Kapyegèle 5 - Cebaara Bible 2010

Ananyasi ní Safira

¹ Nànwaa si maa pye yaà pe i wi yiri Ananyasi, ní i wi céw yiri Safira, a wi tára pára

² níì di lɔraa wòlo n yaʔa wiyɛɛ ma, a wi céw gi cán, á wi kári ní wozanri ní n sáà kaan pìitunbèle ma.

³ A Pyɛri wi yari: «Ananyasi, nyàʔá na mɔ Sutanaw yaʔa a wi mɔ fúngi nyìn nya a mɔ Pìicǎnni fáana, níì tári lɔ́raa wòlo n yaʔa miyɛɛ ma?

⁴ Lǎli ni tári pye lè mɔ ga kɔ́ɔ̀ di pára í, ti da pye mɔ wóro ì? Mɔ si baa di pára n kwɔ́ɔ lè, ti lɔ́ri ga kòro mɔ nyɛ́nɛ pyele na ì? Mɛ̀ɛ́ mɔ kéeli naa tímana n sɛ́ɛ mɔ fúngi ni níì li kpéʔele? Mɔ ga taa si syɛ̀ɛnnɛ fáana í, fwɔɔ Kolocɔlɔɔ mɔ a fáana.»

⁵ Lǎli ni Ananyasi syɛ́ɛnri bee lóʔo lè, a wi too n kùu. A fyáakpɔɔrɔ lóʔofɔbèle myɛ cò.

⁶ A nìgɔcaribèle yìri n wi lúgo, níì wi láa n sáà tɔ́n.

⁷ A lɛ́ɛribéle taanri félege ga kwɔ́ɔ, a wi céw wɔ́ɔ̀ nan yaà, wi si da gi cán gee gi kpéʔele yaà lè í.

⁸ A Pyɛri wi yíbe níì jo: «Kánmi naa na lé yele tári pára? Mi gi joo mii ma.» A wi jo: «Ɛɛn, ti lɔ́ri dii.»

⁹ A Pyɛri wi pye: «Mɛ̀ɛ́ gi pye n sɛ́ɛ á yele pínɛ n tímana n bɛ̀ɛ gi na ní i caa bi Kàfɔw Pìle pye wéle? Wéle, bele be sáà mɔ nanw tɔ́n lè, poro tánʔami mɔ lúro bee kpaaweeli na. Pe a wɔ́ɔ mɔ yirige yaà.»

¹⁰ A wi fala n too terire Pyɛri taana n kùu. A nìgɔcaribèle ga baa jée níì wi nyaa woguuo ní, a be wi láa n sáà tɔ́n wi nǎnw taana.

¹¹ A fyáari tɔ̀nɔ n Egiliziw myɛ cò n fàra kérigèle bee lóʔofɔɔlɔ myɛ na.

Kakpolo-nɛʔɛyɛ

¹² Pìitunbèle maa ni fɛ̀ɛ́bèle ní kakpoloyi saʔa kpéʔele syɛ́ɛnbèle nínge ni. Tágafɔbèle myɛ maa ni peyɛɛ gbóʔoro ní fungo nibin ní kpáali ma be yiri lè Salomɔn kpáali.

¹³ Kàfugi wówaa faala ga soro n jée be ni í. Kàjáa syɛ́ɛnbèle si maa tɔ̀nɔ ni be mɛ́ɛtaanyi yiri.

¹⁴ A syɛɛnmɛ saʔa wɔ́ɔ i tági Kàfɔw na ni fàrá be na, gee bee n jo nǎnbèle ní cébèle.

¹⁵ A be i yáabèle lée ni yirigi n ba ni sínɛgi kàlari-kóloyi ni gbàngbaʔariyi ní kpàsaabèle na, koro ga pye Pyɛri ga ba ni sɔ̀lɔ́ wi kànyinni í taa ra tuun pèle na.

¹⁶ A syɛ́ɛnmi wɔ́ɔ i yìrigí Zyerusalɛmi taana kěyi ma ni maa ní yáabèle ní n fàra bele na be fɔ̀rɔgí lè màdebèle kɔ́yɔ ni. A pe myɛ ba ni poori.

Pìitunbèle wɔʔɔlɔ kéele

¹⁷ Lǎli bee ni a sáriga-wòlobèle kàfɔgbɔɔɔ yìri n fàra bele myɛ na be pye lè ní wi ní, gee bee n jo Sadusebèle, a nyabɛɛnni cée be na,

¹⁸ a be baa pìitunbèle cò n sáà le kàsokpaakpɔɔgi ni.

¹⁹ Kàjáa a Kàfɔw tundunwaa pan nyǐnlɛɛgi na n baa kàsokpaagi kɔ̀riyɔ múgu be na, níì be yirige níì jo:

²⁰ «Yaa syée ye sa yére kpɔ̀ʔɔrɔli kpaʔa ni, yaa sìitelew naa syɛ́ɛnrɛ myɛ nyuu syɛ́ɛnbèle ma.»

²¹ A pe ga wi syɛ́ɛnri lóʔo n kwɔ́ɔ, a be sáà jée kpɔ̀ʔɔrɔli kpaʔa ni nyǐnjerigi na ni syɛ́ɛnbèle tama yaà. A sáriga-wòlobèle kàfɔgbɔɔɔ ga pan ní bele ní be pye lè ní wi ní, a be Sanedirɛnw yeri n kpóʔoro n fàra Isirayɛli ye yòdaʔayi wólɛɛbéle myɛ na. Níì gáridibèle tun kàsokpaagi ma níì jo be sa pìitunbèle kɔ́ri paa maa.

²² A gáridibèle ga sáà nan kàsokpaagi na, pe ga be nyaa yaà í. A be lúru n baa gi joo be ma

²³ níì jo: «Wolo n sáà kàsokpaagi nyaa a be gi sámaga n sɔ̀ʔɔ, á kpaàwelebèle yére kɔ̀riyi taana, kàjáa lǎli ni wolo gi múgu lè, wolo ga syɔɔn nyaa gi ni í.»

²⁴ A kpɔ̀ʔɔrɔli kpaʔa gáridibéle kafɔlɔ ní sáriga-wòlobèle kàfɔɔlɔ ga syɛ́ɛnri bee lóʔo, a gi be fúnyi wɔ́ɔ àmɛɛ pìitunbèle pye n sɛ́ɛ lè níì yiri, a be i peyɛɛ yíbe àmɛɛ gi kàdogi a ba pye lè.

²⁵ A wàa pan n baa be pye: «Ye wéle, nǎnbèle yele le lè kàsow ni, pe i yaà n yére bele kpɔ̀ʔɔrɔli kpaʔa ni ni syɛ́ɛnbèle tama.»

²⁶ A gáridibèle kàfɔlɔ kári ní gáridibèle ní n sáà be kɔ́ri fûnnyinge na n pan, níì cán pe maa ni fɛ̀ɛgí syɛ́ɛnbèle na níì jo pe a kɔ́ poro wábagi kpóo ní kàdɛnɛrɛ ní.

²⁷ A pe ga pan ní be ní n baa yérige Sanedirɛnw nínge ni, a sáriga-wòlobèle kàfɔgbɔɔɔ be yíbe

²⁸ níì jo: «Wolo ga gi joo n gbàn yele ma níì jo: Yele a ní kɔ́ ra syɛ́ɛnbèle tama mɛ́ɛgi bee na í ì? A wolo si gi nyaa a yele Zyerusalɛmi nyìn ní yele tamani bee ní, ní wɔ́ɔ i caa bi nǎnw bee kpóolo kútii cáan wolo na.»

²⁹ A Pyɛri ní wi pìitunnyɛnbèle be yari: «Kolocɔlɔɔ má gi yɛlɛ wolo í da lúro, syɛ́ɛnbèle má ban í.

³⁰ Wolo tóolɛɛbèle Kolocɔlɔɔ n Zyezu nyán n yìrige, wee yele da kóri tiiparigi na a wi kùu lè.

³¹ Kolocɔlɔɔ n wi kpɔ́ʔɔ, níì wi télege wiyɛɛ kàliige kɔ́lɔ ma, ní wɔ́ɔ̀ wi kpéʔele Fànʔafɔlɔ ní Syɔɔfɔlɔ, koro ga pye wi kanmaa kaan Isirayɛli ye ma be kàdoʔo wáa be kapeegèle ma ge kùsulugi si syɔɔ.

³² Wolo si i nyɛ kérigèle bee séerabéle n fàra Pìicǎnni na, lee Kolocɔlɔɔ kaan bele ma be lúro woro ma lè.»

³³ Amɛɛ be syɛ́ɛnri bee lóʔo lè, a fúnyi tanʔa be na fwɔɔ n baa sɔ̀lɔ, a be i sɔ̀ngí bi be kpóo.

³⁴ Kàjáa Farisiwaa maa pye yaà pe i wi yiri Gamaliyɛli, Mowizi làlwaw tamafɔgbɔɔwaa wi pye, syɛ́ɛnbèle myɛ maa ni wi kpɔ́ʔɔgi, a wee bee yìri n yére Sanedirɛnw nínge ni níì be pye be pìitunbèle yirige kàfugi na cɛɛri,

³⁵ ní náà gi joo be ma níì jo: «Yele Isirayɛli ye, gee yele sɔ̀ngí bi kpéʔele lè nǎnbèle naa na, ki n yɛlɛ yaa yeyɛɛ kɔ̀rɔsíi.

³⁶ Níì cán ki ga kɔ́ɔ̀ mɔn í, Tudasi wi da ni wiyɛɛ zɔ̀ngí lè syɛɛnkpɔɔɔ, a syɛ̀ɛnnɛ saala siin félege taʔa wi na, á pèle baa wi kpóo. Bele pe da ni lúro wi ma lè, a pe myɛ cariga, koro kàdogi da níì pye yafyɛn í.

³⁷ A Zyudasi ní baa yìri woro kàdoʔo ma, wi lè Galile tári wóo, syɛ́ɛnbèle làrijorolo ni, ní i syɛ́ɛnbèle kíle ni maa wiyɛɛ ma, a woro ní baa kùu, bele myɛ pe da ni lúro wi ma lè, a be wɔ́ɔ̀ cariga.

³⁸ Gee si mii a joo yele ma lè tɔ́ɔliw ni koro gi nyɛ, ki n yɛlɛ ye láʔa nǎnbèle naa na, yé be yaʔa peyɛɛ ma. Kapye syɔɔn wi kéeli naa tímana, wàlá kapye syɔɔn má fáliw naa yìri, wi a kálagi.

³⁹ Kàjáa kapye Kolocɔlɔɔ má kéeli naa yìri, yele a gbǎn be kálagi í. Ye yeyɛɛ còganmi cán jàngó ki a kɔ́ pye mɔ a jo yele i túngu ní Kolocɔlɔɔ ní í.» A be yére wi syɛ́ɛnri ni.

⁴⁰ A be pìitunbèle yeri n baa kpúmɔn, níì be pye pe a ní kɔ ra nyuu syɛ́ɛnbèle ma Zyezu mɛ́ɛgi na í, níì be yaʔa.

⁴¹ A pe ga yiri Sanedirɛnw nínge ni, a be i fundaanra kpéʔele àmɛɛ Kolocɔlɔɔ poro córo lè poro n nyɔɔ n yɛlɛ pe poro faʔa Zyezu mɛ́ɛgi kéele na.

⁴² Níì kòro ni syɛ́ɛnbèle tama canʔa o canʔa kpɔ̀ʔɔrɔli kpaʔa ni, ní kpáayi ni, ní i Kirisi Zyezu Syɛɛnjóocǎnri nyuu.