Kàseegèle 11 - Cebaara Bible 2010

¹ Jànvaa cúlow i nyɛ yanɔnʔɔgɔ Yawe ma, á kányɛɛgi cúlo tunmɔnyinnɛ kéele si wi dɛ́nɛ.

² Kpɔ́ɔmi ga pan, faʔari n wɔ́ɔ̀ pan, sícilimɛ si i nyɛ màabyebèle ma.

³ Syɛɛnsinbèle funviire i be yɛ́ɛgi kínigi, námarafɔbèle námara si i be kálagi.

⁴ Lɔ́ri a gbǎn ba yarigaa nyɔɔ fundanʔagbɔɔri canʔa na í, kàjáa sínni i syɔɔn syoo kùúw ma.

⁵ Funviirefɔw sínnɛ i wi kólogi síngi, syɛɛnpeew si i tuun wi péemi báriga ni.

⁶ Syɛɛnsinbèle sínnɛ i be syoo, kàjáa námarafɔbèle n cò ki laànitaagi karinyanga na.

⁷ Syɛɛnpeew ga kùu, wi sɔ̀ngumi tɛɛtaʔaga n wɔ́ɔ̀ kùu, gee na wi da wi sɔ̀ngumi taʔa lè, ki n kwɔ́ɔ.

⁸ Syɛɛnsinw n syɔɔ wɔʔɔgi ma, á syɛɛnpeew jée gi ni wi sìndɛɛgi ni.

⁹ Kolocɔlɔɔ téefɔw i wi tɛ́ɛnnyɛnw kálagi ní wi nyɔ́ɔgi ní, syɛɛnsinbèle si a syɔɔ cánni báriga ni.

¹⁰ Syɛɛnsinbèle ga kataanna taa, kěgi n ni muguri, syɛɛnpeebèle kálagila si i nyɛ fundaanra yákpowáara.

¹¹ Syɛɛnsinbèle dùba kpéʔelele i kàʔa yìrigí ǹjoʔo ma, kàjáa syɛɛnpeebèle nyɔ́ɔyɔ i gi jee.

¹² Wee wi wi syɛɛnnyɛnnɛ faari lè, wi i nyɛ sícilimɛ-fùnvɔlɔ, syɔ́ɔnwee si má cánna nyɛ lè, wi i pyèrí.

¹³ Wee wi mɛ́ɛkalagiri kpéʔele ni máari lè, wi i kalaragèle yirigi, wee má si tágala fúngo nyɛ lè wi i ge làragí.

¹⁴ Kérigèle cɔɔnrilɔ ga fɔ̀n beè, syɛ́ɛnbèle n ni tuun, yarifɔbèle si ga nɛʔɛ, syɔɔlɔ n taa.

¹⁵ Wee wi ga wiyɛɛ bye lè wàa fwɔ́ɔlɔ séera, wi n kapeʔe taʔa wiyɛɛ na, wee si fwɔ́ɔgèle séera bɛɛn lè, wi i nyɛ yɛɛ̀nyinge na.

¹⁶ Funjànga cɔ́ɔ i kpɔʔɔrɔ taagi, syɛɛntanʔabèle si i lɔ́ri taagi.

¹⁷ Funjànga nàɔn i kacànna kpéʔele wi sìíw na, kàjáa nyinimɛ-fùnvɔw i wɔʔɔgɔ cáan wiyɛɛ céri na.

¹⁸ Syɛɛnpeew tɔ̀nɔtaaɔ i wi jànváa, wee si wi sínni lùguro lúru lè, wi i kányɛʔɛ sàra taagi.

¹⁹ Wee wi kòro sínni ni lè, wi i syée sìíw ma, wee si wi taʔa kapeegi na lè, kùúw má wi syée.

²⁰ Bele be nyɛ lè námara fúnyi fɔ̀ɔlɔ pe i nyɛ yanɔnʔɔyɔ Yawe ma, bele tánʔaganma si bi nyɔɔ n foro lè pe kéeli n wi dɛ́nɛ.

²¹ Kanma o kanma na syɛɛnpeeo a gbǎn kòro wɔʔɔlɔ sìndaa í, kàjáa syɛɛnsinbèle yòdaʔaya si a syɔɔ.

²² Céwee wi nyɔɔ céri na lè, ní i nyɛ yákirii fun, wi i nyɛ àmɛɛ tɛɛ̀ vèʔeo nyɛ, wee be le gbòyoʔo fínaʔa na lè.

²³ Gee syɛɛnsinbèle caa lè koro gi nyɛ kacǎnni yagana, gee si syɛɛnpeew sigi lè, koro gi nyɛ fundanʔagbɔɔri.

²⁴ Syɔɔnwaa i yaà wi n wi kɔ́gi sánʔa ni kaangi, kàa si n ni fàrá wi lɔ́ri na, wàa si i yaà wi kɔ́gi n gbàn n sɔ̀lɔ ki dǎnw na, fóomi n si baa too wi na.

²⁵ Wee wi dùba kpéʔele lè, wi a taa saʔa, wee wi pèle kaangi lɔ̀ʔɔ na pe i gbo lè pe a wɔ́ɔ wi tiimaw kaan lɔ̀ʔɔ na wi gbaa.

²⁶ Wee wi cée bilew párala na lè, syɛ́ɛnbèle i wee bee dángi, wee si wi wi pára lè, dùbaw i nyɛ wee bee nyúngo na.

²⁷ Wee wi wiyɛɛ daʔa kacànbyeri na lè, wi i kacànna taagi, wee si wi kapeegi caa lè, kapeegi a wɔ́ɔ nan wi na.

²⁸ Wee wi wiyɛɛ daʔa wi lɔ́ri na lè, wi a too, kàjáa syɛɛnsinbèle a ra fún àmɛɛ wara nyɛ lè.

²⁹ Wee wi wi kpáagi nyáʔami lè, káfalaga kɔ́rigɔ wi a lìi, nilabalaw si ba pye puloo, wee má wi cìlige lè.

³⁰ Syɛɛnsinw yasanga i nyɛ sìi tíige, síciliw si i fúnyi taagi ni có.

³¹ Syɛɛnsinw ga wi sàraw taa naa tári na, syɛɛnpeew ní kapeebyew wóʔo a tóro.