Kàseegèle 12 - Cebaara Bible 2010

¹ Wee gi dɛ́nɛ lè paa woro kpúmɔn da kàragí, cánni kéele n woro dɛ́nɛ, wee si wi lè ki ga wi dɛ́nɛ be fúlo woro na í, nilabalaga gii.

² Yawe i nyɔɔgi syɛɛncanw na, syɔɔnwee ni si sɔ̀ngubeeri nyɛ lè, Yawe i kolomɔ kaangi wee bee ma.

³ Péemi o kàa fàrá syɔɔn na í, syɛɛnsinbèle nìnge si a tée cúngo í.

⁴ Cecàɔn i nyɛ wi nǎnw fànʔafɔ-nyùndɔnnɔ, wee si wi fɛ̀ɛ́ri kèlē kpéʔele lè, wi i nyɛ yaama, bee bi wi nǎnw kaceleye kúu lè.

⁵ Syɛɛnsinbèle sɔ̀ngurɔ i nyɛ sínnɛ na yagana, syɛɛnpeebèle katimanagéle si i nyɛ námaraw.

⁶ Syɛɛnpeebèle syɛ́ɛnrɛ i nyɛ sìsyaan wori karinyanya, syɛɛnsinbèle nyɔ́ɔyɔ si i nyɛ syɔɔlɔ.

⁷ Syɛɛnpeebèle n wáa n cíbele, pe ní o beè í, á syɛɛnsinbèle kpaʔa si kòro woyérege ní.

⁸ Pe i syɔɔn sòoló ni yɛlɛgi ní wi sɔ̀ngujǎnmi ní, wee fúngo si gi kolo lè, wi i nyɛ yafaʔala.

⁹ Bi pye pe a kɔ́ ra mɔ córo í, falipyeo si tɛ́nɛ pye mɔ ma, mɔ n pɔ́rɔ n sɔ̀lɔ wee na wi wiyɛɛ gbɔ́ʔɔgi lè ní i nyɛ lìifɔnw ni.

¹⁰ Syɛɛnsinw i wi yaweeri màko nyɔɔgi, syɛɛnpeebèle láaya si i nyɛ tètée wóyo.

¹¹ Wee wi wi tári fála lè, wi i tíngi lìíli na, kàjáa wee wi syée gbanzan kérigèle kurugo lè, wi i nyɛ sícilimɛ-fùnvɔlɔ.

¹² Syɛɛnpeew i nyabɛɛnnɛ kpéʔele kakolobyebèle yacoro kéele na, syɛɛnsinbèle nìnre si i sangi.

¹³ Karinyanbeʔe i nyɛ kapeebyeri jóomɔ ni, syɛɛnsinw si i yirigi wɔʔɔgi ni.

¹⁴ Syɔɔn nyɔ́ɔgi yasanra báriga ni wi tíngi yáriri na di nyɔɔ lè, syɔɔn i taagi ni yɛlɛgi ní wi kɔ́yi kapyele ní.

¹⁵ Nilabalaw i wi kólogi wéle ki n sín, wee si wi cìlige lè, wi i láliiw lúro.

¹⁶ Nilabalaɔ i wi fundanʔari tèé kelekele, kàjáa sícilio i tɛʔɛlɛgɛ làragí.

¹⁷ Wee wi kányɛɛgi nyuu lè, wi i sínni tèé, jànvaa séerafɔw si i námaraw tèé.

¹⁸ Wee wi nyuu ni caanri lè nyùngo fun, wi syɛ́ɛnri i kpèé àmɛɛ ŋɔsée nyɛ lè, síciliw nyínnɛ si i pɔʔɔlɔ kpéʔele.

¹⁹ Kányɛɛjo-nyɔɔwari a báriga bi kòro beè làla o làla, jànvaa-joo-nyínni si a kwɔ́ɔ nyapiikololo nibin na.

²⁰ Námara i nyɛ bele fúnyo ni be kapeʔe tímana lè, bele si be lálii kpéʔele yɛɛ̀nyingi kéele na lè, fundaanri i nyɛ poro wóro.

²¹ Foomɔ faala o nangi syɛɛnsinw na í, á kapeeyi si syɛɛnpeebèle tín.

²² Jànvaa-joo-nyɔɔwari i nyɛ yanɔnʔɔgɔ Yawe ma, bele si be kérigèle kpéʔele kányɛɛgi na lè, poro kéeli n wi dɛ́nɛ.

²³ Syɔ́ɔnwee wi cìlige lè, wi i wi cánni làragí, nilabalabèle zɔ̀nbēle si i be labalami jáari.

²⁴ Lòmaani kɔ́yɔ a kùndigiri kpéʔele, kàjáa sàlagi i syɔɔn nii pɔrɔtɔɔri ni.

²⁵ Syɔɔn fúngi kasɔngurɔ i wi kpúmɔn ni cáan, syɛɛncanra si i fundaanra kaangi wi ma.

²⁶ Syɛɛnsinw i nyɛ yɛɛ̀kinio wi pínɛnyɛnw ma, syɛɛnpeebèle kólogo si i be pùuní.

²⁷ Salagafɔlɔ o wi seʔe kaàkpooro fwóo í, lòmaani si li nyɛ lɔgbanri yáriga syɔɔn ma.

²⁸ Sìíw i nyɛ sínni kóbile ni. Kobili bee o syɔɔn tórogi kùu ma í.