Kàseegèle 18 - Cebaara Bible 2010

¹ Wee wi kòró lè wi nibin, wiyɛɛ kínidɛnɛgi yagana wi caa. Wi i tàányi myɛ túngu.

² Cánni kéele na ban nilabalaw fundaanra kpéʔele í, bi wi sɔ̀nguri tɛ̀ɛn, koro kurugo wi nyɛ.

³ Nipeew ga ni maa, faʔari n wɔ́ɔ ni maa. Fɛ̀ɛ́ri kèlē i maa ní faʔami ní.

⁴ Syɔɔn nyɔ́ɔgi syɛ́ɛnrɛ i nyɛ lòcuruyo. Sícilimi púloweele i nyɛ lòcoologo, gee gi càrí ni syée lè.

⁵ Bi syɛɛnpeeo yɛ́ɛgi wéle, si kolomɔ kaan syɛɛnsinw ma wi tàángi na, koro ga nyɔɔ í.

⁶ Nilabalaɔ nyɔɔwari i jǐn kàsii ni, wi nyɔ́ɔgi i kuruyo yiri.

⁷ Nilabalaɔ nyɔ́ɔgi i maa ní wi kálagili ní, wi nyɔɔwari i nyɛ wi pǐli còlo karinyanga.

⁸ Lóʔonjooo nyɔɔsyɛɛnrɛ i nyɛ àmɛɛ kanyindàangēle nyɛ lè, ti i tíri ni tɛ̀ɛ́n fwɔɔ láagi fúngo ni.

⁹ Wee wi sàlaga kpéʔele wi fáliw ni lè, wi i nyɛ gàlagipyeo senyɛnnɛ̀.

¹⁰ Yawe mɛ́ɛgi i nyɛ kpaataʔa-nirige. Syɛɛnsiɔn i fé ni jǐn gi ni ni syoo keele ma.

¹¹ Lɔrɔfɔlɔ lɔ́ri i nyɛ kènirige. Wi sɔ̀nguri na ti i nyɛ tò, wee wi lè keele a gbǎn wi taa í.

¹² Sáni kálagili í pye lè, syɔɔn fúngi má kpɔ́ɔmi gáà yìri, nìjanri si i maa nɛ̀ɛjɛrɛgi kurugo.

¹³ Wee wi syɛɛnlurugori kaangi sáni wi lóʔo lè, gee bee i nyɛ wi ma nidolimɔ, ní nyáʔamina kéele.

¹⁴ Syɔɔn pili i wi dɛ̀ɛmɛ́ yáami làla ni. Kàjáa pǐli báriga ga kwɔ́ɔ, wìí wi a wi yìrige?

¹⁵ Fúngee gi cìlige lè, ki i cánni taagi, sícilibèle líiweegéle si i cánni caa.

¹⁶ Syɔɔn yakaanri i kólogi múru wi ma fáa, ní i tɛɛ̀tɛ́nʔɛ kaangi wi ma wogbolobèle taana.

¹⁷ Syɛɛnseliw ga baa wi kéeli joo, mɔ n jo woro wi sín. Wi kàsiitun-nyɛ́nw ga baa joo, pe n níì wi kéeli sɛʔɛ.

¹⁸ Gɔ̌nwáari i kàkabalayi kwóo, ní i nànniribèle láʔala peyɛɛ na.

¹⁹ Senyɛnwee na be kapeele pye lè wi n gbàn n sɔ̀lɔ kènirige jáala na. Kàsiiw kèlē i nyɛ àmɛɛ fànʔafɔ-gbaʔa yasɔʔɔyɔ nyɛ lè.

²⁰ Syɔɔn i wi fícɛnni nyìngí wi nyɔ́ɔgi yasanra báriga ni, wi nyɔɔwari yárira báriga ni wi tíngi.

²¹ Kùúw ní sìíw i taagi nyínni fànʔa báriga ni. Wee li kéeli dɛ́nɛ lè, wi a ra líi li yasanri na.

²² Wee wi ga cɔlɔɔ caa n taa lè, wi n kacànga taa. Kpɔʔɔrɔ wi taa Yawe ma.

²³ Fɔ̀ngɔfɔlɔ i nyuu ní nyɛ́ɛrigɛ ní, á lɔrɔfɔlɔ si i syɛɛngbanra nyuu wi syɛɛnlurugori.

²⁴ Syɔɔn a gbǎn wɔʔɔgɔ taa wi taannyɛnnɛ báriga ni. Kàjáa tàannyɛnwaa i nyɛ wi a pwɔɔ mɔ na bi sɔ̀lɔ mɔ senyɛnnɛ na.