔmi na í.

²² Mɔ a kɔ́ gi joo í si jo: «Mii a kapeeli fwɔ́ɔlɔ tɔ́n.» Miyɛɛ daʔa Yawe na, wi a mɔ syɔɔ.

²³ Cúlo tunmɔnyin-níjanna féleye siin i nyɛ yanɔnʔɔgɔ Yawe ma, jànvaa cúlow o nyɛ yacanga í.

²⁴ Yawe wi syɔɔn nyɔngèle kàragí, kanmìí si na syɔɔn a gbǎn wiyɛɛ kólogi kɔ́rɔ cán bi sɛ́ɛ?

²⁵ Bi gi joo nyɔɔfuuro ni si jo: «Ki i nyɛ yawoloyaʔaga,» koro ní bi nyɔ́ɔgi fàli sìnzɔngi ni, gee bee a pye mɔ coli karinyanga.

²⁶ Fànʔafɔ-sícilio i syɛɛnpeebèle caragi, ní i lúru ni sɔ̀lɔ́ be na ní sàkogi ní.

²⁷ Syɔɔn pili i nyɛ Yawe fètinnɛ. Li i syɔɔn fúngi kèlē myɛ sɛʔɛ.

²⁸ Funjǎngi ní kányɛɛgi i fànʔafɔw kpáa wéle, wi i wi fàngoli sígi ni yéregi wi funjǎngi báriga ni.

²⁹ Nìgɔcaribèle nìjanra di nyɛ be fǎngi, ǹjoofiiri si i nyɛ wolɛɛbèle fèrere.

³⁰ Kpumɔn-námiyi yáala i nyɛ péemi tíinmɛ. Anbée kúruyi jǐn fwɔɔ ni nangi fúngi yárira na.