Kàseegèle 16 - Cebaara Bible 2010

Yawe lɛɛlɛ i nyɛ canʔa o canʔa kérigèle ni

¹ Fúngi katimanagéle i nyɛ syɔɔn ma, kàjáa Yawe má nyínni syɛɛnlurugoro nyɛ.

² Syɔɔn kóloyi myɛ i nyɛ tɛɛlɛ fun wi nyɛnɛ̀ na, kàjáa Yawe wi pìígèle cáan cúlow na.

³ Mɔ kapyegèle kàlifáa Yawe ma, mɔ katimanagèle a ra forogi.

⁴ Nyùngo i nyɛ Yawe ma wi yakpéʔeleri myɛ na, àlí syɛɛnpeew i nyɛ wɔʔɔgi canʔa kánma na.

⁵ Nɛ̀ɛnyɛnɛgi fúnyo myɛ i nyɛ yanɔnʔɔyɔ Yawe ma. Ki n fílige ncan yi a tɔ̀nɔ́ kòro sìnwɔʔɔ ni í.

⁶ Funjǎngi ní kányɛɛgi a gbǎn kolomɔ kusulugo syɔɔ, syɔɔn si i láari kapeʔe pyele na Yawe yɛ́ɛgi fyáara báriga ni.

⁷ Syɔɔn tánʔaganmi ga Yawe dɛ́nɛ, àlí wi n wi nigoobèle yaʔa pe n pye bɛ̀ɛlɛ na ní wi ní.

⁸ Bi cɛɛri taa ní sínnɛ ní, koro n pɔ́rɔ n sɔ̀lɔ tɔ̀nɔnɛʔɛɔ taala na ní sìnzinmɛ ní.

⁹ Syɔɔn fúngi i wi kólogi kèlē tímana, kàjáa Yawe wi wi nyɔ̌ngèle sámagi ni yéregi.

Gee gi joo fànʔafɔbèle kéele na lè

¹⁰ Joogbanna i nyɛ fànʔafɔw nyɔ́ɔ na. Wi nyɔ́ɔgi ga ni jà kútiiw ceri lǎli ni lè, wi ga yɛlɛ wi ceri ní sìnzinmɛ ní í.

¹¹ Cúlow ní yakiriyi yi sín lè, ti i nyɛ Yawe wóro. Cúlow túnmɔnyingéle myɛ ge nyɛ lè gɔ̀nvaʔagi ni, koro wɔ́ɔ i nyɛ wi kɔ́yi fáli.

¹² Péemi kapyegèlē i nyɛ yanɔnʔɔgɔ fànʔafɔbèle ma, níì cán sínni báriga ni fàngoli fànʔa taagi.

¹³ Nyɔɔwaree di sín lè, toro i kacànna taagi fànʔafɔbèle ma, wee wi syɛɛnsinre nyuu lè, woro kéeli n be dɛ́nɛ.

¹⁴ Fànʔafɔw fundanʔagbɔɔrɔ i nyɛ kùúw tundunwaa, kàjáa syɔ́ɔnwee wi nyɛ lè sícilio woro a gbǎn gi télege.

¹⁵ Fànʔafɔw yɛ́ʔɛ ga sánʔa, koro i nyɛ sìi kéele, wi funjǎngi i nyɛ àmɛɛ zěseliye nyɛ lè.

Dɛ̀ɛmɛni ní kanjǎnmi kéele

¹⁶ Sícilimi taala n sɔ̀lɔ tɛ́ɛw taala na! Cánni taala n sɔ̀lɔ wálifiiw taala na!

¹⁷ Syɛɛnsinbèle kólogo gi nyɛ bi wàli léeli kapeegi na. Syɔ́ɔnwee wi wiyɛɛ kólogi kɔ̀rɔsíi lè, woro i wiyɛɛ sìíw kpáa wéle.

¹⁸ Kálagila i nyɛ nɛ̀ɛnyɛnɛgi kurugo, toolo si i nyɛ nɛ̀ɛgbɔʔɔgi kurugo.

¹⁹ Bi miyɛɛ dìrige bi pínɛ ní màámi fɔ̀ɔlɔ ní, koro n pɔ́rɔ n sɔ̀lɔ kapɛɛnni yataara lɛɛlɛ na ní nɛ̀ɛnyɛnɛgi fɔ̀ɔlɔ ní.

²⁰ Wee wi syɛ́ɛnri cángi ni láʔala lè, wi i kacànna taagi, wee wi wi sɔ̀nguri taʔa Yawe na lè, wi i nyɛ dùba pyà.

²¹ Wee wi nyɛ lè sícilio fúngi ni, pe i wi yiri kacaɔn, nyɔɔsyɛɛntaanri i cánni nɛʔɛgi.

²² Bele má sícilijǎnmi nyɛ lè, pi i nyɛ be má sìi púloweele, nidoliyi nidolimɔ si i nyɛ yi kpúmɔnri.

²³ Síciliw fúngo i wi nyɔ́ɔgi dɛ̀ɛmɛ́ kérigèle jooganma na, gee gi fàrá wi cánni na lè koro n ni nyaagi wi nyɔɔwari na.

²⁴ Syɛɛntaanri i nyɛ ségbabiga. Ti i nyɛ fúngi ma yatanʔa, ní i nyɛ céri ma tiinmɛ.

²⁵ Kologaa i yaà, gee gi sín syɔɔn nyɛ́nɛ na lè, ki kàdogi n si baa pye kùu kólogo.

²⁶ Falipyew kateèjaara n wi kɔ́ri wi i báara wiyɛɛ kéeli na, níì cán wi nyɔ́ɔgi gi wi wáa koro na.

²⁷ Nifaʔagi i kapeʔe sámagi ni yaari, ki i nyɛ mɔ a jo naagbanga i nyɛ gi nyɔ́ɔgi na.

²⁸ Syɔɔnwee wi lè námarafɔlɔ, wi i kàsii yìrigí, lóʔonjooo si i tàannyɛ̀nnɛ láari peyɛɛ na.

²⁹ Syɛɛntanʔaɔ i wi syɛɛnnyɛnnɛ lɛ́ɛlɛ ni pùuní, níì wi kɔ́ri wi i táanri kobeʔe ni.

³⁰ Wee wi nyapiigèle tɔ́ngi ní i námara kérigèle tímana lè, ní wee wi nyɔɔsaliyi nɔngi lè, wi n kapeegi pye n kwɔ́ɔ.

³¹ Njoofiiri i nyɛ nìjanra fànʔafɔ-nyùndɔnnɔ, sínni kólogo ni si li taagi.

³² Wee wi lè wi fúngi ga tanʔama dɛ́nɛ í, wi n sɔ̀lɔ nànnirio na, ní wee wi wiyɛɛ cǒmi cán lè, wi n sɔ̀lɔ wee na wi fànʔa taa kèkpɔʔɔ na lè.

³³ Pe i gɔ̌nw wáa búrogi na, kàjáa Yawe wi nyɛ syɛɛnsanri joofɔlɔ.