Kàseegèle 19 - Cebaara Bible 2010

¹ Foomɔfɔwee wi táanri kányɛɛgi na lè, woro n pɔ́rɔ n sɔ̀lɔ námara nyɔɔwari fɔ́lɔ na wi lè nilabalaga.

² Bi lòmaana le keele kpéʔelele ni cánna fun ni, koro ga nyɔɔ syɔɔn faala ma í, wee tɔ́lɔyɔ yi wári lè, wi i tuun kapeele ni.

³ Syɔɔn nidolimi i wi kólogi kálagi, wi fúngi n si tanʔa Yawe kurugo.

⁴ Lɔ́ri i tàannyɛ̀nnɛ nɛʔɛgi, fɔ̀ngɔfɔlɔ tàannyɛnw si i wi yaari.

⁵ Jànvaa séerafɔw a gbǎn kòro wɔʔɔlɔ sìndaa ni í, ní wee wi jànvaaw nyuu ni máari lè, wi a gbǎn syɔɔ í.

⁶ Syɛ̀ɛnnɛ saʔa i cànma caa mɛ́ʔɛfɔlɔ ma. Wee si wi kaangi lè, wi i nyɛ syɛ́ɛnbèle myɛ tàannyɛnnɛ.

⁷ Fɔ̀ngɔfɔlɔ senyɛnbèle myɛ n wi para, n náa kɔ́ɔ̀ yére wi tàannyɛnbèle na pe wi yaari lè! Alí wi i caa bi pínɛ da nyuu ní be ní, kàjáa pe wàa ga nyaa í.

⁸ Wee wi ga sícilimɛ taa lè, wee bee n tàmaga le ní wi tiimaa sìíw ní. Wee wi ga cánni kɔn lè, wi i kacànna taagi.

⁹ Jànvaa séerafɔlɔ a gbǎn kòro wɔʔɔlɔ sìndaa ni í, ní wee wi jànvaaw nyuu ni máari lè, wi a kùu.

¹⁰ Nilabalaɔ í tɛ́ɛn kpɔɔmɔ na, gee bee ga yɛlɛ wi na í. Puloo í tɛ́ɛn fànʔafɔbiigèle nyúngo na, a koro si tóro!

¹¹ Syɔɔnwee wi keele cán lè, wi fúngi ga tanʔama dɛ́nɛ í, bi kolomɔ kusulugo syɔɔ, koro gi nyɛ wi kpɔ́ɔmi.

¹² Fànʔafɔw fundanʔara i nyɛ àmɛɛ càaraɔ kaanana nyɛ lè, wi funjǎngi si i nyɛ àmɛɛ kásaga nyɛ lè nyàā na.

¹³ Jaafɔ-labalaga i nyɛ gi toò ma wɔʔɔgɔ, cɔlɔɔ kàsiiw si i nyɛ àmɛɛ lɔ̀ʔɔ nyɛ, gee gi sɔlɔ ni ŋuu lè làla o làla.

¹⁴ Kpaʔa ní lɔrɔ i taagi kɔrigɔ tofɔɔlɔ ma, kàjáa cesicilio i nyɛ Yawe yakanʔa.

¹⁵ Sàlagi i ŋúnɔgbɔɔmɔ wáa syɔɔn na, ní wee wi lè wi fúngi o wi nyɛ́ʔɛri í, kateegi a wi jáa.

¹⁶ Wee wi tundunri kɔn lè, wi n wiyɛɛ sìíw kɔn. Wee wi lè wi o wi kôlaayi kɔ̀rɔsíi í, wi a kùu.

¹⁷ Wee wi nyinimɛ taagi lè foomɔfɔlɔ na, Yawe na wi fwɔɔlɔ nii, woro wi a ba wi kacǎnni sàra wi ma.

¹⁸ Mɔ piiw kpúmɔn mi kàriga lǎli ni mɔ a gbǎn wi kàriga lè, kàjáa wi kpóolo sɔngurɔ ga yɛlɛ bi pye mɔ ni í.

¹⁹ Wee fundanʔari kàragí lè, wi a gi sàra. Níì cán mɔ ga wi yaʔa wiyɛɛ ma, mɔ i kàa fàrá wi péemi na.

²⁰ Ki n yɛlɛ mi lálii syɛ́ɛnri lóʔo mí fɔ̀lɔ tamani na, jàngó ki kàdogi í ba pye mɔ í pye sícilio.

²¹ Katimanagéle saʔa i nyɛ syɔɔn fúngi ni, kàjáa Yawe kakɔrirɔli si li a foro.

²² Syɔɔn funjǎngi gi nyɛ wi tàánmi. Fɔ̀ngɔfɔlɔ n pɔ́rɔ jànvaafɔlɔ na.

²³ Yawe yɛ́ɛgi fyáara i syée ní syɔɔn ní sìíw ma, syɔ́ɔnw n pye ŋɔ́ndaala na yébilipogi myɛ ni, wɔʔɔgɔ a nan wi na í.

²⁴ Sàlagafɔw i wi kɔ́gi nii supɛɛli ni, wi si a ní caa gi lúrugo tórigo wi nyɔ́ɔgi ma í.

²⁵ Nɛ̀ɛnyɛnɛgi fɔ́lɔ kpúmɔn, nilabalagi a yákirii taa. Fúlo syɔ́ɔnwee na wi cìlige lè, wi a cánni kɔ́rɔ cán.

²⁶ Wee wi wi tóow kèlē kálagi lè, níì wi nɔ́ɔw nɛnɛ, wi i nyɛ jaafɔwaa, wee wi fɛ̀ɛ́ri kèlē kpéʔele lè ní i faʔara wáa syɔɔn na.

²⁷ Ni pyà, tamani li a mɔ pùuní léeli cánni syɛ́ɛnrɛ na lè, li lóʔoli yaʔa.

²⁸ Seerafɔ-nifaʔaga i kiyɛɛ nyɛ́nɛ sínni na, syɛɛnpeebèle nyɔ́ɔyɔ si i sìnzinmi jóori.

²⁹ Kútiiw kèlē n sámaga n kwɔ́ɔ nɛ̀ɛnyɛnɛgi fɔ̀ɔlɔ kánma na, a kúruyi sámaga n kwɔ́ɔ nilabalabèle kàdoyo kánma na.