Kapyegèle 8 - Cebaara Bible 2010

¹ Sɔli si maa fɔ̀lɔ Etyɛni kpóoli na. A wɔʔɔgbɔʔɔ fala n yìri Zyerusalɛmi Egiliziw kurugo cángi bee na. A tágafɔbèle myɛ cariga n kári Zyude tári tɛ́ɛyɛ myɛ ni ní Samarii tári ní, kapye pìitunbèle yagana ban í.

Sɔli n Egiliziw wɔʔɔ

² Bele be fɛ̀ɛgí Kolocɔlɔɔ na lè, a poro Etyɛni láa n sáà tɔ́n, ní i nyaan gbanʔama wi kéeli na.

³ Sɔli si maa tɔ̀nɔ ni Egiliziw kálagi. Wi maa ni jǐn kpáayi ni, ni nǎnbèle ní cébèle có ni kíle ni syée n sa ni nii kàsow ni.

Filipi i Syɛɛnjóocǎnri nyuu Samarii ni

⁴ Bele be cariga lè a poro i syée tɛ́ɛyi myɛ ni n sa ni Syɛɛnjóocǎnri nyuu yaà.

⁵ Filipi si maa tìgi n kári Samarii kègaa ma n sa ni Kirisi kéeli nyuu yaà syɛ́ɛnbèle ma.

⁶ A pe ga ni Filipi syɛ́ɛnri lúro ní i kakpoloyi nyaagi, yee wi kpéʔele lè, a syɛ̀ɛnnɛ saʔa di sámaga n lóʔo, níì di cò ní fungo nibin ní.

⁷ Níì cán màdebèle maa ni yákpogèle wáa gbanʔama ní i yirigi màdebèle fɔ̀ɔlɔ saʔa ni, a syɛɛnmɔngɔbèle saʔa ní tɔyaayi fɔ̀ɔlɔ saʔa i poori.

⁸ A fundaangbɔɔrɔ tɔ̀nɔ n pye kěgi bee ni.

⁹ Nànwaa si maa téè pye yaà kěgi bee ni pe i wi yiri Siimɔn, wi maa pye sàndooo ní i sícilimi kèlē kpéʔele, a Samarii tári syɛ̀ɛnnɛ i káama ge na, a wi i gi nyuu lǎli bee ni níì jo, woro i nyɛ syɛɛnkpɔɔɔ.

¹⁰ A pe myɛ i lúro wi ma kányɛʔɛ ni n syɛɛn-yilibèle pínɛ wogbolobèle ni, a be i gi nyuu níì jo: «Kolocɔlɔɔ séew be yiri lè Wogbɔɔw, nǎnw naa wi nyɛ séew bee.»

¹¹ Pe maa ni lúro wi ma kányɛʔɛ ni, níì cán ki maa séli yaà làridɔɔnnɔ ni, a be i káama wi sícilimi kèlē na.

¹² Kàjáa a Filipi ga Syɛɛnjóocǎnri joo be ma Kolocɔlɔɔ fǎngi kéele, ní Zyezu Kirisi mɛ́ɛgi kéele na, a nǎnbèle ní cébèle tága níì batɛmiw kpéʔele.

¹³ Siimɔn tiimaa maa wɔ́ɔ̀ tága, lǎli ni wi batɛmiw kpéʔele n kwɔ́ɔ lè, a wi tan Filipi na, àmɛɛ wi fɛ̀ɛkpoloyi ní kakpoloyi nyaa yi i kpéʔele lè, a wi i káama.

¹⁴ Pìitunbèle be pye yaà lè Zyerusalɛmi ni, a pe ga gi lóʔo Samarii ye n Kolocɔlɔɔ syɛ́ɛnri lóʔo níì di cò, a be Pyɛri ní Zyan tórigo yaà be ma.

¹⁵ A bele bee kári n sáà Kolocɔlɔɔ nyɛ́ɛri be kéeli na koro ga pye be Pìicǎnni taa.

¹⁶ Níì cán li da kɔ́ɔ̀ tìgi pe wàa faala ma í. Pe maa batɛmiw kpéʔele yagana Kàfɔw Zyezu mɛ́ɛgi na.

¹⁷ Lǎli bee ni a Pyɛri ní Zyan kɔ́yi taʔa be na, a be Pìicǎnni taa.

¹⁸ A Siimɔn ga gi nyaa a Kolocɔlɔɔ Pìicǎnni kaan be ma pìitunbèle kɔ́yɔ taʔala báriga ni, a wi pan ní wáli ní be ma, níì jo:

¹⁹ «Ye wɔ́ɔ ye fǎngi bee kaan mii ma, koro ga pye mii ga mii kɔ́gi taʔa syɔ́ɔnwee faala na lè wi wɔ́ɔ wi Pìicǎnni taa.»

²⁰ A Pyɛri si wi yari: «Ki n yɛlɛ mɔ ní mɔ wáliw í pínɛ kálagi, àmɛɛ mɔ sɔ̀ngí lè bi Kolocɔlɔɔ yakaangi taa wáli na.

²¹ Mɔ lɛɛlɛ o nyɛ kéeli naa ni í, mɔ a tée yafyɛn taa li ni í, níì cán mɔ fúngi ga sín Kolocɔlɔɔ ma í.

²² Koro na mi kàdoʔo wáa mɔ péemi bee ma, máā Kàfɔw nyɛ́ɛri koro ga pye wi mɔ sɔngubeeri kùsulugo syɔɔ, ní ki ga pye bi gbǎn kpéʔele.

²³ Níì cán mii n gi nyaa a péemi tɔ̀nɔ n fànʔa taa mɔ na, á sìnzinmi mɔ pwɔɔ.»

²⁴ A Siimɔn be yari: «Ki n yɛlɛ yele tiimaa í Kàfɔw nyɛ́ɛri mii kéeli na, koro ga pye gee yele joo lè, ki kàa faala a kɔ mii taa í.»

²⁵ A pe ga séeraw kpéʔele níì Kàfɔw syɛ́ɛnrɛ joo n kwɔ́ɔ, a be lúru ni syée Zyerusalɛmi ma ní i Syɛɛnjóocǎnri nyuu Samarii ye kěyi saʔa ni.

Filipi ní Etyopii ye fǎngi syɛɛnkpɔɔwaa kéele

²⁶ A Kàfɔw tundunwaa joo ní Filipi ní níì wi pye: «Yìri mi tìgi canʔa parima ma wòrogulo kàbangi na, kólogee gi yìri lè Zyerusalɛmi ma ni syée Gaza ma ki lè fìími tára wóʔo, maa syée gee bee ni.»

²⁷ A wi yìri n kári. Wéle, a wi sáà Etyopii tári nànwaa nyaa, wee pe da wòlo n kàriga lè nìgbɛɛɔn. Tári bee fànʔafɔlɔ si maa pye cɔlɔɔ, pe i wi yiri Kandasi, nǎnw bee si i nyɛ Kandasi fǎngi syɛɛnkpɔɔwaa, woro wi da pye wi lɔ́ri myɛ tɛ́ʔɛfɔlɔ, wi maa kári Zyerusalɛmi ma sa Kolocɔlɔɔ kpɔ̀ʔɔrɔ.

²⁸ A wi ga lúru ni syée níì tɛ́ɛn wi wòtorow ni ni kanyaajoow Ezayi syɛ́ɛnri wéle,

²⁹ a Pìicǎnni Filipi pye: «Da syée mi sa pínɛ ní wòtorow yaa fɔ́lɔ ní.»

³⁰ A Filipi fàn n kári n sáà wi nyaa wi i kanyaajoow Ezayi syɛ́ɛnri wéle ni nyuu, a wi wi pye: «Dee mɔ wéle lè a mɔ di kɔ́rɔw cán lé?»

³¹ A nǎnw wi pye: «Mɛ̀ɛ́ mii a gbǎn di cán bi sɛ́ɛ, kapye wàa ga di kɔ́rɔw tɛ̀ɛn mii na í?» Níì Filipi pye wi woro pɔʔɔ wí lúgu wi tɛ́ɛn woro taana.

³² Tɛ́ɛgee wi da ni wéle lè Kolocɔlɔɔ syɛɛnsɛbɛri ni, koro gi nyɛ gee naa: «Pe n wi cò ni syée tɛɛ̀kpoogi ma, àmɛɛ byà nyɛ lè. Amɛɛ bàpile gáà pyèri lè li síicɛnɛbèle kɔ́yɔ ni, ànbée wi wɔ́ɔ̀ pye, wi ga téè wi nyɔ́ɔgi múgu í.

³³ Lǎli ni be wi faʔa lè, a be kolomɔ kútiiw kúun wi na, wìí wi a gbǎn wi yòdaʔaya kéele joo? Níì cán pe n wi sìíw kwɔ́ɔ tári na.»

³⁴ A nìgbɛɛnnanw Filipi pye: «Mii i mɔ nyɛ́ɛri mi kanyaajoow syɛ́ɛnrɛ kɔ́rɔ tɛ̀ɛn mii na, wìí kéele na wi syɛ́ɛnri naa joo, woro tiimaa kéeli na láà ba fwɔɔ wàa nikwɔɔ wólo?»

³⁵ A Filipi fala n gi séli Kolocɔlɔɔ syɛɛnsɛbɛri bee tɛ́ʔɛ na ni Syɛɛnjóocǎnri nyuu wi ma Zyezu kéeli na.

³⁶ A pe ga ni syée kólogi na n sáà nan lògaa na, a nìgbɛɛnnanw jo: «Wéle, lògaa gi gee. Nyàʔá ki a ní mii yérige batɛmiw kpéʔelele na?»

³⁷ [A Filipi jo: «Mɔ ga tɛ́nɛ̀ tága ní mɔ fúngi myɛ ní, mɔ a gbǎn wi kpéʔele kɛ.» A wi jo: «Mii n tága gi na ncan Zyezu Kirisi* wi nyɛ Kolocɔlɔɔ Jáaw.»]

³⁸ A wi be pye a be wòtorow yérige. A pe myɛ siin tìgi n jée lǒgi ni, Filipi ní nìgbɛɛnnanw ní, a Filipi wi batize.

³⁹ Pe yirili kàdoʔo ma lǒgi ni, a Kàfɔw Pìle Filipi láa n núngo nìgbɛɛnnanw taana, wi ga níì wi nyaa í, a nìgbɛɛnnanw fala ni syée wi kôgárigi ni ní fundaanra ní.

⁴⁰ A Filipi wéle n wiyɛɛ nyaa Azɔti ni, a wi yiri nɛɛ bee ni syée Sezarikaʔa ma, ní i Syɛɛnjóocǎnri nyuu ni syée kěyee myɛ ni wi forogi lè n taa n sáà nan Sezarikaʔa na.