Kàseegèle 13 - Cebaara Bible 2010

¹ Jaafɔ-sícilio i tofɔlɔ tamana lúro, kàjáa nɛ̀ɛnyɛnɛgi fɔ́lɔ o fúloli syɛ́ɛnrɛ lúro í.

² Syɔɔn i yacanga líi wi nyɔ́ɔgi yasanra báriga ni, kàjáa námarafɔbèle kánma bi nyɛ fundanʔari.

³ Wee wi wi nyɔ́ɔgi kpáa wéle lè, wi i wi sìíw kɔ̀rɔsíi, wee si wi nyuu lè nyɔɔkpɔʔɔ ni, wi i fé ni syée wi kálagili ma.

⁴ Yarira láa i nyɛ sàlagafɔlɔ na wi fúngi ni, wi si o di taagi í, kàjáa gee lòmaanafɔbèle caa be fúnyi ni lè, pe i gi taagi saʔa.

⁵ Jànvaa syɛ́ɛnri n tɔ̀nɔ n syɛɛnsinw bɛɛn, kàjáa syɛɛnpeew n wiyɛɛ gbéʔele yanibɛɛnmɛgɛ ní fɛ̀ɛrɛ yáriga.

⁶ Sínni i kodelegi tánʔafɔlɔ kpáa wéle, kapeeli si i nyɛ syɛɛnpeebèle toolo sábabu.

⁷ Syɔɔnwaa i wiyɛɛ dèé lɔrɔfɔlɔ, bi gi taa yafyɛn o nyɛ wi ma nyáana í, waa si i wiyɛɛ dèé fɔ̀ngɔfɔlɔ, bi gi taa lɔnɛʔɛrɛ i nyɛ wi ma.

⁸ Syɔɔn siiw syɔɔlɔ yariga gi nyɛ wi lɔ́ri, fɔ̀ngɔfɔlɔ si o syɛɛngbanra córo í.

⁹ Syɛɛnsinbèle gbɛ̀ɛnmɛ i nyɛ fundaanra wómɔ, syɛɛnpeebèle fètinnɛ si i fíri.

¹⁰ Nɛ̀ɛgbɔʔɔgi yagana gi kàfulogi yìrigí, sícilimɛ si i nyɛ bele má be láliiw lúro lè.

¹¹ Lɔbala-mí-taari i kwóo ni syée, wee si wi di caa ni kpóʔoro lè cɛɛri cɛɛri, ti i nɛʔɛgi wi ma.

¹² Sɔ̀ngumi tɛɛtaʔaga yáriga ga mɔn kólogi na, ki i yaama cáan syɔɔn fúngi na, gee si syɔɔn caa wi fúngi ni lè, ki ga taa, ki i nyɛ sìi tíige.

¹³ Wee wi syɛ́ɛnri faʔagi lè, wi a gi sàra, wee si wi tundunri kéele kpɔ́ʔɔgi lè, tɔ̀nɔ a kaan wi ma.

¹⁴ Síciliw tamana i nyɛ sìi púloweele, bi syɔɔn wàli léeli kùúw karinyanya na.

¹⁵ Yákiricǎnw i kpɔʔɔrɔ kaangi, kàjáa námarafɔbèle kólogo i nyɛ tɛɛ̀laʔala fun.

¹⁶ Syɔɔn o syɔɔn wi cìlige lè, wi i kérigèle kpéʔele ní cánna ní, kàjáa nilabalaw i wi nidolimi tèé kàfugi na.

¹⁷ Tundunbeew i tuun wɔʔɔgɔ ni, kàjáa tundunwee fúngo gi fílige lè, wi i maa ni pɔʔɔlɔ ní.

¹⁸ Wee wi tamani cèʔé lè, fɔ̌ngi, ní faʔari i tuun wee bee na, wee si wi wi sɔ̀ngumɔ yaʔa fúloli na lè, kpɔʔɔrɔ i nyɛ woro na.

¹⁹ Gee syɔɔn caa wi fúngi ni lè, ki ga taa, koro i fúngi nyíngi, kàjáa bi láʔa kapeegi na, koro i nyɛ nilabalayi má yafuungo.

²⁰ Wee wi táanri ní sícilibèle ní lè, wi n baa pye sícilio, wee si wi kòró ní nilabalayi ní lè, wi n baa pee.

²¹ Wɔʔɔgi i nyɛ kapeebyebèle kurugo, kàjáa syɛɛnsinbèle i sàrá ní kacànga ní.

²² Syɛɛncaɔn i kɔrigɔ yaari wi pìinyanbiiyi ma, syɛɛnpeew lɔ́rɔ si i kɔngi ni yaari syɛɛnsinw ma.

²³ Fɔ̀ngɔfɔbèle i yaliinɛʔɛrɛ taagi be tɛɛ̀falayi ni, pèle wóro si i kálagi sìnzinmi kéele na.

²⁴ Wee wi kpúmɔn-mí-kàrigali kàgbeele tɛ́ʔɛ lè, woro n wi pìíw para, wi pìíw kéele si ga wi dɛ́nɛ, wi a ra wi kpúmɔn bàā kàragí.

²⁵ Syɛɛnsinw i líi ni tíngi, kàjáa syɛɛnpeebèle fícarigèlē i kòró wowaagéle ní.