Kapyegèle 6 - Cebaara Bible 2010

Nànbēle kɔrɔsiin n nyɛ́nɛ n wòlo paa pìitunbèle dɛ̀ɛmɛ́

¹ Amɛɛ pìitamabèle nɛʔɛgi ni maa lè cányi bee ni, a Helenisibèle i Heburubèle sànʔá níì jo pe o poro lɔgucebèle córo ni nii yáriri ni be lee lè canʔa o canʔa í.

² A pìitunbèle kɛɛ ní siin pìitama-nɛʔɛbèle bee kpóʔoro níì be pye: «Ki ga yɛlɛ wolo í Kolocɔlɔɔ syɛ́ɛnri joolo yaʔa si pye yarira lɛɛfɔɔlɔ í.

³ Ni senyɛ̀nnɛ, gee bee na gi yɛlɛ ye nànbēle kɔrɔsiin nyɛ́nɛ ye wòlo yeyɛɛ níngi ni, be pye mɛ́ɛtaanya fɔ̀ɔlɔ, be fúnyi si nyìn Pìicǎnni na, pé wɔ́ɔ pye sícilibēle, wolo a bele bee télege fáliw bee na,

⁴ wolo tiimaa si kòro bàā Kolocɔlɔɔ nyɛ́ɛri sáā wi syɛ́ɛnri joolo fáli kpéʔele.»

⁵ A syɛ́ɛnri bee syɛ́ɛnmi myɛ dɛ́nɛ. A bi Etyɛni nyɛ́nɛ n wòlo, wi tágali maa kpɔ́ʔɔ, a wi fúngi wɔ́ɔ̀ nyìn Pìicǎnni na, bele pe da fàra wi na lè, pe i be mɛ́ɛyi yiri Filipi, ní Purokɔri, ní Nikanɔri, ní Timɔ, ní Parimɛnasi, ní Nikola ní, wi lè Antyɔsyi ye wów, wi maa pye syɛɛnfelegaa níì jée Zyefubèle sérikologo ni.

⁶ A syɛ́ɛnmi sáà be yérige pìitunbèle yɛ́ʔɛ ma, a poro Kolocɔlɔɔ nyɛ́ɛri níì kɔ́yi taʔa be na.

⁷ A Kolocɔlɔɔ syɛ́ɛnri i caragi ni syée yɛʔɛ̀ ma, pìitamabèle si wɔ́ɔ i nɛʔɛgi gbanʔama Zyerusalɛmi ni, a sáriga-wòlobèle pèle saʔa tága.

Etyɛni cǒli kéele

⁸ Kolocɔlɔɔ kpɔ́ʔɔri ní wi fǎngi maa pye Etyɛni ma, a wi i kakpoloyi, ní fɛ̀ɛkpoloyo kpéʔele syɛ́ɛnbèle nínge ni.

⁹ Zyefubèle sérikpaagaa maa pye yaà pe i gi yiri Wɔ́rɔbèle wóʔo, a syɛ́ɛnbèle bee pèle yìri, ní Sirɛni tári wóbèle pèle, ní Alɛkisandirikaʔa wóbèle pèle ní, n fàra Silisii tári, ní Azii tári wóbèle pèle na. A pe myɛ yìri ni Etyɛni kábala.

¹⁰ Kàjáa pe ga gbàn n joo n wi jáa í, níì cán wi maa ni nyuu ní sícilimɛ ní Pìicǎnni báriga ni.

¹¹ Lǎli bee ni a be nǎnbèle pèle láa sàra na be sa finɛ taʔa wi na si jo: «Wolo n gi lóʔo Etyɛni nyɔ́ɔgi na a wi i Mowizi ní Kolocɔlɔɔ mɛ́ɛgi kálagi.»

¹² A be syɛ́ɛnmi, ní wolɛɛbèle, ní làlwaw sɛ́bɛwelebéle sɔ́ɔn wi na, a be sáà too wi na n wi cò n kári Sanedirɛnw tɛ́ʔɛ ma.

¹³ Pe maa wɔ́ɔ̀ kári ní jànvaaw séerafɔɔlɔ ní, a poro sáà jo: «Nǎnw naa o caa bi láʔa syɛɛnpeeri joolo na tɛɛcǎngi naa, ní Mowizi làlwaw kánma na í.

¹⁴ Níì cán wolo n gi lóʔo wi nyɔ́ɔgi na a wi jo, Zyezuw bee wi lè Nazarɛti ye wów, wi a ba tɛɛcǎngi naa kálagi si kalɛɛgèle kàriga, gele Mowizi da kaan wolo ma lè.»

¹⁵ Bele myɛ pe da tɛ́ɛn lè Sanedirɛnw tɛ́ʔɛ ni, a poro be nyapiigèle le wi ni ni wéle, a be wi yɛ́ɛgi nyaa a gi kàri mɔ a jo nyɛ̀ʔɛni tundunwaa wóʔo gii.