Kàseegèle 15 - Cebaara Bible 2010

¹ Fûnnyingi syɛɛnlurugoro i fundanʔari yéregi, joo-mí-kpàliw si i fundanʔari yìrigí.

² Sícilio nyínnɛ i kàa fàrá cánni nyɔɔnɔ na, kàjáa nilabalabèle nyɔ́ɔyɔ i nidolimi sòʔó ni ŋuu.

³ Yawe nyapiigèle i nyɛ tɛ́ɛyi myɛ ni, ni syɛɛnpeebèle ní syɛɛncanbèle nyaagi.

⁴ Syɛɛntaanri nyínnɛ i nyɛ sìi tíige, kàjáa lee ni námaraw nyɛ lè loro i fúngi kálagi.

⁵ Nidoligo i gi toò kpúmɔn-mí-kàrigali faari, kàjáa wee wi fúloli kéele córo lè, wi i kérigèle kpéʔele ní sícilimɛ ní.

⁶ Lɔnɛʔɛrɛ i nyɛ syɛɛnsinw kpaʔa ni, kàjáa syɛɛnpeew tɔ̀nɔ i nyɛ nyáʔamina.

⁷ Kacánbèle nyɔɔwara i cánni caragi, kàjáa nilabalabèle fúnyo o koro kpéʔele í.

⁸ Syɛɛnpeebèle sáriga i nyɛ yanɔnʔɔgɔ Yawe ma, kàjáa syɛɛnsinbèle nyɛ́ɛrigɛ n wi dɛ́nɛ.

⁹ Syɛɛnpeew kólogo i nyɛ yanɔnʔɔgɔ Yawe ma, wee si wi taʔa sínni na lè, wee bee kéele n wi dɛ́nɛ.

¹⁰ Wee wi kobili yaari lè, pe a wi kpúmɔn kàriga ní tanʔara ní, fúloli kéele ga wee bɛɛn lè, wi a kùu.

¹¹ Yawe nyɛ́nɛ i nyɛ kúbèle tɛɛkòrogo, ní kálagili weecurugo na n náa kɔ́ɔ̀ yére syɔɔn ye fúnyi na.

¹² Ki ga nɛ̀ɛnyɛnɛgi fɔ́lɔ dɛ́nɛ pe fúlo woro na í, wi o syée sícilibèle kàbaan na í.

¹³ Fundaanra fúngo i yɛɛcɔɔlɔ kàragí fundaanra wólo, fúngi si ga pye wɔʔɔgɔ ni, koro i pǐli báriga kwóo.

¹⁴ Fúngee gi cìlige lè ki i cánni caa, kàjáa nilabalabèle nyɔ́ɔyɔ i yiyɛɛ gbóo ní nidolimi ní.

¹⁵ Wɔʔɔgɔfɔw canya myɛ n pee, fundaanra fúngi si i nyɛ bàngwɔɔ lìigbɔɔlɔ fɛ́tii na.

¹⁶ Bi cɛɛri taa ní Yawe yɛ́ɛgi fyáara ní, koro n pɔ́rɔ n sɔ̀lɔ lɔnɛʔɛrɛ taala na, dee di nyɛ lè ní nyáʔamina ní.

¹⁷ Beè tanʔari líi lè tàmaga si i yaà, koro n pɔ́rɔ n sɔ̀lɔ sìnmɛ nɔ̀ɔ káara na, beè paragi nyɛ lè.

¹⁸ Fundanʔa-dànʔafɔlɔ i kàsii yìrigí, wee fúngo si gi nyíngi lè, wi i kàsiiw kwóo.

¹⁹ Sàlagafɔlɔ kólogo i nyɛ wúuro tɛɛsùlugo, kàjáa syɛɛnsinbèle kobile i nyɛ falafala.

²⁰ Pìisicilio i fundaanra kaangi wi toò ma, kàjáa nǎnwee wi labala lè, wi i wi nɔɔ̀ faari.

²¹ Nidolimi i nyɛ sícilimɛ-fùnvɔlɔ fundaanra, kàjáa syɔ́ɔnwee wi cìlige lè, wi i syée zìnmɛ na wi tánʔani na.

²² Nyaa-mí-joolo ga pye li o kpéʔele í, katimanagèle n ni kálagi, kàjáa yarifɔbèle ga nɛʔɛ, ke n ni nyɔɔgi.

²³ Syɔɔn nyɔ́ɔgi syɛɛnlurugoro ga nyɔɔ, ki i nyɛ wi ma fundaanra, bi syɛɛnsinri joo bi yɛlɛ ní di lǎli ní, a toro fundaanri si tóro.

²⁴ Wee wi cìlige lè, sìíw kólogo i syée ǹjogi ni ní woro ní, koro ga pye wi léeli kúbèle tɛɛkòrogo na ki lè táàma.

²⁵ Yawe i nɛ̀ɛnyɛnɛgi fɔ̀ɔlɔ kpaʔa ŋɔrɔgi ni cáan, kàjáa wi i lɔgucew kàcoolo tɛɛ̀laʔaya sámagi ni yéregi.

²⁶ Sɔ̀ngubeeri i nyɛ yanɔnʔɔgɔ Yawe ma, kàjáa syɛɛntaanri i nyɛ fɔɔnrɔ fun.

²⁷ Wee wi tɔ̀nɔpeew caa lè, wi i wɔʔɔgɔ cáan wi kpáagi na, wee si námara kpɔ́ʔɔri bɛɛn lè, wi a sìi taa.

²⁸ Syɛɛnsinw fúngo i sɔ̀ngí syɛɛnlurugori na si náa di kaan, kàjáa syɛɛnpeebèle nyɔ́ɔyɔ i syɛɛnpeeri sòʔó ni ŋuu.

²⁹ Yawe n léeli syɛɛnpeebèle na, kàjáa wi i syɛɛnsinbèle nyɛ́ɛrigɛ lúro.

³⁰ Wéleganmee bi nyɔɔ lè, pi i fúngi dàán. Syɛɛntaanra lóʔolo i fànʔa nii yasɛɛyɛ ni.

³¹ Wee wi líiyi cáan ni fúloli syɛ́ɛnrɛ lúro lè, dee di syɔɔn tórogi sìíw ma lè, wi a ra kòró sícilibèle nínge ni.

³² Wee wi kpúmɔn-mí-kàrigali cèʔé lè, wi i wiyɛɛ sìíw faari, wee si wi fúloli syɛ́ɛnrɛ lúro lè, wi i cánna taagi.

³³ Yawe yɛ́ɛgi fyáara i syɔɔn tama sícilimi na, kpɔʔɔrɔ i nyɛ màabyeri kurugo.