Kàseegèle 10 - Cebaara Bible 2010

Salomɔn kàseegèle kèle sìíw nàʔama kéele na

¹ Salomɔn kàseegèle. Jaafɔ-sícilio i fundaanra kaangi wi toò ma. Jaafɔ-labalaga si i funbɛɛnrɛ wáa ki nɔɔ̀ na.

² Lɔ́ree di taa kanbeemɛ na lè, ti i nyɛ tɔ̀nɔ fun, sínni si i syɔɔn syoo kùúw ma.

³ Yawe o syɛɛnsiɔn yaari wi i wɔʔɔ kateegi kɔ́yɔ ni í. Kàjáa wi i syɛɛnpeebèle ki laànitaʔa yáriri ŋɔrɔgi ni léeli be na.

⁴ Syɔ́ɔnwee wi báara kɔvɔlɔmɔ ni lè, fɔ̌ngi i tuun wi na. Bele kɔ́yɔ si ni fànʔa nyɛ lè fáliw pyele na, pe i yarigaa taagi.

⁵ Wee wi yaliiri kpóʔoro wɔ̀ɔ́kwɔɔri na lè, wi i nyɛ jaafɔ-sícilio, wee si wi ŋúnɔ yaliiri làrilaala ni lè, wi i nyɛ jaafɔlɔ, wee wi lè fɛ̀ɛrɛ wóo ní.

⁶ Dùbaw kèlē i nyɛ syɛɛnsiɔn nyúngi ni, kàjáa tanʔari i syɛɛnpeebèle nyɔ́ɔyɔ tɔ́ngi.

⁷ Syɔɔn i sɔ̀ngí ni taagi syɛɛnsiɔn na ni i dùba kpéʔele, kàjáa syɛɛnpeebèle mɛ́ɛyɛ i tuun ni fɔ́ɔnri.

⁸ Wee wi cìlige wi fúngi ni lè, wi i fɔ̀lɔ́ kajoodɛɛngèle na, kàjáa wee wi nyɛ lè nilabalaga jooganmi ni, wi i fé ni syée wiyɛɛ kálagili ma.

⁹ Wee wi táanri funvii na lè, wee bee a tɛ́ɛn ŋɔ́ndaala na, wee si wi kogoloyi táanri lè, wee bee kéele a ba cán.

¹⁰ Wee wi nyapiigèle fɛ́nʔɛ ní i wéle lè, wi i fɔ̀rɔgɔ kaangi, wee si wi nyɛ lè nilabalaga jooganmi ni wi i fé ni syée wiyɛɛ kálagili ma.

¹¹ Syɛɛnsinw nyɔ́ɔ i nyɛ sìi púloweele, kàjáa tanʔari i syɛɛnpeebèle nyɔ́ɔyɔ tɔ́ngi.

¹² Paragi i kàsii yìrigí, tàmagi si i kolomi kèlē myɛ tɔ́ngi.

¹³ Wee wi keele cán lè sícilimi i nyɛ wi nyɔɔwari na, kàjáa sàbinni i nyɛ nilabalaw kàdoʔo wólo.

¹⁴ Sícilibèle i cánni kɔngi ni yaari, kàjáa nilabalaw nyɔ́ɔ i nyɛ kálagila, lee li maa lè.

¹⁵ Lɔrɔfɔw lɔnɛʔɛrɛ i nyɛ wi ma kènirige, foomɔfɔbèle fɔ̀ngɔ si i nyɛ be tooli.

¹⁶ Syɛɛnsinw fáli sàra i nyɛ sìíw wóo, syɛɛnpeew tɔ̀nɔ si i nyɛ kapeeli wóo.

¹⁷ Wee wi kóroli kéele cò lè, wee bee n sìíw kólogo láa, wee si wi fúloli kéele faari lè, wee bee i wiyɛɛ pùuní.

¹⁸ Wee wi paragi làragí lè, wi nyɔɔwari i jànvaaw jáari, ní wee wi mɛ́ɛkalagiri kpéʔele ni máari lè nilabalaɔ wii.

¹⁹ Wee wi nyuu ni caanri lè, kapeele o fɔ̀ngí wi na í, kàjáa wee wi wi nyɔ́ɔgi có lè, yákiricàɔn fɔ́lɔ wii.

²⁰ Syɛɛnsinw nyínnɛ i nyɛ àmɛɛ wálifiiw wodeleo nyɛ lè, syɛɛnpeebèle zɔ̀nbēle si i nyɛ tɔ̀nɔ fun yáriga.

²¹ Syɛɛnsinw nyɔ́ɔ i syɛ̀ɛnnɛ saʔa gbóo, nilabalabèle si i kúu yákirifunmi kéele na.

²² Yawe dùbaw wi syɔɔn kpéʔele yarigaa fɔ́lɔ, wi o fɔ̀rɔgɔ faala fàrá wi na í.

²³ Kapeʔe pyele i nyɛ nilabalaw ma kɔ̀nʔɔrɔ, àmɛɛ sícilimi nyɛ lè keele cánvɔw ma.

²⁴ Gee na syɛɛnpeew fɛ̀ɛgí lè, koro gi nangi wi na, gee si syɛɛnsinbèle caa lè, ki a kaan be ma.

²⁵ Lǎli ni káfala-sìnjinni sɔ̀lɔ lè, syɛɛnpeeo ga níì nyaa í, syɛɛnsinw kàpɔɔn si i nyɛ bàngwɔɔ wóo.

²⁶ Amɛɛ vinɛgiriw nyɛ ní gǎngèle ní lè, ní àmɛɛ wírigi nyɛ ní nyapiigèle ní lè, ànbée sàlaga fɔ́lɔ nyɛ wi tunvɔbèle ma.

²⁷ Yawe yɛ́ɛgi fyáara i syɔɔn siiw canya nɛʔɛgi, kàjáa syɛɛnpeebèle sìi yɛ̀ʔɛlɛ n cɛ́rɛ.

²⁸ Syɛɛnsinbèle sɔ̀ngumɔ tɛɛtaʔaga i nyɛ fundaanra, gee si syɛɛnpeebèle sige lè, ki a ba kálagi.

²⁹ Yawe kólogi i nyɛ tò funviiri fɔ̀ɔlɔ ma, ní si i nyɛ kapeebyebèle ma kálagila.

³⁰ Syɛɛnsinw a tée cúngo í, kàjáa syɛɛnpeebèle a tɛ́ɛn tári ni í.

³¹ Syɛɛnsinw nyɔ́ɔ i sícilimi sangi, kàjáa námara nyínni a ceri.

³² Syɛɛnsinw nyɔ́ɔwara n kacǎnni cán, syɛɛnpeebèle nyɔ́ɔyɔ si i nyɛ námaraw.