Kàseegèle 17 - Cebaara Bible 2010

¹ Bi búruwaa-cerile lìi yɛɛ̀nyinge na, koro n pɔ́rɔ n sɔ̀lɔ lìigbɔɔlɔ kpaʔa na beè kàsii nyɛ lè.

² Falipyewee wi cìlige lè wi i jaafɔw kàragí, wee wi fɛ̀ɛ́ri kèlē kpéʔele lè, si lɛɛlɛ taa kɔ́rigi ni senyɛnbèle nínge ni.

³ Wálifiiw i sɛʔɛ tunweele ni, tɛ́ɛw si i sɛʔɛ fúru ni, kàjáa wee wi fúnyi sɛʔɛ lè, woro wi nyɛ Yawe.

⁴ Wee wi kapeeyi kpéʔele lè wi i sìnzinmi nyɔɔwara syɛ́ɛnrɛ lúro, jànvaafɔlɔ i wi líiyi cáan nyinbeeli ma.

⁵ Wee wi wiyɛɛ nyɛ́nɛ foomɔfɔlɔ na lè, wi Faanfɔw wi faari. Wee wi fundaanra kpéʔele syɔɔnwaa wɔʔɔgɔ kéele na lè, syɔ́ɔnw bee a gbǎn kòro wi sàraw sìndaa ni í.

⁶ Pìinyanbiiyi i nyɛ wolɛɛbèle fànʔafɔ-nyùndɔngéle, tofɔbèle si i nyɛ be pìíbèle fèrere.

⁷ Bi syɛɛnrɛ joo, dee di báriga lè, toro ga yɛlɛ nilabalaɔ na í, n náa kɔ́ɔ̀ yére syɛɛnkpɔɔɔ í da jànvaa nyuu.

⁸ Námara kpɔ́ʔɔri i nyɛ àmɛɛ lɔgbanra kadɛnɛgɛ nyɛ lè di kaanfɔlɔ ma. Wi ga fíige kàbanga o kàbanga na, wi kérigèle i nyɔɔgi.

⁹ Wee wi kolomɔ kéele tɔ́ngi lè, wi i tàmagi caa, kàjáa wee wi li nyuu ni taʔala lè, wi i tàannyɛ̀nnɛ láari peyɛɛ na.

¹⁰ Syɔ́ɔnwee wi cìlige lè tɔlɔgɔ nibin fúlolo i wi có n sɔ̀lɔ sapiinyɛnyɛ dabata na pe kpúmɔn nilabalaga na lè.

¹¹ Syɛɛnpeeo o yafyɛn caa í, kapye céemi ban í, pe si a nyinimɛ fun tunduɔn tórigo wi kurugo.

¹² Bi fàra ní ursicaʔa ní, gee gi bɔ̀nɔ gi pìibēle ni lè, koro n pɔ́rɔ n sɔ̀lɔ nilabalaga farala na ki nidolimi ni.

¹³ Wee wi kacànna sàrá ní kapeʔe ní lè, wɔʔɔgi a tée yiri wi kpáagi ni í.

¹⁴ Kàsii sélimɛ i nyɛ àmɛɛ lɔ̀ʔɔ séli ni zùlu kabagi lè. Koro na ki n yɛlɛ mi tíi, sáni kàsiiw í kɔ́ yìri lè.

¹⁵ Wee wi tànʔa kaangi syɛɛnpeeo ma lè, ní wee wi kolomɔ kaangi syɛɛnsiɔn ma lè, pe myɛ siinw i nyɛ yanɔnʔɔyɔ Yawe ma.

¹⁶ Nyàʔá wáliw a nyɔɔ nilabalaɔ kɔ́lɔ ni? Sícilimi lé wi a syɔɔ ? Ki sícilimɛ o wi ni í.

¹⁷ Tàannyɛnnɛ i tàmagi nii làrigèle myɛ ni, senyɛnnɛ si i nyɛ dɛ̀ɛmɛni kpéʔelele kéele na wɔʔɔli làla ni.

¹⁸ Sícilimɛ-fùnvɔlɔ i kadaali nii wàa wólo ni, ní i wi syɛɛnnyɛnnɛ fwɔ́ɔlɔ séera yéregi.

¹⁹ Wee kàsiiw dɛ́nɛ lè, kapeebyeri n wɔ́ɔ̀ wee bee dɛ́nɛ. Wee wi wi kpaaweeli tɔnɔgi lè, kálagili wi caa.

²⁰ Námara fúngo o kacànna taagi í, wee nyínnɛ si li nyɛ lè námara wólo, wi i tuun wɔʔɔgi ni.

²¹ Wee wi nilabalaga see lè, fúngi wɔʔɔgɔ wi a taa. Nilabalaga tóo a tée gbǎn fundaanra kpéʔele í.

²² Fundaanra fúngo i nyɛ tiindaanma, kàjáa funjurugori i kaceleyi waari.

²³ Syɛɛnpeew i námara kpɔ́ʔɔrɔ syoo burogbɔɔgi láara ni, jàngó bi kútiisinw kàriga.

²⁴ Sícilimi i nyɛ syɔɔnwee taana wi cìlige lè, kàjáa nilabalaw nyapiigéle i wéle ni syée tári láʔala ma.

²⁵ Jaafɔ-labalaga i fundanʔara wáa gi tóow na, ki i funbɛɛnrɛ wáa céwee na wi gi see lè.

²⁶ Ki ga nyɔɔ be syɛɛnsiɔn kɔ́ri wi lámani sàra í, wàlá bi mɛ́ɛyɛ fɔɔlɔ kpúmɔn be sínni kéele na í.

²⁷ Wee wi wi syɛɛnjóori kɔ̀rɔsíi lè, cánni i nyɛ wi ma, wee fúngo gi nyíngi lè, wi n cìlige.

²⁸ Alí nidoligi ga pyèri lǎli ni lè, ki n córo sícilio. Wee wi wi nyɔɔwari tɔ́ngi lè wi i nyɛ syɔɔnwaa, wee wi cìlige lè.