Kàseegèle 14 - Cebaara Bible 2010

¹ Cesiciliw i wi kpáagi faanri, wee si wi dóli lè, woro i wi wógi jee ní wi tiimaa kɔ́yi ní.

² Wee wi táanri sínni na lè, wi i fɛ̀ɛgí Yawe na, wee si wi kogoloyi táanri lè, woro i wi faari.

³ Kàgbeele i nyɛ nidoligi nyɔ́ɔ ni ki nɛ̀ɛnyɛnɛgi kánma na, kàjáa sícilibèle nyɔ́ɔyɔ i be kpáaw wéle.

⁴ Nìye ga pye yi o yaà í, yi yaliiri yalege n kòro wowaʔa ní, náapeli fànʔa si i tɔ̀nɔnɛʔɛɔ kaangi.

⁵ Séerafɔwee wi nyɛ lè tágala syɔ́ɔn, wi o finɛ í, jànvaa-séerafɔw si i jànvaaw caragi.

⁶ Nɛ̀ɛnyɛnɛgi fɔ́lɔ i cánni caa, wi si o li taagi í, wee si wi cìlige lè, cánni i nyɛ wi ma yataadanʔa.

⁷ Léeli nilabalaw na, níì cán mɔ a cánna taa wi nyɔ́ɔgi na í.

⁸ Syɔ́ɔnwee wi cìlige lè, woro sícilimi i nyɛ bi wi kólogi cán láʔa, nilabalabèle nidolimɔ si i nyɛ bi syɔɔn lɛ́ɛlɛ pùuní.

⁹ Nidoliyi i yiyɛɛ nyɛ́nɛ kolomi kùsulugo sáriga na, kàjáa funjǎngi i nyɛ syɛɛnsinbèle nínge ni.

¹⁰ Fúngi n kiyɛɛ tiimaa funbɛɛnri cán, nibɔɔn si a gbǎn pínɛ ní gi ní gi fundaanri na í.

¹¹ Syɛɛnpeebèle kpaʔa a jaa, kàjáa syɛɛnsinbèle fànikpaʔa a báriga.

¹² Kologaa i yaà, gee gi sín syɔɔn nyɛ́nɛ na lè, ki kàdogi n si baa pye kùu kólogo.

¹³ Alí syɔɔn a gbǎn ra tɛ́ʔɛ bi gi taa wi fúngi i wɔʔɔ, fundaanri kwɔ́ɔmɔ n si baa kàri funbɛɛnrɛ.

¹⁴ Wee fúngo gi pùuní lè, wi i tíngi wi kóloyi na, syɛɛncaɔn si i tíngi wiyɛɛ kérigèle na.

¹⁵ Syɔ́ɔnwee wi nyɛ lè kanaa-sìnjáɔn, wi i tági gee myɛ na be nyuu lè, syɔ́ɔnwee si wi cìlige lè, wi i wi nyɔ̌ngèle kɔ̀rɔsíi.

¹⁶ Síciliw i fɛ̀ɛgí ní i canʔana kapeegi na, kàjáa nilabalaw i keele kpéʔele funvuugo na, níì tága n tóro wiyɛɛ na.

¹⁷ Wee fúngo gi tanʔama dɛ́nɛ lè, wi i nidolimi kèlē kpéʔele, ní wee wi sɔ̀ngubeeri sɔ̀ngí lè, wi i paragi wáa wiyɛɛ na.

¹⁸ Kanaa-sìnjánbèle kɔ́rigɔ gi nyɛ nidolimi, syɛ́ɛnbèle si be cìlige lè, cánni li nyɛ poro fànʔafɔ-nyùndɔnni.

¹⁹ Syɛɛnpeebèle a ba ra kpùmɔnɔ́ syɛɛncanbèle yɛ́ʔɛ ma, kakolobyebèle í ba ra kpùmɔnɔ́ syɛɛnsinbèle kpaaweegéle na.

²⁰ Fɔ̀ngɔfɔw tɛ́ɛnnyɛnnɛ tiimaa wi wi para, kàjáa lɔrɔfɔlɔ tàannyɛnbèle n nɛʔɛ.

²¹ Wee wi wi syɛɛnnyɛnnɛ faari lè, wi i nyɛ kapeebyeo, wee si wi nyinimɛ taagi foomɔfɔbèle na lè, wi i nyɛ dùba pyà.

²² Bele be kapeegi tímana lè, pe o peyɛɛ pùuní wii ì? Bele si be kacǎnni tímana lè, poro ma funjǎngi, ní kányɛɛgi nyɛ.

²³ Tɔ̀nɔ i nyɛ fáliw myɛ pyele ni, kàjáa syɛɛnjóori yagana joolo i foomɔ cáan syɔɔn na.

²⁴ Sícilibèle fànʔafɔ-nyùndɔnnɔ li nyɛ be lɔ́ri, nilabalabèle nidolimɔ si i nyɛ làla o làla nidolimɔ.

²⁵ Kányɛʔɛ séerafɔlɔ i syɛ́ɛnbèle syoo, námara séerafɔlɔ si i jànvaaw caragi.

²⁶ Wee wi fɛ̀ɛgí Yawe na lè, sɔ̀ngumɔ tɛɛtaʔajanga i nyɛ wi ma, wi si i nyɛ wi pìíbèle ma tɛɛlaraga.

²⁷ Yawe yɛ́ɛgi fyáara i nyɛ sìi púloweele bi syɔɔn wàli léeli kùúw karinyanya na.

²⁸ Syɛ́ɛnbèle ga nɛʔɛ, koro i nyɛ fànʔafɔlɔ nìjanra, kàa si ga ni yirigi syɛ́ɛnbèle ni, koro i nyɛ fànʔafɔbili toolo.

²⁹ Wee wi lè wi fúngi ga tanʔama dɛ́nɛ í, wi i nyɛ sícilinɛʔɛmɛ fɔ́lɔ, wee fúngo si gi yìrimɛ dɛ́nɛ lè, wi i wi nidolimi jáari.

³⁰ Fúngee gi nyíngi lè, koro i nyɛ céri sìi, nyabɛɛnni si i nyɛ yaama, bee bi kaceleyi kúu lè.

³¹ Wee wi fǎngi gbàngí fànʔafunvɔlɔ na lè, wee wi wi faan lè woro wi faari, wee si wi nyinimɛ taagi fɔ̀ngɔfɔlɔ na lè, woro i Kolocɔlɔɔ kpɔ́ʔɔgi.

³² Syɛɛnpeew i tuun kapeegi kéele na wi kpéʔele lè, syɛɛnsinw si i tɛɛlarala taagi àlí wi kùúw làla ni.

³³ Sícilimi i kòró wee fúngo ni cánni nyɛ lè, àlí pi i cángi nilabalabèle nínge ni.

³⁴ Sínni i syɛɛnfelege kpɔ́ʔɔgi, kapeeli si i nyɛ syɛɛnfeleyi faʔara kéele.

³⁵ Falipyewee wi kérigèle sámagi ni cɔɔnri lè, fànʔafɔw i fɔ̀lɔ́ wee bee na, wee si wi fɛ̀ɛ́ri kèlē kpéʔele lè, wi fúngi a ra taanri wee bee kurugo.