Kàseegèle 2 - Cebaara Bible 2010

Sícilimi i syɔɔn syoo kapeegi ma

¹ Ni pyà, mɔ ga fɔ̀lɔ mii syɛ́ɛnri na, níì mii kajoodɛɛngèle sámaga n cò mɔ fúngi ni,

² ní mɔ ga mɔ líiyi cáan sícilimi ma, níì mɔ fúngi yaʔa cánni na,

³ ɔ̀nhɔ́n, mɔ ga ni sícilimi yiri, ní i yákpoli wáa cánni kurugo,

⁴ mɔ ga ni li caa àmɛɛ wálifiio nyɛ lè, ni li caa ní kɔ̀rɔsíi ní àmɛɛ lɔrɔ nyɛ lè,

⁵ lǎli bee ni mɔ a Yawe yɛ́ɛgi fyáara kɔ́rɔ cán, mɔ si a Kolocɔlɔɔ cánni taa.

⁶ Níì cán Yawe i sícilimi kaangi, woro nyɔ́ɔgi ni kacánni, ní cánni yirigi.

⁷ Wi n taali kɔn n yaʔa syɛɛnsinbèle ma. Bele be táanri ní funviire ní lè, wi i nyɛ bele bee tunmɔzige-yáriga.

⁸ Wi i kányɛɛgi fɔ́lɔ kóloyo kpáa wéle, ni wi tágala syɛ́ɛnbèle kólogo kɔ̀rɔsíi.

⁹ Lǎli bee ni mɔ a sínni ní kányɛɛgi kɔ́rɔ cán, ní kasinbyeri, n fàra kérigèle myɛ na ge syɔɔn tórogi kacànna ma lè.

¹⁰ Níì cán sícilimi a ba jée mɔ fúngi ni. Cánni a pye mɔ fúngi kanidaanna.

¹¹ Kérigèle cɛɛlɛlɛ a ra mɔ kɔ̀rɔsíi, kacánni a ra mɔ kpáaw wéle,

¹² bàā mɔ syoo kobeegi ma, ní syɔ́ɔnwee ma wi námara jóomi nyuu lè,

¹³ ní bele má be sínni kóloyo yaʔa lè, ní i táanri yébilimi kóloyo ni,

¹⁴ poro bele be fundaanra kpéʔele lè kapeʔe pyele na, ní i muguri námaraw pyele na,

¹⁵ poro bele kóloyo yi wàli lè, á be kozɔ̀lɔyi kolo.

¹⁶ Kánmi bee na mɔ a miyɛɛ zyɔɔ kanɔnʔɔbyecew ma, ní nibɔnjew ma, woro wee syɛ́ɛnrɛ di tɛ́nɛ lè,

¹⁷ woro wee wi wi cárimi làla tàannyɛnnɛ cée lè, níì fɛ̀ʔɛ wi Kolocɔlɔw joogaanna na.

¹⁸ Níì cán wi kpáagi i jàarí ni syée kùúw kàbaan na. Wi kóloyi i syée ní syɔɔn ní kúbèle ma.

¹⁹ Bele myɛ be syée wi ma lè, pe wàa o lúrugu ni maa í. Pe a ní sìíw kóloyo taa í.

²⁰ Koro na da táanri kacànbyebèle kólogo ni, mí syɛɛnsinbèle kólogo sámaga mi cò.

²¹ Níì cán syɛɛnsinbèle a ba kòro tári ni, funviiw fɔ̀ɔlɔ a ba kòro beè di ni.

²² Kàjáa syɛɛnpeebèle a ba kwɔ́ɔ yirige yaà tári ni. Námarafɔbèle a ba kɔ́nɔgi bi yirige yaà.